24 ސެޕްޓެމްބަރ 2017 - 06:03
ބުދަ ދުވަހާ ގުޅޭ
އަހަރެން ދިޔައީ ސިއްސައިގެންނެވެ. އެލީނާ ފާޚާނާއަކަށް ނުވަދެއެވެ. އޭނަ ހުރީ އަހަރެން ކުރާ ކަންތައް ބަލާށެވެ. އަހަރެން އިސްޖަހައިލަމުން މޭޒުމަތީގައި ފޯނު ބޭއްވީމެވެ. ދެން އިވުނީ އެލީނާ ރޮއިގަތް އަޑެވެ. އަހަންނަށް ވެސް ރޮވުނީއެވެ. އަހަންނަކީ ޙަޤީޤަތަކާ ކުރިމަތިލާން ނުކެރިގެން ފިލަން ދުވި ފިނޑި މީހެކެވެ.
"ފުރަތަމަ ފެނުނު ފަހަރު ވެސް އަހަންނަށް އެނގުނު ތީ ކާކުކަން،" އެލީނާ ގިސްލަމުން ބުންޏެވެ. "އަހަރެންގެ މޫނު ފެނުނީމަ ވެސް ނޭނގުނުތަ އަހަރެންމީ ކާކުކަމެއް؟"
އަހަރެންގެ އަނގަ ހުޅުވައިލަން ވަގުތުކޮޅެއް ނެގިއެވެ. ދޫ ޚަރަކާތްކުރަން އިތުރު ވަގުތު ނެގިއެވެ. ބުނާނީ ކީކޭތޯ ވިސްނަން ވެސް ވަރަށް ވަގުތު ނެގިއެވެ.
"އަހަރެން ހަމަ ހިތަށްއެރި ތި ވާނީ މަގޭ.." އެ ހިސާބަށް ބުނެފައި އަހަރެން ހުއްޓުންއެރިއެވެ.
"ދަރިފުޅަށޭ.. ދަރިފުޅަށޭ.. ބުނެބަލަ އެހެން،" އެލީނާ ރޮމުން އައިސް އަހަރެންގެ އުނގަށްއެރިއެވެ. "ކިހާ ދުވަހެއް ވެއްޖެ ބައްޕަ ހޯދާތާ!"
އަހަރެން އިނީ ބުނާނެ އެއްޗެއް ނޭނގިފައެވެ. އެލީނާއަކީ އޭނަގެ މަންމަގެ ފޮޓޯކޮޕީއެކެވެ. ފެނުނު ފުރަތަމަ ފަހަރު އެ ލޮލާއި، މޫނާއި، އިސްތަށިގަނޑުން އަހަރެންގެ ހިތުގައި އުފެއްދި ބިންހެލުމަކީ އެއީއެވެ. ހިތް ބުންޏެވެ. އެ މޫނު އަހަރެން ދަންނަމެވެ. ކިހިނެއް ހެއްޔެވެ؟ ނުލިބުނީ އެ ސުވާލުގެ ޖަވާބެވެ. ހަނދާންތައް އެނބުރިއައީ އެ ރޭ ނިދަންއޮއްވައެވެ. އެލީނާއަށް ލިބިފައިވަނީ ޖޭންގެ މޫނެވެ. ޖޭންއަކީ ބެންކޮކުން އަހަންނާ ދިމާވި އަންހެނެކެވެ.
"ބައްޕަ އެހެން ބުނާ އަޑު އަހާހިތުން ހުރެހުރެ އަހަރެން ވާޅުވެއްޖެ!" އެލީނާގެ ޝަކުވާތަކަށް ހުއްޓުމެއް ނައެވެ. "މިހާ ދުވަސްވަންދެން ކޮންތާކު ތި އުޅުނީ؟"
އަހަރެންގެ ދަރިއަކަށް ޖޭން ބަނޑުބޮޑުކަން އެނގުމުން އަހަރެން ފިލީއެވެ. ހުރިހައި ގުޅުމެއް ކަނޑައިލީއެވެ. ދުނިޔޭގެ ލަދާއި ޢާއިލާގެ ޤަދަރަށް ޓަކައެވެ. އެއީ އަހަރެންގެ މޮޔަކަމެވެ. ރަޙުމުކުޑަ ކަމެވެ. އަހަރެންގެ އުނގުގައި އޮވެގެން އެލީނާ ރުއިއިރު ވެސް، ކުޑަމިނުން ހުއްޓައިލާށޭ ބުނާކަށް ވެސް ނުކެރުނެވެ. ކުށް އިހުސާސްކުރެވުމުން އަހަރެން އިތުރަށް ފިނިވީއެވެ.
"މަންމަގެ ހާލު ކިހިނެއް؟" އަހަރެން ސުވާލުކުރީމެވެ.
"ރަނގަޅު،" އެލީނާ ޖަވާބުގައި ބުންޏެވެ. "ބައްޕަގެ ފޮޓޯ ފޮނުވީމަ ވަރަށް އުފާވެފަ ހުރީ. ބުނީ ބުނާށޯ ވަރަށް ފަލަޔޯ!"
އަހަރެންގެ ހިނިގަނޑު ފަޅައިގެންދިޔައެވެ. އެލީނާ ވެސް ހީނގަތެވެ. އަހަރެން ހަމަޔަކަށްއެޅުނީ އެ ހިސާބުންނެވެ. ހެމުންހެމުން އަހަރެން ރޯން ފެށީމެވެ. އެލީނާ ގައިގައި ވަރަށް ބާރަށް ބައްދައިލީމެވެ.
ޖޭންއަކީ ޝަކުވާކުރަން ދަންނަ މީހެއް ނޫނެވެ. ކެތްތެރި، އެހާމެ ކިޔަމަންތެރި އަންހެނެކެވެ. ޖޭންއަށް އަހަރެން ތަޢާރުފުކޮށްދިނީ އަހަރެންގެ އެކުވެރިންނެވެ. އަހަންނާއި ޖޭން އެކުގައި ތިން ދުވަސް ހޭދަކުރީމެވެ. ރާއްޖެއިން ބޭރުގައި އުޅޭއިރު ދަތުރުބައިވެރިޔަކު ހޯދުމަކީ އަހަރެންގެ އެކުވެރިން ކޮށްއުޅުނު ކަމެކެވެ. އަހަރެން އެ ކަން ކުރީ އަލަށެވެ. އެކުވެރިންގެ ބަހަށް އަހަންނަށް މާ ބޮޑަށް ހެއްލެވުނީއެވެ. އެ މީހުން ބުނި ފަދައިން އަހަރެން ވެސް ހީކުރީ، ބެންކޮކުން ފުރުމުން އެ ގުޅުން ވެސް ކެނޑޭނެކަމަށެވެ. އެ މީހުން ބުނި ގޮތް ހެދުނު ނަމަ އެ ކަން އެހެން ވީހެވެ. ޒާތީ ވާހަކަ ޖޭންއަށް ކިޔައިނުދިނުމަށާއި، އަހަރެންގެ އަމިއްލަ މަޢުލޫމާތު ވެސް ނުދިނުމަށް އެކުވެރިން ބުންޏެވެ. އެއްބަސްވެފައި ވެސް އެ ބަހުގައި އަހަންނަށް ނުހިފޭއްޓުނީއެވެ. އަހަރެން މާލެއައިތާ ދެތިން މަސް ފަހުން ލިބުނީ ޖޭންގެ ސިޓީއެކެވެ. އޭގައި އޮތް ޚަބަރު ކިޔައިފައި އަހަރެން ގަތީ ބިރެވެ. އެ ޒިންމާ ބޮލުގައިއަޅަން އޭރު އަހަރެން ތައްޔާރެއް ނޫނެވެ.
"އެނގޭ އުނދަގޫވާނެކަން،" އަހަރެން ބުނީމެވެ. "އެހެންވިޔަސް ބައްޕައަށް މާފުކުރޭ! ދެން ހުއްޓާލާ! މާޒީ އަނބުރައެއް ނުގެނެވޭނެ އެކަމަކު މުސްތަޤުބަލު މި ހިސާބުން މި ބަދަލުވީ. ދެން ދަރިފުޅު ހުންނާނީ މާލޭގަ. އަހަރެންގެ ލޮލަށް ފެންނަ ހިސާބުގަ."
އަހަރެންގެ މޫނަށް އެލީނާ ވަރަށް ފަރުވާތެރިކަމާއެކުގައި ބަލައިލިއެވެ. އޭނަ ހޯދީ ކޯޗެއްކަން އަހަންނަށް އެނގެއެވެ. އެއީ ލޯބި ފިޔަވައި ދެވަނަ އެހެން އެއްޗެއް ނޫނެވެ. އެ ވަގުތު ވަރަށް ބޯކޮށް ވާރޭވެހެން ފެށިއެވެ. އަހަރެންގެ އުނގުގައި އެލީނާ ރަނގަޅަށް ހަމަޖެހިލިއެވެ. އަހަރެންގެ ފަރާތުން އޭނަޔަށް ހިމާޔަތާއި ރައްކާތެރިކަން ލިބުނު ކަހަލައެވެ.
"އަހަރެން އަބަދުވެސް މަންމަ ގާތުގަ އަހަން، ބައްޕައަކީ ކޮންކަހަލަ މީހެއްހޭ؟" އެލީނާ މަޑުމަޑުން ބުންޏެވެ. "އެނގޭތަ؟ މަންމަ ދުވަހަކު ވެސް ބައްޕަ ގޯހެއް ނުކުރާނެ. ކުށްވެރިއެއް ވެސް ނުކުރާނެ. ބުނީ ބައްޕައަކީ ވަރަށް ރަނގަޅު މީހެކޭ. އެކަމަކު، ބައްޕައަށް ލިބުނު އެކުވެރިން ގޯހިއްޔޭ. ދެން އެ ވާހަކަ އިހަށް ބާއްވާފަ ހިނގާ ބޭރަށް ނުކުންނަމާ!"
"ބޯކޮށް ވެހިވެހިއޮއްވާ؟" އަހަރެން ބުނީމެވެ.
"ވަރަށް މަޖާވާނެ،" އެލީނާ ތެދުވަމުން ބުންޏެވެ. "މަގުމަތީގަ މީހުން ވަރަށް މަދުވާނެ. ހިނގާ އައިސްކްރީމް ކާން."
އެލީނާއަކީ ޒުވާން އަންހެންކުއްޖެކެވެ. އުޅެބޮޑުވީ އެހެން މާޙައުލެއްގައެވެ. އަހަރުމެން ދެ މީހުންގެ ވިސްނުން އެއްގޮތެއް ނުވާނެއެވެ. އެ ކަން އަހަރެން ގަބޫލުކުރަން ޖެހޭނެއެވެ. އެކަމަކު އަހަންނަކީ އޭނަގެ ބައްޕައެވެ. އެލީނާއަށް އެއްވެސް ކަމެއް ނުކޮށްދެވުނު ބަދުނަސީބު ބައްޕައެވެ. އައިސްކިރިމެއް ގަނެދޭން ބުނުމުގެ ޙައްޤު އޭނައަށް އޮންނަން ޖެހޭނެއެވެ. އަހަރެން ގަނެދޭން ވެސް ޖެހޭނެއެވެ. އަހަރެން ތެދުވީމެވެ. ވާހަކަދައްކަމުން އަހަރުމެން ދެމީހުން ގަރާޖަށް ވަނީމެވެ. މީހަކު ބަލާތޯ ނުވަތަ މީހަކަށް ފެނޭތޯއެއް އަހަރެންނެއް ނުބަލަމެވެ. ފެނުނަސް ހެވެވެ. ކާރު ނެރުނީމެވެ. އެލީނާ އެރީ ކުރީ ސީޓަށެވެ. އަހަންނަށް ވިސްނުނެވެ. އެލީނާގެ ބޭނުމަކީ އެ ވާރޭގެ ތެރޭގައި، އެ ގަޑީގައި ކޮންމެހެން އައިސްކިރިމު ކެއުމެއް ނޫނެވެ. ބޭނުމަކީ އަހަރެންގެ ހިތްވަރު ވަޒަން ކުރާށެވެ. މުސްތަޤުބަލު ބަދަލުކުރުމުގެ ހިތްވަރު އަހަރެންގެ ހުރިތޯ ބަލާށެވެ.
"މި ގަޑީގަ ތަންތަން ހުޅުވާފަތަ ހުންނާނީ؟" އެލީނާ އެހިއެވެ.
"ބަންދުކޮށްފަ ހުއްޓަސް ބައްޕައަށް ހުޅުވޭނެ،" ޔަގީންކަމާ އެކުގައި އަހަރެން ބުނީމެވެ. "އެލީނާ އައިސްކްރީމް ކާން ބޭނުމެއްނު. ލިބެންޖެހޭނީ."
އޭނަގެ މޫނުމަތިން ފެނުނީ އުފާވެރިކަމެވެ. އަހަރެން ބަދަލުވެއްޖެކަން އެލީނާއަށް ޔަގީންވިއެވެ. މާލޭގައި އެންމެ ފަހުން ހުޅުވި އައިސްކިރިމު ވިއްކާ ތަނާ އަރާ ހަމަވިއިރު އެ ތަން ލައްޕަނީއެވެ. އަހަރެން ކާރު މަޑުކޮށްލީމެވެ. އެ ތަނަކީ، އަހަރެން އަތުން ލޯނު ނަގައިގެން ޖަލީލު ހުޅުވި ތަނެކެވެ. ޖަލީލަކީ ރާނިޔާގެ ޅިޔަނެކެވެ. ތަނުގެ އެތެރޭގައި އޭނަ ހުއްޓެވެ. އަހަރެން ފެނުމުން އޭނަ ދުވެފައި ކަހަލަ ގޮތަކަށް އައެވެ. އަހަރެން ކާރުން ފޭބީމެވެ. އެލީނާގެ އަތުގައި ހިފައިގެން ހިނގައިގަތީމެވެ. ޖަލީލު ދޮރު ހުޅުވިއެވެ.
"ލައްޕަނީތަ؟" އަހަރެން އެހީމެވެ.
"ވިޔަފާރި ބަންދު އެކަމަކު އަމީން މި ތަނުން ނުކުތްއިރަކުން ދެން ތަން ބަންދުކުރާނީ. ކޯޗެއް ގެނެސްދޭންވީ؟" ޖަލީލު ވަރަށް އިހުތިރާމާ އެކުގައި އެހިއެވެ. "މިއަދު އެބަހުރި އާ ފްލޭވާތަކެއް ލިބިފަ. ރަހަބަލައިލަން ގެންނަންތަ؟"
"މަގޭ ދަރިފުޅާ ސުވާލުކުރޭ!" އިނގެރޭސިބަހުން އަހަރެން ބުނީމެވެ. "އެލީނާ ބޭނުން އެއްޗެއް ބުނޭ."
ޖަލީލު އެއްފަހަރު އެލީނާއަށް އަނެއް ފަހަރު އަހަރެންގެ މޫނަށް ބަލައިލިއެވެ. އޭނައަކަށް ގަބޫލެއް ނުކުރެވުނެވެ. އަހަރެން އެލީނާގެ ފޯނު ހުޅުވައިލައިފައި އަހަންނާއި ޖޭންގެ ފޮޓޯ ދައްކައިލީމެވެ.
"މީ އެލީނާގެ މަންމަ ޖޭން،" އަހަރެން ވާހަކަދެއްކީ އިނގެރޭސިބަހުންނެވެ. "ބެންކޮކުން ދިމާވި ކުއްޖެއް. އޭނަގެ ދަރިފުޅު މީ. ވަރަށް ވައްތަރު ދޯ؟"
ޖަލީލުގެ މޫނުމަތިން ފެނުނު ސަމާސައިގެ ކުލަވަރު ފިލައިގެންދިޔައެވެ. އަހަންނަށް އެނގެއެވެ. ހޫނުކޮށް ހުއްޓައި އެ ޚަބަރު ރާނިޔާއަށް ލިބޭނެއެވެ. ބޭނުމީ ވެސް އެ ގޮތެވެ. އަހަންނަށް ކުރެވުނީ ކުށެކެވެ. އެ ކަމަށްޓަކައި އަހަރެން ހިތާމަކުރަމެވެ. އެކަމަކު އެ ކުށުގެ އަދަބު އަހަރެންގެ ދަރިފުޅަށް ދޭކަށް ނުޖެހެއެވެ. އެލީނާ އޯޑަރުދިނެވެ. ޖަލީލު ދިޔަތާ މާ ގިނައިރެއް ނުވެ އަހަންނަށް ލިބެން ފެށީ މެސެޖުތަކެކެވެ.
"ފުރަތަމަ އަހަންނަށް ތި ކަން އެނގުނު ދުވަހު އުނދަގޫވި ވަރަކަށް މިހާރަކު އުނދަގުލެއް ނުވޭ،" ރާނިޔާ ލިޔެފައި އޮތެވެ. "އަހަރެން ހިތަށްއެރީ އަހަރެންދެކެ އަމީން ލޯބި ނުވާތީއޭ ތި ކަހަލަ ކަމެއް ކުރާނީ. އެކަމަކު ބުނިންތާ ވަރަށް ލޯބިވެޔޭ. ވެދާނެ ތީ މާ ބޮޑު ގަސްތެއް އޮވެގެން ކުރެވުނު ކަމެއް ނޫންކަމަށް ވެސް. އެކަމަކު، ލޯބިވާ ނަމަ ތި ވަރުގެ ކަމެއް ސިއްރެއް ނުކުރާނެ. އަހަންނަކަށް ނޭނގެ އަހަރެންގެ ނަންބަރު ޖޭން ހޯދީ ކިހިނެއްކަމެއް ވެސް. އޭނަ ބޭނުންވީ، ގާތުގަ ތި އިން ދަރިފުޅަށް ބައްޕަގެ ލޯބި ހޯދައިދޭން. އަހަންނަކީ މަންމައެއް. މައިލަގޮނޑިއަށް ކުރާ ބާރު އަހަންނަށް އިހުސާސް ކުރެވޭ. އެހެންވެ އެ ކަން ކޮށްދޭން ބޭނުންވީ. ވީކަމެއް އެ އޮތީ ވެފަތާ. އެކަމަކު، އެއް އިރެއްގައި ވެސް އަހަންނަކީ މާތް މީހެއް ނޫން. އަމީނަކަށް މާފެއް ނުކުރާނަން، ތި ދަރިފުޅު އަހަރެން ބަލައެއް ވެސް ނުގަންނާނަން. ބައި."
މެސެޖުތައް ކިޔައި ނިންމައިލައިފައި އަހަރެން އިސްއުފުލައިލިއިރު އެލީނާ އިނީ އަހަންނަށް ބަލަހައްޓައިގެންނެވެ. އަހަރެން ހިނިތުންވެލީމެވެ. ކަންތައް ވާނެ ގޮތް ބުނާކަށް އެކަކަށް ވެސް ނޭނގޭނެއެވެ. ކުރެވޭނީ އުންމީދެކެވެ. ރާނިޔާ ވީ އަހަރެން ހީކުރި ވަރަށް ވުރެ ރަނގަޅު އަންބަކަށެވެ. އޭނަ ދުލެއް ނުކުރާނަމެވެ. އެލީނާއަކީ ގެއްލިފައި ލިބުނު އަހަރެންގެ ދަރިފުޅެވެ. އޭނަޔަކާ ވަތްކެއް ވެސް ނުވާނަމެވެ. ކުރިޔަށް އޮތީ ބާނި ބިޔަ ކަނޑެކެވެ. ވައި ގަދަ މޫސުމެކެވެ. ޖެހޭނީ ކުރިމަތިލާށެވެ. ހަޔާތަކީ، ފަޅުގައި އަޅައިފައިއޮންނަ ދޯންޏެއް ނޫނެވެ. ހަޔާތަކީ ދަތުރެކެވެ. ތޫފާންތަކާ ކުރިމަތިވާނެއެވެ.
އެލީނާ ބަދަލުކުރީ އަހަރެންގެ ރިސޯޓުގެ އިސް މަޤާމަކަށެވެ. މާލެއަކަށް ނުގެންނަމެވެ. ރާނިޔާ މާލެއައެވެ. ދަރިންނާ އެކުގައި އޭނަ އުޅެނީ އަހަރެންގެ ގޭގައެވެ. އަހަރެންގެ އަންބެއް ގޮތުގައެވެ. އެލީނާގެ ނަން ކިޔަސް ރާނިޔާ ރުޅިއާދެއެވެ. އެކަމަކު ފަހުން ރަނގަޅުވާނެއެވެ. ރާނިޔާއަށް ވުރެ ރަނގަޅަށް ރާނިޔާގެ ގޮތް އަހަންނަށް އެނގެއެވެ. އެލީނާ މާލެއަށް ގެނެވޭނެއެވެ. ރާނިޔާގެ ރުހުން ވެސް ހޯދޭނެއެވެ. ދަރިން ވެސް ރުއްސާނަމެވެ. އެންމެނަށް އެއް ފުރާޅެއްގެ ދަށުގައި އުޅެވޭނެއެވެ. ވަގުތުނަގާނެއެވެ. އެހެންނަމަވެސް އެއީ ނުވާނެކަމެއް ނޫނެވެ. އަހަންނަށް ނުކުރެވޭނެކަމެއް ވެސް ނޫނެވެ.
ނިމުނީ