30 ޖޫން 2016 - 10:18
ލަންޑަން (ޖޫން 30) - އިންގްލެންޑުގެ ސީނިއާ ގައުމީ ޓީމާ ހަވާލުވުމުގެ އެއްވެސް ޝައުގެއް އެ ގައުމުގެ 21 އަހަރުން ދަށުގެ ޓީމުގެ ކޯޗު ގަރެތު ސައުތުގޭޓުގެ ނެތް ކަމަށް އިނގިރޭސި މީޑިއާ އިން ބުނެފި އެވެ.
ޔޫރޯގެ ދެ ވަނަ ބުރުން އައިސްލެންޑް އަތުން ބަލިވެ އިންގްލެންޑް ކެޓުމާ އެކު ގައުމީ ކޯޗުކަމުން ރޯއީ ހޮޖްސަން އިސްތިއުފާ ދީފައިވާއިރު އެފްއޭ އިން އަންނަނީ އާ ކޯޗެއް ހޯދުމުގެ މަސައްކަތްކުރަމުންނެވެ. އަދި ދާއިމީ ކޯޗެއް ހޯދަން ވަގުތު ނަގާނެތީ، އެފްއޭ އިން ވިސްނަނީ ވަގުތީ ކޯޗަކަށް ސައުތުގޭޓް ހަމަޖައްސާށެވެ.
އިނގިރޭސި ނޫސްތަކުން ބުނީ ގައުމީ ޓީމާ ހަވާލުވުމުގެ އެއްވެސް ވިސްނުމެއް ސައުތުގޭޓްގެ ނެތް ކަމަށާއި ވަގުތީ ގޮތުން ވެސް އެ މަގާމާ ހަވާލުވާން އޭނާ ބޭނުންނުވާ ކަމަށެވެ.
އެފްއޭ އިން އަދި ސައުތުގޭޓާ އެއްވެސް ވަރަކަށް މަޝްވަރާކޮށްފައެއް ނުވެ އެވެ. އެކަމަކު މީޑިއާއާ ވާހަކަދައްކަމުން އެފްއޭގެ ޗީފް އެގްޒެކެޓިވް މާޓިން ގްލެން ވިދާޅުވީ ވަގުތީ ކޯޗަކަށް ބަލާއިރު އެންމެ ފުރުސަތު ބޮޑީ ސައުތުގޭޓް ކަމަށެވެ.
މީގެ އިތުރުން ޕްރިމިއާ ލީގުގެ ވެސްޓްހޭމް ޔުނައިޓެޑުގެ ކޯޗު ސްލަވެން ބިލިޗަކީ ވެސް އިނގިރޭސި އެފްއޭގެ ލިސްޓުގައި އޮތް ކޯޗެކެވެ. އެކަމަކު އެ ޓީމުގެ ޗެއާމަން ޑޭވިޑް ގޯލްޑް ވިދާޅުވީ އިންގްލެންޑާ ހަވާލުވުމުގެ އެއްވެސް ޝައުގެއް ކްރޮއޭޝިއާގެ ކުރީގެ ބިލިޗްގެ ނުހުންނާނެ ކަމަށެވެ.