21 އޯގަސްޓް 2017 - 06:08
ސްމާޓްފޯން ބޭނުންކުރާ ކޮންމެ މީހަކަށް މި ފަހަރު އަށެއް ލިބޭނެ އެވެ. އައިފޯން ބޭނުންކުރާ މީހުންނަށް، އައިފޯން 8 އެވެ. ގެލަކްސީ ނޯޓަށް ސަޕޯޓްކުރާ މީހުންނަށް، ނޯޓް8 އެވެ. ސެމްސަންގް ގެލަކްސީ އެސް8 އަދި ވާވޭ އޮނާ ނޯޓް 8 އަށް ވެސް ވަފާތެރިން އެބަ ތިއްބެވެ.
މި އޮތީ ނޮކިޔާ 8 އެވެ. ސްމާޓްފޯނުން އަށެއް އެޅުމުގައި ނޮކިޔާ ތަންކޮޅެއް ލަސްވެއްޖެ އެވެ. އެހެން ނޫން ނަމަ ވާދަވެރިންނަށް ވުރެ ކުލަގަދަ އަށެއް އަޅާ ކުންފުންޏަކަށް ނޮކިޔާ ވާނެ އެވެ.
ނޮކިޔާ އަކީ މަގުބޫލް ނަމެކެވެ. އެއް ޒަމާނެއްގައި ރަސްގެފާނެވެ. އެއިރު އެކަމަކު ވާދަވެރިންގެ ފޯނުތައް ސްމާޓެއް ނޫނެވެ. އެކަމަކު ވެސް ނޮކިޔާ ފޯނުތައް ސްމާޓެވެ. ވާދަވެރިންނާ އެއް ސަފެއްގައި ނޮކިޔާ އަށް ހިފަހައްޓައި ނުލެވުނީ، އެ ނޫން ވަރުގެ ބަޔަކު ނެތް ކަމަށް ގަބޫލުކުރެވުމުންނެވެ.
އެޕަލް އިން އައިފޯނު އުފައްދައި، ނޮކިޔާ ގުޅައަކަށް ޖެހި އެވެ. ނޮކިޔާ އަށް ތަދު އިހުސާސްކުރެވުނީ މާ ފަހުންނެވެ. ކުންފުނި ކޮޅަށްޖަހަން ދިމާކުރި ވަގުތު މެދުވެރިވީ، އެންޑްރޮއިޑް ފޯނުތައް ފަހަތުން މީހުން ދުއްވައިގަތް ވަގުތާ އެވެ. އަނެއްކާ ވެސް ބަނޑުވަތަށް ނޮކިޔާ ވެއްޓުނީ އެވެ.
ނޮކިޔާ ކުރި އެއްވެސް މަސައްކަތަކުން، މި ތާރީޚާ ހަމަ އަށް، ދެމެހެއްޓެނިވި ކުރިއެރުމެއް ނުލިބެ އެވެ. އެންޑްރޮއިޑް ދެކެ އަރައިގަތް ރުޅީގައި، އެންޑްރޮއިޑް ފޯނު އުފައްދާކަށް ބޭނުމެއް ނުވި އެވެ. ސެމްސަންގް ދެމިގަތް ހިސާބަކީ މިއީ އެވެ.
ނޮކިޔާ 8 އެންޑްރޮއިޑުން ހިންގަން ފަށާއިރު، އެންޑްރޮއިޑް މާކެޓަށް ނޮކިޔާ ވަނުން ވަރަށް ލަސްވެއްޖެ އެވެ. ސްމާޓްފޯން ބޭނުންކުރާ މީހުންގެ ތެރޭގައި މިހާރު ތިބީ އެންޑްރޮއިޑަށް ލޯބިކުރާ މީހުންނާއި އައިފޯނަށް ވަފާތެރިންނެވެ.
ނޮކިޔާ 8 އަކީ އެންޑްރޮއިޑް ފޯނެކެވެ. މި ފޯނު ތައާރުފުކުރަނީ އެންޑްއިޑް 7.1.1 "ނޫގެޓް" އިންނެވެ. ފޯނުގެ ސްކްރީންގަައި، ގޮރިއްލާ ގްލާސް 5 އެވެ.
ނޮކިޔާ ހާޑްވެއާ ބޭނުންކުރަން އެދޭ މީހުން އަދި ވެސް ތިބޭނެ އެވެ. އެކަމަކު ވެސް އެންޑްރޮއިޑް ފޯނެއް ނެތުމުން، ނޮކިޔާ އަށް ބަޔަކު އެ ސަޕޯޓެއް ނުދެ އެވެ. އެހެން ނަމަވެސް، ނޮކިޔާ 8 އާންމުވާ ހިސާބުން، އެ ނަމުގެ ފަހަތަށް ވެސް "އަށެއް" އިތުރުވީ އެވެ.