20 ޖުލައި 2017 - 06:24
ރަންބީރު ކަޕޫރާއި ކެޓުރީނާ ކައިފްގެ "ޖައްގާ ޖާސޫސް" ގައި ކުޑަ ރޯލެއް އަދާކޮށްފައިވާ އާސާމްގެ ބަތަލާ އަދި ލަވަ ކިޔުންތެރިޔާ ބިދީޝާ ބޭޒްބަރުއާގެ މަރާ ގުޅިގެން ހަރްޔާނާ ސްޓޭޓްގެ ފުލުހުން އޭނާގެ ފިރިމީހާ އަންގާރަ ދުވަހު ހައްޔަރު ކޮށްފި އެވެ.
ބިދީޝާގެ ފިރިމީހާ ހައްޔަރުކޮށްފައި މިވަނީ ގުރުގްރާމް ކިޔާ ރަށުގައި ހުންނަ މި ދެމަފިރިން އުޅޭ އެޕާޓްމަންޓްގައި ބިދީޝާ މަރުވެފައި ހުއްޓާ ފެނުނުތާ އެއް ދުވަސް ފަހުންނެވެ.
ބިދީޝާ މަރުވީ އަމިއްލައަށް ކަމަށް ބެލެވުނު ނަމަވެސް އޭނާގެ ބައްޕަ ފުލުހުންނަށް ހުށަހެޅި މައްސަލައިގައި ބުނެފައިވަނީ ބިދީޝާ މަރުގެ ޒިންމާ ނަގަން ޖެހޭނީ އޭނާގެ ފިރިމީހާ ކަމަށެވެ.
ބިދީޝާ، 30، ގެ ފިރިމީހާ އެހެން އަންހެނަކާ ލޯބީގެ ގޮތުން ގުޅިގެން އުޅޭކަމަށް ވެސް ބިދީޝާގެ މައިންބަފައިން ވަނީ ތުހުމަތުކޮށްފަ އެވެ.
މީގެ 14 މަސް ކުރިން ބިދީޝާ ކައިވެނި ކުރި ނަމަވެސް ފިރިމީހާ އާއި އޭނާގެ އާއިލާގެ މީހުން ބިރުދައްކާ ކަމަށް ބުނެ އޭނާގެ ކައިރިން ވަރިވާން ބޭނުން ކަމަށް ބިދީޝާ އޭނާގެ މައިންބަފައިން ކައިރީގައި ބުނެފައިވާ ކަމަށް ވެސް އޭނާގެ ބައްޕަ ބުންޏެވެ.
ބިދީޝާ އަކީ ޓީވީގެ ޕްރޮގްރާމްތަކުން ވަރަށް ގިނައިން ފެންނަ ޓީވީގެ މަޝްހޫޜު ޝަޚްސިއްޔަތެއް ވެސް މެއެވެ.