31 އޮކްޓޯބަރ 2017 - 10:12
ސަރުކާރު އޮފީސްތަކަށް ހުޅުވާލައިގެން އެފްއޭއެމުން ކުރިއަށްގެންދާ ޕްރެޒިޑެންޓްސް ފުޓްސަލް ކަޕްގެ ފިރިހެން ބައިގެ ޗެމްޕިއަންކަން ފުޓްސަލްގައި މަޝްހޫރު އެސްޓީއޯ އިން ހޯދައިފި އެވެ.
ރޭ ޓާފް އެއް ނަންބަރު ދަނޑުގައި ކުޅުނު ފައިނަލް މެޗުން އެސްޓީއޯ މޮޅުވީ 3-0 އިންނެވެ. މި މެޗުގައި އެސްޓިއޯގެ ތިން ލަނޑުގެ ތެރެއިން ދެ ލަނޑު ކާމިޔާބުކުރީ ގައުމީ ފުޓްސަލް ޓީމުގެ ކުޅުންތެރިއާ މުހައްމަދު އިމްރާން (އިންމި) އެވެ. އަނެއް ލަނޑު ޖެހީ މުހައްމަދު އިސްމާއިލް އެވެ.
މުބާރާތުގެ މޮޅު ފަސް ކުޅުންތެރިންނަށް ހޮވިފައިވަނީ އެސްޓީއޯގެ އިންމި އާއި އަބްދުﷲ ނާސިހު، އެމްއޭސީއެލްގެ ޒައިދު ސްޓެލްކޯގެ އަލީ މާއިސް (މައްޓު) އަދި ޕޮލިހުގެ އަލީ ފަހުމީ އެވެ.
މި މުބާރާތުގެ އަންހެން ބައިގެ ޗެމްޕިއަންކަން ހޯދީ އެމްޕީއެލް އިންނެވެ. އާދިއްތަ ދުވަހުގެރޭ ކުޅުނު އަންހެން ބައިގެ ފައިނަލުގައި އެމްޕީއެލް ވަނީ އެމްއެންޑީއެފްގެ މައްޗަށް 3-2 އިން ކުރިހޯދައިފަ އެވެ. އެމްޕީއެލްގެ ތިން ލަނޑުގެ ތެރެއިން ދެ ލަނޑު ޖެހީ ގައުމީ އަންހެން ވޮލީބޯޅަ ޓީމުގެ ކުޅުންތެރިއާ ފާތިމަތު ޖޫޒަން ޒަރީރު އެވެ. އަދި އަނެެއް ލަނޑު ޖެހީ ފަރާ އަހުމަދު އެވެ.
އެމްއެންޑީއެފްގެ ދެ ލަނޑު ޖެހީ މަރިޔަމް ރިފާ އަދި ޝައްފަ ޝިއުތު އެވެ.
އަންހެން ބައިގެ އެންމެ މޮޅު ފަސް ކުޅުންތެރިންނަށް ހޮވުނީ އެމްޕީއެލްގެ ފާތިމަތު ޝާލިއާ އާއި ފާތިމަތު ޝަޒީމާ އަދި އާމިނަތު ޝާމިލާ، އެމްއެންޑީއެފްގެ ޝައްފަ އަދި އައިމިނަތު ޒާހިޔާ އެވެ.
މި މުބާރާތަކީ އެފްއޭއެމުން ފުޓްސަލް ކުޅުންތެރިންނަށް ހުޅުވާލައިގެން ފުޓްސަލް ކުރިއެރުވުމުގެ މަގުސަދުގައި ފެށި މުބާރާތެކެވެ. މި މުބާރާތުގައި އެފްއޭއެމުން ރާވާހިންގާ އެހެން މުބާރާތެއްގައި ކުޅޭ ކުޅުންތެރިއަކަށް ނުކުޅެވެ އެވެ. އެފްއޭއެމުން ބުނީ އެއީ ފުޓްސަލް އާއި ފުޓްބޯޅަ ވަކިކުރުމުގެ ގޮތުން އެޅި ފިޔަވަޅެއް ކަމަށެވެ.
އެފްއޭއެމުގެ އަސާސީ ގަވާއިދު އިސްލާހުކުރިިއިރު އެކި އެސޯސިއޭޝަންތައް ހިންގަން ވަނީ އަންގައިފަ އެވެ. އެގޮތުން ފުޓްސަލް ކަންތައްތައް ކުރިއަށް ގެންދިއުމަށް ވަކި އެސޯސިއޭޝަނެއް އޭގެ ތެރޭގައި ހިމެނުމަށް އެންގި އެވެ. މި މުބާރާތާ އެކު އެފްއޭއެމްގެ ފުޓްސަލް ކަންތައްތައް ފެށިގެންދިޔައިރު، މި މުބާރާތް އިތުރަށް ފުޅާކުރުމަށް އެފްއޭއެމުން ވަނީ ނިންމައިފަ އެވެ.