26 ޖޫން 2016 - 03:15
ލެންސް، ފްރާންސް (ޖޫން 25) - ދެ ޓީމު އެއްވަރުވުމުން ކުޅުނު އިތުރު ވަގުތުގެ ދެ ވަނަ ހާފް ނިމެން ހަތަރު މިނިޓަށް ވެފައިވަނިކޮށް ރިކާޑޯ ކުއަރެސްމާ ޖެހި ލަނޑުން 1-0 އިން ކްރޮއޭޝިއާ ބަލިކޮށް ޔޫރޯ ފުޓްބޯޅަ މުބާރާތުގެ ކުއާޓާ ފައިނަލުން ޕޯޗުގަލް ޖާގަ ހޯދައިފި އެވެ.
އިތުރު ވަގުތުގެ ދެ ވަނަ ހާފްގެ ފަހު ފަސް މިނިޓާ ހަމަ އަށް މިރޭގެ މެޗުގައި ފެނުނީ އެޓޭކް މަދު އާދައިގެ ކުޅުމެކެވެ. ނަމަވެސް އިތުރު ވަގުތުގެ ދެ ވަނަ ހާފްގެ ފަހު ފަސް މިނިޓް ތެރޭ ފެނުނީ ވާދަވެރި މޮޅު ކުޅުމެކެވެ. މި މެޗަކީ މިފަހަރުގެ ޔޫރޯގައި ޕޯޗުގަލް މޮޅުވި ފުރަތަމަ ފަހަރެވެ. ގްރޫޕް ސްޓޭޖުގެ ތިން މެޗުން ވެސް އެ ޓީމުވީ އެއްވަރެވެ. އަނެއްކޮޅުން ކްރޮއޭޝިއާ އަކީ ޗެމްޕިއަން ސްޕެއިން ހިމެނުނު ގްރޫޕުގެ އެއް ވަނަ ޓީމުގެ ގޮތުގައި ދެ ވަނަ ބުރުން ޖާގަ ހޯދި ޓީމެކެވެ.
ފުރަތަމަ ހާފް ފެށިގެން ދެ ޓީމުގެ ފަރާތުން ފެނުނީ ހަމަހަމަ ކުޅުމެކެވެ. ދެ ޓީމުން ވެސް މެދުތެރޭގައި ބޯޅަ ހިފަހައްޓައިގެން ކުޅުނުއިރު، ގޯލާ އަމާޒުކޮށް ހަމަލާއެއް ފޮނުވާލެވިފައިނުވެ އެވެ. މި ހާފްގައި ޕޯޗުގަލް އިން އެންމެ ރަނގަޅު ފުރުސަތެއް ލިބުނީ ޕެޕޭ އަށެވެ. މެޗުގެ 24 ވަނަ މިނިޓްގައި ލިބުނު ހިލޭ ޖެހުމަކުން ރަފައެލް ގަރޭރޯ ނަަގައިދިން ހުރަހަކުން ޕެޕޭ ބޮލުން ބޯޅަ ފޮނުވާލި ނަމަވެސް ދިޔައީ ހުރަސް ދަނޑިމަތިންނެވެ. މި ހާފްގައި ޕޯޗުގަލްގެ ތަރި ރޮނާލްޑޯ އަށް ކްރޮއޭޝިއާ ގޯލަށް އެއްވެސް ހަމަލާއެއް ފޮނުވާލެވިފައިނުވެ އެވެ.
މި ހާފްގައި ކްރޮއޭޝިއާގެ ޑިފެންޑަރު ޑޮމަގޯއި ވީޑާ އަށް ވަނީ ރަނގަޅު ފުރުސަތެއް ލިބިފަ އެވެ. މެޗުގެ 37 ވަނަ މިނިޓްގައި އިވާން ރަކިޓިޗް ނަގައިދިން ހުރަހަކުން ވީޑާ ބޮލުން ފޮނުވާލި ބޯޅަ ދިޔައީ ހުރަސް ދަނޑި މަތިންނެވެ.
ދެ ވަނަ ހާފްގައި ރެނާޓޯ ސަންޗޭޒް އެރުވުމުން ޕޯޗުގަލްގެ ކުޅުން ރަނގަޅުވި އެވެ. އޭނާ މެދުތެރެއިން ދައްކަން ފެށި މޮޅު ކުޅުމުން ކްރޮއޭޝިއާ އަށް އުނދަގޫ ބޮޑުވި އެވެ. މިރޭގެ މެޗުގައި ސަންޗޭޒް ކުޅެން އެރުމާ އެކު އޭނާ ވެފައިވަނީ ޔޫރޯގެ ނޮކައުޓް މެޗެއްގައި ކުޅުނު ދެ ވަނަ އަށް އެންމެ ޒުވާން ކުޅުންތެރިއާ އަށެވެ. އެންމެ ޒުވާން ކުޅުންތެރިއަކީ 2004 ވަނަ އަހަރު އުމުރުން 18 އަހަރާއި 243 ދުވަހުގައި ކުޅުނު އިންގްލެންޑުގެ މިހާރުގެ ކެޕްޓަން ވޭން ރޫނީ އެވެ. ސަންޗޭޒް މިރޭގެ މެޗު ކުޅުނުއިރު، އޭނާގެ އުމުރަކީ 18 އަހަރާއި 311 ދުވަހެވެ.
ދެ ވަނަ ހާފްގައި ވެސް ރޮނާލްޑޯގެ ފަރާތުން ފެނުނީ އާދައިގެ ކުޅުމެކެވެ. ކްރޮއޭޝިއާ ޑިފެންޑަރުން ކައިރީގައި އޭނާގެ ކުޅުން ފެންނަ ގޮތެއްނުވެ އެވެ.
މި މެޗަކީ މި ފަހަރުގެ ޔޫރޯގައި ލަނޑު ޖަހަން އެންމެ މަދުން ފުރުސަތު ތަނަވަސްކުރި މެޗެވެ. ފުރިހަމަ ވަގުތު ހަމަވިިއިރު، ދެ ޓީމަށް ލަނޑެއް ކާމިޔާބުކުރެވިފައި ނުވުމުން ކުޅުނު އިތުރު ވަގުތުގެ ފުރަތަމަ ހާފްގައި ވެސް ދެ ޓީމުގެ ފަރާތުން އެހާ ރަނގަޅު އެޓޭކްތަކެއް ނުފެނެ އެވެ.
އެހެން ނަމަވެސް ދެ ވަނަ ހާފްގައި ދެ ޓީމުގެ ކުޅުން ރަނގަޅުވި އެވެ. މި ހާފްގައި ވެސް ކްރޮއޭޝިއާގެ ވީޑާ އަތުން ރަނގަޅު ފުރުސަތެއް ގެއްލުނެވެ. މެޗު ބަދަލުވީ އިތުރު ވަގުތުގެ ފަހު ތިން މިނިޓް ތެރޭގަ އެވެ.
މެޗުގެ 116 ވަނަ މިނިޓްގައި ޕޯޗުގަލް އޭރިއާ ތެރެއިން ކްރޮއޭޝިއާގެ އިވާން ޕެރިސިޗް ބޮލުން ފޮނުވާލި ބޯޅަ އަމާޒުވީ ގޯލުގެ ދަނޑިއަށެވެ. އެ ބޯޅަ ހޯދައި، ޕޯޗުގަލް އިން ވަނީ ކައުންޓަ އެޓޭކްގައި ކްރޮއޭޝިއާ އަށް ލަނޑު ދީފަ އެވެ.
ރެނާޓޯ ސަންޗޭޒް ކްރޮއޭޝިއާ ހާފް ތެރެއިން ނާނީ އަށް ދިނުމުން އޭނާ ވަނީ އެ ބޯޅަ އޭރިއާ ތެރޭގައި ހުހަށް ހުރި ރޮނާލްޑޯ އަށް ޕާސްކޮށްފަ އެވެ. ރޮނާލްޑޯ ފޮނުވާލި ހަމަލާ ކްރޮއޭޝިއާގެ ކީޕަރު ޑަނިޖެލް ސުބަސިޗް އަތުގައި ޖެހިފައި ލިބުމުން ކުއަރެސްމާ ވަނީ ބޮލުން ހުސް ގޯލެއްގެ ތެރެއަށް ބޯޅަ ފޮނުވާލައިފަ އެވެ.
ކުއާޓާ ފައިނަލުގައި ޕޯޗުގަލް ކުޅޭނީ ސްވިޒަލެންޑް އަތުން ޕެނަލްޓީ ޖަހައިގެން މޮޅުވި ޕޮލެންޑާ އެވެ. އެ މެޗު އޮންނާނީ ބުރާސްފަތި ދުވަހުގެރެ އެވެ،
މިރޭގެ މެޗަކީ ޕޯޗުގަލްގެ ލުއިސް ނާނީ ގައުމީ ޓީމަށް ކުޅެދިން 100 ވަނަ މެޗެވެ. އޭނާ އަކީ ކްރިސްޓިއާނޯ ރޮނާލްޑޯ އާއި ލުއިސް ފީގޯ އަދި ފެނާންޑޯ ކޫޓޯ އަށް ފަހު އެ ޓީމަށް 100 މެޗު ހަމަކުރި ފުރަތަމަ ކުޅުންތެރިއާ އެވެ