23 ޖޫން 2016 - 13:14
މާލޭގައި އުފެދޭ ކުނި ތިލަފުއްޓަށް އުފުލުމަށާއި ކުނި މެނޭޖްކުރުމުގެ ކަންކަން ރާވައި ހިންގަން ސަރުކާރުން އުފެއްދި ވޭސްޓް މެނޭޖްމެންޓް ކޯޕަރޭޝަން (ވެމްކޯ) އިން ވަކި ބަޔަކަށް ނާޖާއިޒު ފައިދާ ހޯދައިދޭން މަސައްކަތް ކުރާ ކަމަށް ބުނެ ހުށަހެޅި މައްސަލައެއް އެންޓި ކޮރަޕްޝަން ކޮމިޝަން (އޭސީސީ) އިން ބަލަން ފަށައިފި އެވެ.
ތަފްސީލް ނުދެއްވައި ކޮމިޝަންގެ އޮފިޝަލަކު ވިދާޅުވީ އެ މައްސަލަ ބަލަމުން އަންނަ ކަމަށެވެ.
ވެމްކޯގެ ހިޔާނާތުގެ މައްސަލަތައް ބަލައިދޭން އެދި އޭސީސީ އަށް އަމިއްލަ ފަރާތަކުން ހުށަހެޅި މައްސަލާގައި ތުހުމަތުކޮށްފައިވާ ގޮތުގައި ކުނި އުފުލަން ކުއްޔަށް ހިފާފައިވާ ތިން ކޮޅުވެއްޓި އާއި ކުނި އަރުވަން ކުއްޔަށް ހިފާފައިވާ ދޯނިތަކުގެ ކުލީގެ ގޮތުގައި ދައްކާ ފައިސާގެ ބޮޑު ބައެއް ނަގަނީ ވެމްކޯގެ އިސް ފަރާތްތަކަށާއި އެ ކުންފުންޏާ ގުޅިފައިވާ ސިޔާސީ އިސް ފަރާތްތަކުންނެވެ.
އޭސީސީ އަށް ހުށަހެޅި ސިޓީގައި ބުނީ މާލެ އިން ތިލަފުއްޓަށް ކުނި އުކަން ކޮޅުވެއްޓި ކުއްޔަށް ހިފާފައި ވަނީ ދުވާލަކު 45،000-50،000ރ. ގެ ރޭޓުން ކަމަށެވެ. އެހެންކަމުން ކޮޅުވެއްޓީގެ ކުލީގެ ގޮތުގައި އެވްރެޖްކޮށް މަހަކު ހަތަރު މިލިއަން ރުފިޔާ އަށް ވުރެ ބޮޑު އަދަދެއް ވެމްކޯ އިން ދައްކަން ޖެހޭ ކަމަށް ސިޓީގައިވެ އެވެ.
"ބްރޭންޑް ނިއު ކޮޅުވެއްޓިއެއްގެ އަގު އުޅެނީ 10 މިލިއަން ރުފިޔާ އަށް ވުރެ ކުޑަކޮށެވެ. ދާދި ފަހުން އެމްޑަބްލިއުއެސްސީ އާއި މިނިސްޓްރީ އޮފް އެންވަޔަރަމެންޓް އެނާޖީން ގެނައި ކޮޅުވެއްޓީގެ އަގު ބެލުމުން ވެސް އެނގެ އެވެ،" ސިޓީގައިވެ އެވެ.
"އަހަރު ދުވަސް ތެރޭގައި ކޮޅުވެއްޓީގެ ކުލީގެ ގޮތުގައި 48 މިލިއަން ރުފިޔާ ހަރަދުކުރަމުންދާއިރު 30 މިލިއަން ރުފިޔާ ހަރަދުކޮށްގެން ތިން ކޮޅުވެއްޓި ނުގެނެވޭންވީ ނުވަތަ ނުގަންނަންވީ ސަބަބަކީ ކޮބައިތޯ އެވެ."
ސިޓީގައި ތުހުމަތުކޮށްފައިވާ ގޮތުގައި ކޮޅުވެއްޓިތައް އަގު ބޮޑުކޮށް ކުއްޔަށް ހިފައިގެން އުޅެނީ، ކޮޅުވެއްޓީގެ ކުލީގެ ގޮތުގައި ދައްކާ ފައިސާގެ ބޮޑު ބައެއް ރިޝްވަތުގެ ގޮތުގައި ވެމްކޯ އާއި އެތަނުގެ ވެރިންނާއި ގުޅުން ހުރި ސިޔާސީ ފަރާތްތަކަށް ލިބެމުންދާތީ އެވެ.
"ވެމްކޯ އިން ކުނިވާ ޒާތުގެ ކުނި ތިލަފުއްޓަށް އުފުލަން ކުއްޔަށް ހިފާފައިވާ ދޯނިތައް ވެސް ކުއްޔަށް ހިފާފައި ވަނީ ދޯނި ފަހަރުގެ ވެރިންގެ އަތަކުން ނޫނެވެ. ދޯނި ފަހަރުގެ ވެރިންނަށް ލިބެނީ ކުޑަ އަގެކެވެ. ދޯނިތައް ކުއްޔަށް ހިފި ފަރާތުން ވެމްކޯ އަށް ބޮޑު ކުއްޔެއް ދީފައިވެ އެވެ،" ސިޓީގައިވެ އެވެ.