04 އޮކްޓޯބަރ 2017 - 06:17
ކޮޓަރިތެރޭގައި ދާވަށިގަނޑު ބެހެއްޓުމުން ތަންމަކުނު އާލާވުމަށް މަގުފަހިވާ ކަމަށް ދިރާސާ އަކުން ދައްކައިފި އެވެ. މިހެން ދިމާވަނީ ދާވެފައި ހުންނަ އަންނައުނަށް ތަންމަކުނު ގަޔާވާތީ އެވެ.
ފަހަކަށް އައިސް، ދުނިޔޭގެ އެކި ހިސާބުތަކުގައި ތަންމަކުނު ވަރަށް ބޮޑަށް ގިނަ ވެފައިވާ ކަމަށް ވަނީ ފާހަގަކުރެވިފަ އެވެ. މިކަމުގެ ސަބަބަކީ ދުނިޔޭގެ އެކި ހިސާބުތަކަށް މީހުންނަށް ފަސޭހައިން ފަތުރު ކުރެވޭނެ ގޮތް ތަނަވަސްވެފައި ވުމުން ކަމަށް ދިރާސާގައި ފާހަގަކޮށްފައިވެ އެވެ.
ތަންމަކުނަކީ މިހާރު ހޮޓާތަކުގެ ވެރިންނަށް ވެސް ބޮލުގެރިހުމަކަށް ވަނީ ވެފަ އެވެ. ސަބަބަކީ އެނދާއި ގޮދަޑި އަދި ބާލީސް ފަދަ އެއްޗެހީގައި މަކުނު އަޅައިފިކަން އެނގެނީ އެ އެއްޗެތި މީހުންގެ ގައިގައި ހަފަން ފެށުމުން ކަމަށް ވާތީ އެވެ.
ޔުނިވަސިޓީ އޮފް ޝެފީލްޑް އިން ކުރި ދިރާސާއިން ދައްކާ ގޮތުން ތަންމަކުނު އެންމެ ފަސޭހައިން އާލާވަނީ ދާވެފައި ހުންނަ އަންނައުނުގަ އެެވެ. ދުނިޔޭގެ އެކި ގައުމުތަކަށް މި މަކުނުތަކަށް އެހާ ފަސޭހައިން ދަތުރު ކުރެވެނީ ވެސް އެހެންވެ ކަމަށް ވެ އެވެ.
މި ދިރާސާގައި މަސައްކަތް ކުރެއްވި ޑރ. ވިލިއަމް ހެންޓްލޭ ވިދާޅުވީ، ނިދާ ތަނުގައި އަންނައުނު އެއްގޮތަކަށް ވެސް ނުބެހެއްޓުމަށެވެ.
"މިހާރަކަށް އައިސް ހޮޓާތަކާއި ގޭގޭގައި ތަންމަކުނު އަޅާ މިންވަރު އިތުރުވެގެން ގޮސް ހޮޓާތަކުގެ ވެރިންނަށާއި ގޭގޭގައި އުޅޭ މީހުންނަށް ވެސް މިކަން ވަނީ ވަރަށް ބޮޑު އުނދަގުލަކަށް ވެފައި. ޚާއްސަކޮށް ދުނިޔޭގެ ބޮޑެތި އަދި ކާރޫބާރޫ ބޮޑު ސިޓީތަކުގައި މިކަން ވަރަށް ބޮޑު މައްސަލައަކަށް ވަނީ ވެފައި،" އޭނާ ވިދާޅުވި އެވެ.
އޭނާ ވިދާޅުވި ގޮތުގައި ކޮޓަރިއެއްގައި ތަންމަކުނު އަޅައިފި ނަމަ އެ އެއްޗެއް ފިލުވާލުން ވަނީ ވަރަށް އުނދަގޫ ކަމަކަށެވެ. ނަތީޖާއަކަށް ވަނީ އަގުބޮޑު ފަރުނީޗަރާއި އަންނައުނުތައް އުކާލާފައި އާ އެއްޗެހި ހޯދަން ޖެހުމެވެ.
"އަހަރެމެން އިރުޝާދު މި ދެނީ ހޮޓަލުގައި ތިބޭ އިރުވެސް އަންނައުނު ދާވުމުން ރަނގަޅަށް ސީލް ކުރެވޭ ކަހަލަ ކޮތަޅުގައި ބަންދުކޮށްފައި ބަހައްޓަން. އޭރުން ހޮޓަލުގައި މަކުނު އުޅުނަސް ގެޔަށް ދާއިރު އެ އެއްޗެހި ގެޔަށް ނުގެންދެވުމުގެ ފުރުސަތު ބޮޑުވާނެ. އަދި މިއީ މަކުނުތައް އެހެން ހިސާބުތަކުގައި އާލާވުން ދުރުކޮށްދޭނެ ކަމެއް،" ޑރ. ވިލިއަމް ވިދާޅުވި އެވެ.
ދިރާސާއިން ދައްކާފައިވާ ގޮތުގައި އެއް ފަހަރު ލާފައި ހުންނަ އަންނައުނުގައި ވެސް އެމީހެއްގެ ގައިގެ ވަސް އަހަރެއްހާ ދުވަހު ހުންނާނެ އެވެ. މިފަދަ އަންނައުނު ނުދޮވެ ފޮއްޓަށް ލާފައި ރަނގަޅަށް މަތި ނުޖަހާ ބަހައްޓައިފި ނަމަ އެއީ ކިތަންމެ މަދުން ތަންމަކުނު އުޅޭ ތަނަކަށް ވިޔަސް އެ ވަހަށް މަކުނު އަންނާނެ ކަމަށް ދިރާސާގައި ބުނެފައިވެ އެވެ.
ތަންމަކުނުގެ އުނދަގޫ ދުނިޔެއަށް އެންމެ ބޮޑުވީ 1980 އާއި 1990 ގެ އަހަރު ތަކުގަ އެވެ. އޭގެ ފަހުން ވަރަށް ބޮޑަށް މައިތިރިވެފައި އޮތުމަށްފަހު މިހާރު އަނެއްކާވެސް މަކުނުގެ އުނދަގޫ ވަރަށް ބޮޑުވެފައިވާ ކަމަށްވެއެވެ.
ކޮޓަރީގައި އެއްވެސް ވަރަކަށް ތަންމަކުނު އުޅޭ ކަން އެންމެ ފަސޭހައިން އެނގޭނީ ގޮދަޑި އާއި ބާލީސް ފަދަ އެއްޗެހީގެ ކަން ބެލުމުންނެވެ. ފަތްޖެހިފައި ހުންނަ ހިސާބުގައި އެއްވެސް ވަރަކަށް މަކުނު އުޅޭ ނަމަ ކަޅުކުލައިގެ ކުދިކުދި ތިކިތަކެއް ހުންނާނެ އެވެ.