30 އޯގަސްޓް 2017 - 14:55
މޮނާކޯ (އޮގަސްޓް 30) – ފްރާންސުގެ ޗެމްޕިއަން މޮނާކޯ އިން ފޯވާޑް ލައިން ވަރުގަދަކުރުމަށްޓަކައި ލާޒިއޯގެ ސެނެގާލް ފޯވާޑް ކެއިޓާ ބާލްޑޭ ޑިއާއޯ އާއި އިންޓަގެ މޮންޓެނީގްރޯ ފޯވާޑް ސްޓެވަން ޖޮވެޓިޗް ގެނެސްފި އެވެ.
މޮނާކޯ އިން ދެ ފޯވާޑުން ލައްވާ ސޮއިކުރުވީ އެ ޓީމުގެ އުއްމީދީ ފޯވާޑް ކީލިއަން އެމްބާޕޭ ޕީއެސްޖީ އަށް ބަދަލުވާން އުޅޭ ކަމަށް އަޑުފެތުރިފައިވަނިކޮށެވެ. އެކަމަށް ބާރު ލިބެނީ އެމްޕާބޭގެ 10 ނަމްބަރު ޖާޒީގައި ޖޮވެޓިޗް ނަގާފައިވާ ފޮޓޯތަކެއް އިންޓަނެޓަށް ލީކްވުމުންނެވެ.
އުމުރުން 22 އަހަރުގެ ކެއިޓާ ބާލްޑޭ ގަތުމަށް ޔުވެންޓަސް އާއި އިންޓަ އާއި އޭސީ މިލާނުން ވަރަށް ބޮޑަށް މަސައްކަތްކުރި އެވެ. މޮނާކޯ އިން އޭނާ ގަތީ 30 މިލިއަން ޔޫރޯ އަށެވެ.
ސްޕެއިނަށް އުފަން އަދި ބާސެލޯނާގެ ޔޫތު އެކަޑަމީން ތަމްރީންވި ކެއިޓާ ބާލްޑޭ ވަނީ މިދިޔަ ސީޒަނުގައި 16 ލަނޑު ޖަހައިފަ އެވެ. އޭނާ އަކީ ސެންޓަ ފޯވާޑްގެ މަގާމުގެ އިތުރުން ވިންގަށް ވެސް ކުޅެވޭ ކުޅުންތެރިއެކެވެ.
އުމުރުން 27 އަހަރުގެ ޖޮވެޓިޗް މިދިޔަ ސީޒަނުގައި ކުޅުނީ އިންޓަގެ ލޯނެއްގެ ދަށުން ސްޕެއިނުގެ ސެވިއްޔާ އަށެވެ. އޭނާ ވަނީ އޭގެ ކުރިން ފިއޮރެންޓީނާ އާއި މެންޗެސްޓާ ސިޓީ އަށް ވެސް ކުޅެފަ އެވެ. އޭނާ ވަނީ މޮންޓެނީގްރޯ ގައުމީ ޓީމަށް 46 މެޗުން 23 ގޯލް ޖަހައިދީފަ އެވެ.
މިދިޔަ ސީޒަނުގެ ފްރާންސް ޗެމްޕިއަންކަން ހޯދައި ޗެމްޕިއަންސް ލީގުގެ ކުއާޓާ ފައިނަލުގައި ކުޅުނު މޮނާކޯގެ ބައެއް ތަރިން ވަނީ ވިއްކާލައިފަ އެވެ. އެއީ މެންޗެސްޓާ ސިޓީ އަށް ވިއްކާލި ބެނާޑޯ ސިލްވާ އާއި ބެންޔަމިން މެންޑީ އަދި ޗެލްސީއާ ގުޅުނު ޓިމޮއޫ ބަކަޔޯކޯ އެވެ.