08 ނޮވެމްބަރ 2017 - 06:41
ސިދާރްތު މަލްހޯތުރާގެ އެންމެ ފަހުގެ ފިލްމު "އިއްތިފާގު" އާ މެދު ފާޑުކިޔުންތެރިންގެ ޚިޔާލު ވަރަށް މަސްހުންޏެވެ. އެއް ބަޔަކު ބުނަނީ ފިލްމަކީ ނޭވާ ހިފަހައްޓާލަން ޖެހޭ ކަހަލަ ފިލްމެއް ކަމަށެވެ. އަދި ފިލްމު ނިމެން ދާއިރު ވެސް ދެން ވާނެ ގޮތެއް ނޭނގިފައި ތިބެން ޖެހޭ ކަމަށެވެ. އަނެއް ބަޔަކު ބުނަނީ ފިލްމު އެހާ ކަމު ނުދާ ކަމަށެވެ.
ހަފުތާ ބަންދު ނިމުނުއިރު ތިން ދުވަހުން މި ފިލްމަށް ލިބިފައިވަނީ 16 ކްރޯޑު ރުޕީސް އެވެ. މިއީ ވަރަށް ކުޑަ ބަޖެޓަކުން އުފެއްދި ފިލްމަކާ ބަލާފައި ރަނގަޅު އަދަދެއް ކަމަށް ފިލްމު އުފެއްދި ފަރާތުން ގަބޫލުކުރެ އެވެ.
ކްރިޓިކްސްގެ ރިވިއުތަކުގައި އެންމެން ވެސް އެއްބަސްވާ ކަމެއް ފިލްމުގައި އެބައޮތެވެ. އެއީ ފިލްމުގައި ފުލުހެއްގެ ރޯލު އަދާކުރި އަކްޝޭ ކަންނާގެ މޮޅުކަމެވެ.
ފިލްމަށް މަސްހުނި ޚިޔާލުތަކެއް ފާޑުކިޔުންތެރިން ފާޅުކޮށްފައި ވިޔަސް ނަމަވެސް ބެލުންތެރިން ވަރަށް ބޮޑަށް ތައުރީފު ކުރަމުންދާތީ ސިދާރްތު ހިތްހަމަޖެހެ އެވެ. އޭނާ ބުނި ގޮތުގައި އެ ފިލްމު ގަބޫލު ކުރިއިރުވެސް އެއީ 100 ކްރޯޑު ކްލަބަށް ވަދެވޭ ކަހަލަ ފިލްމެއް ނޫންކަން އޭނާއަށް އެނގެ އެވެ.
ޚާއްސަކޮށް މި ފިލްމު އެއްވެސް ވަރަކަށް މާކެޓް ނުކުރުމުގެ ޕޮލިސީއެއް ގެންގުޅެފައިވާތީ ފިލްމު ހިނގާނެ އޮތް ހަމަ އެކަނި ގޮތަކަށް އޮތީ ފިލްމު ބަލާފައި ނުކުންނަން މީހުންގެ އަނގައިން ފިލްމު މޮޅު ވާހަކަ އިވިގެންނެވެ. ދުވަހަކަށް ވުރެ ދުވަހެއް ފިލްމުގެ ވިޔަފާރި ރަނގަޅުވެފައި ވަނީ ފިލްމު މޮޅުކަމަކަށް ގިނަ ބަޔަކު ގަބޫލުކުރާތީ ކަމަށް ސިދާރްތު ބުންޏެވެ.
"ފިލްމަށް ބޮކްސް އޮފީހުގައި މާ ރަނގަޅު އަދަދުތަކެއް ނުލިބޭނެ ކަމަށް ކުރިން ވެސް އޮތީ ބެލެވިފައި. އެހެންވެ ސެޓެލައިޓްސް ރައިޓްސް އާއި ޑިޖިޓަލް ރައިޓްސް ވިއްކައިގެން ފިލްމުގެ ޚަރަދު ފޫބައްދަން ޚިޔާލު ކޮށްފައި އޮތީ،" ސިދާރްތު ބުންޏެވެ.
ސިދާރްތު ބުނި ގޮތުގައި އޭނާއަކީ ފައިސާ އަށް ވުރެ ބޮޑަށް ކޮންޓެންޓަށް ބަލައިގެން ފިލްމުތައް ގަބޫލުކުރާ މީހެކެވެ. "އިއްތިފާގު" ވެސް އޭނާ ކުޅުނީ ފިލްމުގެ ކޮންޓެންޓް މޮޅުކަމަށް ގަބޫލު ކުރެވިގެން ކަމަށް އޭނާ ބުންޏެވެ.