31 އޮކްޓޯބަރ 2017 - 06:08
އުމުރުން 17 އަހަރުގެ ފިތުރިއްޔާ އަކީ އިންޑޮނީޝިއާގައި ބަޑިބޭސް ފެކްޓަރީއެއްގައި ރޯވެ އެތައް ބަޔަކު މަރުވި އިރު ސަލާމަތްވި ހަމައެކަނި ކުޑަކުއްޖާ އެވެ.
މި ހާދިސާ ހިނގިއިރު އެ ފެކްޓަރީގައި ފިތުރިއްޔާ މަސައްކަތް ކުރާތާ ވީ އެންމެ ހަފުތާއެކެވެ. ފެކްޓްރީގައި ހުރި ބަޑިބޭސްތަކުގައި ރޯވެ ގޮވަން ފެށުމުން ފިތުރިއްޔާ އަށް ލިބުނީ ޝޮކެކެވެ. ވަގުތުން އޭނާ ދުއްވައިގަތީ ބޭރަށް ނުކުންނަން ހުރި ދޮރާ ދިމާލަށެވެ.
ނަމަވެސް އޭނާއަށް ދޮރާ ހަމައަށް ދެވުމުގެ ކުރިން އަލިފާނުގެ ހޫނުގަނޑު އިހްސާސްވާން ފެށި އެވެ. އެއަށްފަހު ބޯ ދުންގަނޑުން އޭނާ ކޮށިއަރައި ނޭވާލާން ދަތިވި އެވެ. އެވަގުތު އިތުރު ގޮވުންތައް ގޮވާ އަޑުފައްގަނޑު އިވެން ފެށި އެވެ. ދުން ބޯކަމުން
ކުރިޔަށް ދާނެ އެއްވެސް ގޮތެއް ނުފެނުނެވެ. އޭރު ގައިގެ ހަންގަނޑު ފިހި ނޮޅެމުންދާކަން އޭނާއަށް އިހްސާސް ކުރެވެ އެވެ.
ކުއްލިއަކަށް، ފިތުރިއްޔާއާ އެކު މަސައްކަތްކުރާ މީހަކު އައިސް އޭނާ ފަހަތުން ގޮސް އެތާ ކައިރީ އޮތް ފެންގަނޑަކަށް ފުންމާލަން ބުންޏެވެ. އެ ފެންގަނޑަކީ ފެކްޓްރީގައި ބޭނުންކުރާ އިކްއިޕްމަންޓްސް ދޮންނަން އޮންނަ ފެންގަނޑެކެވެ.
"އެ ފެންގަނޑަށް ފުންމާލެވުނީ ﷲގެ އިރާދަފުޅުން. އަހަރެމެން ސަލާމަތްވީ އެ ފެންގަނޑުގެ ސަބަބުން،" ފިހިފައި ހުރި ތަންތަނަށް ފަރުވާކުރަން ހޮސްޕިޓަލުގައި ބާއްވާފައި އޮތް ފިތުރިއްޔާ މިދިޔަ ހުކުރު ދުވަހު ނޫސްވެރިންނަށް ކިޔައިދިނެވެ.
އިންޑޮނީޝިއާގެ ޖަކާޓާ ކައިރީގައި އޮންނަ ޓަންގެރަންގްގައި ހުންނަ މި ފެކްޓްރީގައި ރޯވި އަލިފާނުން 47 މީހަކު ވަނީ މަރުވެފަ އެވެ. މީގެ ތެރޭގައި 14 އަހަރުގެ އަންހެންކުއްޖަކު ވެސް ހިމެނެ އެވެ.
މި ފެކްޓްރީގައި މަސައްކަތްކުރާ 103 މީހުންގެ ތެރޭގައި ގިނައީ ވަރަށް ޒުވާން އަންހެން ކުދިންނެވެ. ކޮންމެ ކުއްޖަކަށް ދުވާލަކު ލިބެނީ އެންމެ ތިން ޑޮލަރެވެ. މި ފަދަ ފެކްޓްރީތަކުގައި ރައްކާތެރިކަން ހުންނަ މިންވަރާއި ކުޑަކުދިން ލައްވާ މަސައްކަތް ކުރުވާކަން މި ހާދިސާއިން ވަނީ އަނެއްކާވެސް ހާމަވެފަ އެވެ.