29 ޖުލައި 2017 - 13:03
އެމެޒޯން އިން ވިޔަފާރި ފުޅާކުރުމަށް އިންވެސްޓް ކުރި މިންވަރު އިތުރުވުމާ ގުޅިގެން މި އަހަރުގެ ދެ ވަނަ ކުއާޓަރުގެ ފައިދާ 77 ޕަސެންޓް ދަށްވެއްޖެ އެވެ.
މި އަހަރުގެ ފުރަތަމަ ކުއާޓަރުގައި އެމެޒޯން އަށް ވަނީ 724 މިލިޔަން ޑޮލަރުގެ ފައިދާއެއް ލިބިފަ އެވެ. އިންވެސްޓް ކުރި މިންވަރު އިތުރުވުމާ އެކު ދެ ވަނަ ކުއާޓަރުގައި ފައިދާގެ ގޮތުގައި ލިބުނީ 197 މިލިއަން ޑޮލަރެވެ. މިދިޔަ ކުއާޓަރުގައި އެ ކުންފުންޏަށް އެއްވެސް ގެއްލުމެއް ކުރިމައްޗެއް ނުވެ އެވެ.
ދެ ވަނަ ކުއާޓަރުގެ ފައިދާ ދަށްވިއިރު، އިންވެސްޓް ކުރުމާއި އެހެނިހެން ހިންގުމުގެ ހަރަދުތަކަށް 37.3 ބިލިއަން ޑޮލަރު ހަރަދު ހަރަދު ކުރި އެވެ. އެއީ ފުރަތަމަ ކުއާޓަރާ އަޅާ ބަލާއިރު 28 ޕަސެންޓް އިތުރު އަދަދެކެވެ.
އެމެޒޯން މަޝްހޫރު ވެފައި ވަނީ ފައިދާ އަށް ނުބަލައި، ވިޔަފާރި ފުޅާކުރަން އިންވެސްޓް ކުރާ ކުންފުންޏެއްގެ ގޮތުގަ އެވެ. އެގޮތުން ހޯލް ފުޑް ސްޕަމާކެޓް ޗެއިން 13.7 ބިލިއަން ޑޮލަރަށް ގަތުމަށް އެމެޒޯން އިން މިހާރު ވަނީ ތައްޔާރުވެފަ އެވެ.
ޕްރައިމްޓައިމްގެ ނަމުގައި އެމެޒޯން އިން އަންނަނީ މުޅިން އާ ވީޑިއޯ ޕްލެޓްފޯމެއް ތައްޔާރު ކުރަމުންނެވެ. އަދި ފޭސްބުކް މެސެންޖާ އާއި ވަޓްސްއެޕާ ވާދަކުރަން އެނީޓައިމްގެ ނަމުގާ މެސެޖިން އެޕްލިކޭޝަނެއް ވެސް އަންނަނީ ހަދަމުންނެވެ.
އެމެޒޯންގެ ފައިދާ ދަށްވި އިރު ދުނިޔޭގެ އެންމެ މުއްސަނދި މީހާގެ ގޮތުގައި އިއްޔެގެ ނިޔަލަށް ހުރީ އެ ކުންފުނީގެ ސީއީއޯ ޖެފް ބޭޒޯ އެވެ. ނަމަވެސް ދެ ވަނަ ކުއާޓަރުގެ ތަފާސްހިސާބުތައް އާންމު ކުރުމާ އެކު، އެމެޒޯން ހިއްސާގެ އަގު ތިން ޕަސެންޓް ދަށްވުމުން، މިހާރު އެންމެ މުއްސަނދި މީހާ އަކީ ކުރިން ވެސް އެ މަގާމުގައި ހުރި މައިކްރޯސޮފްޓުގެ ބާނީ ބިލް ގޭޓްސް އެވެ.