04 އޯގަސްޓް 2017 - 10:10
އެފްއޭއެމުން ރާވައި ހިންގާ ފުޓްބޯޅަ މުބާރާތްތަކަށް ބަދަލު ގެންނާނީ ކަމާ ބެހޭ ހުރިހާ ފަރާތްތަކެއްްގެ ލަފާ ހޯދުމަށް ފަހު ކަމަށް އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވެއްޖެ އެވެ.
ފާއިތުވި ތިން އަހަރު ވެސް ފުޓްބޯޅަ ފޯމެޓަށް ވަނީ އެކިއެކި ބަދަލުތައް ގެނެސްފަ އެވެ. އެކަމު އޭގެ ތެރެއިން އެންމެ ބޮޑު ބަދަލެއް ގެނައީ މި އަހަރު އެވެ. އެއީ ފުރަތަމަ ޑިވިޝަނުގެ އަށް ޓީމު ވާދަކުރާ ލީގާއި ޕްރިމިއާ ލީގު ވަކިކޮށްލުމެވެ. އެއާ އެކު ޕްރިމިއާ ލީގުގައި ކުޅޭނީ ފުރަތަމަ ޑިވިޝަންގެ އަށް ޓީމު ކުޅޭ މާލޭ ލީގުގެ ގަދަ ހަތަރު ޓީމާއި މުޅި ރާއްޖެ އަށް ހުޅުވާލައިގެން ކުޅޭ މިނިވަން ޗެމްޕިއަންޝިޕްގެ ސެމީ ފައިނަލުން ޖާގަ ހޯދާ ހަތަރު ޓީމެވެ.
ފޯމެޓަށް ގެނައި އަނެއް ބަދަލަކީ މާލޭ ލީގުގެ ފުލަށް ދިޔަ ހަތަރު ޓީމާއި ދެ ވަނަ ޑިވިޝަންގެ ޗެމްޕިއަނާއި ރަނަރަޕް އަންނަ އަހަރުގެ މާލޭ ލީގުން ޖާގަ ހޯދަން މާލެ ލީގު ކޮލިފިކޭޝަނެއް ކުޅޭ ގޮތަށް ގެނައި ބަދަލެވެ. އެ މުބާރާތް މިހާރު ކެންސަލް ކޮށްފައިވަނީ ދެ ވަނަ ޑިވިޝަންގެ ޗެމްޕިއަންކަން ހޯދި ކްލަބް ޒެފްރޯލާއި ރަނަރަޕް ކުޑަހެންވޭރު ޔުނައިޓެޑް މާލީ ހާލަތު ހުރިގޮތުން ނުކުޅެން ނިންމުމުންނެވެ.
މީގެ ސަބަބުން މާލެ ލީގުގެ ގަދަ ހަތަރަކުން ޓީމުތަކުގެ ތެރެއިން ކްލަބް ވެލެންސިއާ ފިޔަވައި ދެން އޮތް އީގަލްސް، ޔުނައިޓެޑް ވިކްޓަރީ އަދި ވިކްޓަރީން ވަނީ ޓީމުގެ މުހިއްމު ކުޅުންތެރިން ޕްރިމިއާ ލީގުގެ ކްލަބްތަކަށް ދޫކޮށްލައި ސީޒަންގެ ބާކީ ބައި ނުކުޅެން ނިންމައިފަ އެވެ.
ފޯމެޓަށް ގެނައި މި ބަދަލުގެ ސަބަބުން ގިނަ ކުޅުންތެރިންތަކަކަށް ސީޒަން ނިމިފައިވާއިރު، ގިނަ ބަަޔަކު އަންނަނީ މި ފޯމެޓް އެންމެ ރަނގަޅު ނޫން ކަމަށް ބުނަމުންނެވެ.
މިކަމާ ގުޅޭގޮތުން ބައްސާމް "މިހާރަ"ށް ވިދާޅުވީ މިއީ ފެށުމެއް ކަމަށާއި ސީޒަނުގެ މެދުތެރެއިން މި ފަދަ ކަމެއް ދިމާވި ނަމަވެސް ސީޒަން ނިންމާފައި ހުރިހާ ކަމެއް ދިރާސާ ކުރާނެ ކަމަށެވެ.
"ރިވިއު ކޮމިޓީއެއް އެބައޮތް. ލީގާއި ކަޕްތައް ކުރިއަށްދާ ގޮތްތައް މި ކޮމިޓީން ވަރަށް ރަނގަޅަށް ދިރާސާ ކުރާނެ. އެއަށް ފަހު ޓެކްނިކަލް މީހުންގެ ލަފާ ހޯދަން އޮކްޓޫބަރު މަހު ބައްދަލުކުރާނަން،" ބައްސާމް ވިދާޅުވި އެވެ.
އޭނާ ވިދާޅުވީ އިތުރު ބަދަލެއް ގެންނަން ޖެހިއްޖެނަމަ އެކަން ވެސް ކުރާނެ ކަމަށާއި އެކަމަކު އެއީ މިކަމުގައި ޝާމިލުވާ ގިނަ ފަރާތްތަަކަކާ މަޝްވަރާ ކުރުމަށް ފަހު ކަމަށެވެ.
"އެންމެންގެ މަޝްވަރާ ހޯދާނަން. ޓީމުތަކުގެ ކޯޗުންނާއި ޓެކްނިކަލް މީހުން ހިމެނިގެން އެކަން ކުރާނީ. އަދި މި ބައްދަލުވުން ބާއްވާނީ އޭއެފްސީގެ ޓެކްނިކަލް ބޭފުޅުން ވެސް ހިމަނައިގެން،" ބައްސާމް ވިދާޅުވި އެވެ.
އެފްއޭއެމުން އަބަދުވެސް މަސައްކަތް ކުރާނީ ކުޅުންތެރިންނަށާއި ކްލަބްތަކަށް ގެއްލުން ނުވާ ގޮތަށް ކަމަށާއި ފުޓްބޯޅައިގެ ހިދުމަތްތައް ވީހާވެސް ފުޅާ ކުރުމަކީ ވަރަށް ބޮޑު އަމާޒެއް ކަމަށް ބައްސާމް ވަނީ ވިދާޅުވެފަ އެވެ.