29 ޖޫން 2016 - 01:27
އިސްތަންބޫލް (ޖޫން 29) - ތުރުކީގެ އިސްތަންބޫލްގެ އަތާތުރުކް އެއާޕޯޓަށް މިރޭ ދިން ޖާނުންފިދާވުމުގެ ބޮމުގެ ދެ ހަމަލާގައި މިހާތަނަށް 10 މީހުން މަރުވެފައިވާ ކަމަށް އެ ގައުމުގެ ޖަސްޓިސް މިނިސްޓަރު ބެކިރު ބޮޒްދާގު ވިދާޅުވެއްޖެ އެވެ.
ޖާނުންފިދާވުމުގެ ހަމަލާދީފައި ވަނީ އެއާޕޯޓުގެ އިންޓަނޭޝަނަލް ޑިޕާޗާ އޭރިޔާ އިން ކަމަށް ރިޕޯޓްތައް ބުނެ އެވެ. އަދި އެއާޕޯޓުގެ ކާރު ޕާކިން އޭރިޔާ އިން ބަޑީގެ ހަމަލާތަކެއް ވެސް ވަނީ ދީފަ އެވެ. ރައްދުގައި އެއާޕޯޓުގައި ތިބި ފުލުހުން ވެސް ހަމަލާ ދިން ކަމަށް ރޮއިޓާސް ނިއުސް އެޖެންސީން ބުންޏެވެ.
ތުރުކީގެ ދާޚިލީ ވުޒާރާ އިން ބުނީ ހަމަލާގައި ވަރަށް ގިނަ މީހުން ޒަޚަމްވެފައިވާ ކަމަށެވެ. ނަމަވެސް އަދަދެއް ހާމަކޮށްފައެއް ނުވެ އެވެ. ބައެއް ރިޕޯޓްތައް ބުނާ ގޮތުގައި ވިއްސަށް ވުރެ ގިނަ މީހުން ވަނީ ޒަޚަމްވެފަ އެވެ.
އަތާތުރުކް އެއާޕޯޓަކީ ތުރުކީގެ އެންމެ ބޮޑު އެއާޕޯޓެވެ. އަދި އެއީ ދުނިޔޭގައި ވެސް އެންމެ ބިޒީ އެއް އެއާޕޯޓެވެ. މި އެއާޕޯޓް މިދިޔަ އަހަރު ވަނީ 61 މިލިއަން މީހުން ބޭނުންކޮށްފަ އެވެ.
އެއާޕޯޓުގައި އެމްބިއުލެންސާއި ފަޔާ ޓްރަކްތައް ހަރަކާތްތެރިވާ މަންޒަރުތައް ތުރުކީގެ ޓީވީ ޗެނަލްތަކުން ދައްކައިފައިވެ އެވެ. ހަމަލާއާ ގުޅިގެން އެއާޕޯޓް މިހާރު ވަނީ ބަންދުކޮށްފަ އެވެ.
ވޭތުވެދިޔަ އަހަރު ތުރުކީ އަށް ވަނީ ބޮމުގެ ވަރަށް ގިނަ ހަމަލާތަކާ ކުރިމަތިލާން ޖެހިފަ އެވެ. މި ހަމަލާތަކުގެ ފަހަތުގައި ވަނީ އިސްލާމިކް ސްޓޭޓް (އައިއެސް) އާއި ކުރުދީ ހަނގުރާމަވެރިން ކަމަށް ތުރުކީ ސަރުކާރުން ތުހުމަތު ކުރެ އެވެ. ނަމަވެސް އެންމެ ފަހުން މި ދިން ހަމަލާގެ ޒިންމާ އެއްވެސް ބަޔަކު އުފުލައިފައެއް ނުވެ އެވެ.
އަންކަރާގެ ބަސް ސްޓޮޕެއްގައި ކާރު ބޮމެއް ގޮއްވާލައިގެން މިދިޔަ މާޗް މަހު ވަނީ 37 މީހުން މަރާލައިފަ އެވެ. އޭގެ ހަފުތާއެއް ފަހުން އިސްތަންބޫލްގެ މަގެއްގައި އައިއެސް އިން ދިން ޖާނުންފިދާވުމުގެ ހަމަލާއެއްގައި ހަތަރު މީހުން ވަނީ މަރުވެފަ އެވެ. އަދި އޭގެ މަހެއް ފަހުން އަންކަރާގެ އަސްކަރީ ވެހިކަލެއް ގޮއްވާލައިގެން 28 މީހުން ވަނީ މަރާލައިފަ އެވެ. އިސްތަންބޫލްގައި ޖެނުއަރީ މަހު ދިން ޖާނުންފިދާވުމުގެ ހަމަލާއެއްގައި ވަނީ ޖަރުމަނުގެ 10 ޓޫރިސްޓުން މަރާލައިފަ އެވެ. މި ހަމަލާގެ ޒިންމާ ތުރުކީން އަޅުވާފައި ވަނީ އައިއެސްގެ ބޮލުގަ އެވެ.