26 ޖުލައި 2017 - 22:17
މާލޭގައި، އުމުރުން 15 އަހަރުގެ އަންހެން ކުއްޖަކު ގެއްލިގެން ހޯދަން ފަށައިފި އެވެ.
މިރޭ އެ ކުއްޖާގެ ބައްޕަ "މިހާރު" އާ ވާހަކަދައްކަމުން ބުނީ މާލޭގެ ސްކޫލެއްގެ ގްރޭޑް 10 ގައި ކިޔަވާ ދަރިފުޅު ގެއްލިގެން ހޯދަން ފެށީ ރޭ 12:30 ހާއިރުން ފެށިގެން ކަމަށެވެ.
"އޭނާ ދިރިއުޅޭ ގޭގެ ކޮޓަރިން ނުކުތީ ފާހާނާއަށް ވަންނަން ކަމަށް އެނގިފައި ވަނީ. އޭގެ ފަހުން އެއްވެސް ހަބަރެއް ނުވޭ. އެކަމަކު އަރާ ފައިވާން ގޭތެރޭގައި އެބަހުރި،" އެ ކުއްޖާގެ ބައްޕަ ބުންޏެވެ.
ކުއްޖާގެ ބައްޕަ ވަނީ، ދަރިފުޅު ހޯދައިދިން ފަރާތަކަށް 5،000ރ. އިނާމެއް ހުށަހަޅައި، އެ ކުއްޖާގެ ފޮޓޯ އާއި ނަން ފޭސްބުކްގައި އާންމުކޮށްފަ އެވެ.
އޭނާ ބުނީ ދަރިފުޅު ހޯދައި ނުފެނިގެން ރޭފަތިހު 5:30 ހާއިރު ފުލުހުންނަށް ވެސް ރިޕޯޓްކޮށްފައިވާ ކަމަށެވެ. ނަމަވެސް މިހާތަނަށް އެ ކުއްޖާއާ ބެހޭ އެއްވެސް ހަބަރެއް ނުވެ އެވެ.
"އަޅުގަނޑުމެންނަށް އެއްގޮތަކަށް ލަފާކުރަން ވެސް ނޭނގެ ދަންވަރު ގަޑީގައި އެ ކުއްޖާ ނުކުމެގެންދާނެ ތަނެއް. އޭނާގެ ފޯނު ވެސް އޮތީ ނިވިފައި،" އެ ކުއްޖާގެ ބައްޕަ ބުންޏެވެ.
ހުޅުމާލޭގައި ދިރިއުޅޭ އެ ކުއްޖާ ރޭ މާލެ ދިޔައީ 9:30 ހާއިރު އެވެ. ގޮސް ހުރީ ނަށާ ގްރޫޕެއްގެ ބަޔަކު އުޅޭ ގެއެއްގައި ކަމަށާއި އެއީ ކުއްޖާގެ އެކުވެރި ބައެެއް ކަމަށް ވެސް ވަނީ އެނގިފަ އެވެ.
މިކަމާ ގުޅިގެން ފުލުހުންގެ ބަހެއް ލިބޭ ގޮތެއްނުވި އެވެ.