07 އޯގަސްޓް 2017 - 14:25
ބޮލީވުޑްގެ މަޝްހޫރު އެކްޓަރު އާމިރް ހާނާއި އަންހެނުން ކިރަން ރާއޯ އަށް ސްވައިން ފްލޫ ޖެހިގެން ފަރުވާ ދޭން ފަށައިފި އެވެ.
އެންޑީޓީވީން ރިޕޯޓްކޮށްފައިވާ ގޮތުގައި ދެ މީހުންނަށް ފަރުވާ ދެނީ މުމްބާއީގައި އެ މީހުން ދިރިއުޅޭ ގޭގަ އެވެ. އާމިރަށް ސްވައިން ފްލޫ ޖެހިފައި މި ވަނީ އޭނާ މިހާރު ކުޅެމުން އަންނަ ފިލްމް "ތަގްސް އޮފް ހިންދުސްތާން" ގެ ޝޫޓިންގައި މޯލްޓާގައި އުޅެފައި އިންޑިއާ އަށް އެނބުރި ދިޔަތާ ދުވަސްކޮޅެއް ފަހުންނެވެ.
އާމިރްގެ ފައުންޑޭޝަން ޕާނީން އިންތިޒާމްކޮށްގެން ބާއްވާ "ސަތިއަމޭވް ޖަޔަތޭ ވޯޓަ ކަޕް 2017" ގެ ރަސްމިއްޔާތުގައި އިއްޔެ ވީޑިއޯ ކޮންފަރެންސް މެދުވެރިކޮށް އޭނާ ބުނީ އެ ހަފުލާ އަށް ހާޒިރު ނުވެވުނީ ސްވައިން ފްލޫ ޖެހިގެން ކަމަށެވެ.
"އެހެންވެ މި ދަނޑިވަޅުގައި ބޭރުތެރެއަށް ނިކުމެ އެއްވެސް އިވެންޓެއްގައި ބައިވެރިވެވޭކަށް ނެތް،" އަންނަ އޮކްޓޯބަރުގައި ރިލީޒް ކުރާ "ސީކްރެޓް ސްޕަސްޓާ" ގެ އެކްޓަރު ބުންޏެވެ. "އަހަރެމެންގެ އެންޖީއޯގެ އަހަރުގެ އެންމެ ހާއްސަ ހަފުލާގައި ބައިވެރި ނުވެވުނީތީ ވަރަށް ހިތާމަ ވެސް ކުރަން."
އާމިރަށް އެ ރަސްމިއްޔާތަށް ނުދެވުނު ނަމަވެސް އޭނާގެ ފަރާތުން ޝާހްރުކް ހާން ހަފުލާގައި ބައިވެރިވި އެވެ.
ޕާނީ ފައުންޑޭޝަންއަކީ އިންޑިއާ އަށް ދިމާވެފައިވާ ސާފު ބޯފެނުގެ މައްސަލަ އަށް ހޭލުންތެރިކަން އުފައްދަން އާމިރާއި ކިރަން ގުޅިގެން އުފައްދާފައިވާ ޖަމިއްޔާއެކެވެ.
ރިޕޯޓްތައް ބުނާ ގޮތުން ކިރަން އަށް ސްވައިން ފްލޫ ޖެހުނީ އާމިރު އެ ބައްޔަށް ޕޮޒިޓިވްވެގެން އުޅެނިކޮށެވެ.