26 ޖުލައި 2017 - 15:26
ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫން ހައްޔަރުކޮށް، ބަންދުކުރި މައްސަލަ އިސްތިއުނާފް ކުރަން ފާރިސްގެ ފަރާތުން ހުށަހެޅި މައްސަލަ ހައި ކޯޓުން އިއްޔެ ބަލައިގެންފި އެވެ.
މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލައާ ގުޅިގެން މެމްބަރުންނަށް ރިޝްވަތު ދޭން އުޅުނު ކަމަށް ބުނެ ފާރިސް ހައްޔަރުކޮށް، ޝަރީއަތް ނިމެންދެން ބަންދުގައި ބަހައްޓަން އަމުރުކުރި މައްސަލަ އިސްތިއުނާފް ކުރަން ހުށަހެޅި މައްސަލަ ހައި ކޯޓުން އިއްޔެ ބަލައިގެންފައިވާ ކަން ފާރިސްގެ ވަކީލް މައުމޫން ހަމީދު ވަނީ ކަށަވަރުކޮށް ދެއްވައިފަ އެވެ.
އެކަމަކު އެ މައްސަލައިގެ އަޑުއެހުންތައް ހައި ކޯޓުން އަދި ތާވަލެއް ނުކުރެ އެވެ. ބެލެވޭ ގޮތުގައި އެ މައްސަލައިގެ އަޑުއެހުންތައް ދެން ފަށާނީ އަންނަ ހަފުތާގަ އެވެ.
ދޫނިދޫގައި ބެހެއްޓުމަށް ފަހު މާފުށީ ޖަލަށް އިއްޔެ ބަދަލުކޮށްފައިވާ ފާރިސްގެ މައްޗަށް ދައުލަތުން ވަނީ އެހެން ތުހުމަތެއްގައި ވެސް ދައުވާ އުފުލައިފަ އެވެ. އެއީ ޕީޕީއެމްގެ ދިދަ އާއި ލޯގޯ ގަވާއިދާ ޚިލާފަށް ބޭނުން ކުރި ކަމަށް ބުނެ ކުރާ ޝަހްސު އޮޅުވާލުމުގެ ދައުވާ އެވެ. އެ މައްސަލައިގެ ޝަރީއަތެއް އަންނަ ހަފުތާގައި ވެސް އޮންނާނެ އެވެ.
ޝަހްސު އޮޅުވާލުމުގެ ދައުވާ ފާރިސްގެ މައްޗަށް ސާބިތުވިޔަސް އޭނާގެ މެމްބަރުކަމުގެ ގޮނޑި ނުގެއްލޭނެ އެވެ. އެހެން ނަމަވެސް ރިޝްވަތުގެ މައްސަލާގައި އޭނާއަށް ދައުވާކޮށް، ކުށް ސާބިތުވެއްޖެ ނަމަ މެމްބަރުކަމުގެ ގޮނޑި ގެއްލުން އެކަށީގެންވެ އެވެ. އެއް އަހަރަށް ވުރެ ދިގު ހުކުމެއް އައިސްފި ނަމަ މެމްބަރުކަމުން ވަކިވާނެ އެވެ.