07 ނޮވެމްބަރ 2017 - 11:54
ބާސެލޯނާ (ނޮވެމްބަރު 7) - ބާސެލޯނާ އިން އަންނަ ސީޒަނަށް ޓީމު ވަރުގަދަ ކުރުމުގެ ގޮތުން ޗެލްސީގެ ޑިފެންޑަރު ސެސާ އަޒްޕިލިކުއެޓާ އާއި މެންޗެސްޓާ ޔުނައިޓެޑްގެ ވިންގް އެންތަނީ މާޝިއަލް އަށް ފާރަލަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ބާސެލޯނާގެ ޗީފް ރޮބާޓޯ ފެނާންޑޭޒް ވަނީ މިދިޔަ އާދިއްތަ ދުވަހު ޗެލްސީ އަތުން 1-0 އިން ޔުނައިޓެޑް ބަލިވި މެޗު ބެލުމަށް ސްޓެމްފޯޑް ބްރިޖަށް ގޮސްފަ އެވެ. އަދި އޭގެ ކުރިން ޗެމްޕިއަންސް ލީގުގައި ޔުނައިޓެޑާއި ބެންފީކާ ކުޅުނު މެޗަށް ބާސެލޯނާގެ ބައެއް ސްކައުޓުން ވެސް ދިޔަ ކަމަށް ރިޕޯޓްތައް ބުނެ އެވެ.
މި ސީޒަން ފެށުމުގެ ކުރިން ވެސް ބާސެލޯނާ އިން އުމުރުން 28 އަހަރުގެ އަޒްޕިލިކުއެޓާ އަށް ވަނީ ޝައުގުވެރިކަން ފާޅުކޮށްފަ އެވެ. އޭރު އަޒްޕިލިކުއެޓާ ބުނީ ބާސެލޯނާ ކަހަލަ ކްލަބަކުން އޭނާ ހޯދަން އުޅުމަކީ ލިބޭ ޝަރަފެއް ކަމަށެވެ.
"ބާސެލޯނާ ކަހަލަ ކްލަބަކުން އަހަންނަށް ޝައުގުވެރިކަން ފާޅުކުރުމަކީ ލިބޭ ޝަރަފެއް. އެކަމަކު މި ވަގުތު އަހަރެން ވިސްނަނީ ޗެލްސީއާ މެދު. މި ކްލަބުގައި އަހަރެން މިހުރީ ވަރަށް ބޮޑަށް ހިތްހަމަ ޖެހިގެން،" ސްޕެއިން ގައުމީ ޓީމަށް ވެސް ކުޅެމުން އަންނަ އަޒްޕިލިކުއޭޓާ ބުންޏެވެ.
ޔުނައިޓެޑްގެ ކޯޗުކަމާ މިދިޔަ ސީޒަނުގައި ހޯސޭ މޮރީނިއޯ ހަވާލުވި ފަހުން މާޝިއަލް އަށް ގިނައިން ފުރުސަތު ލިބެނީ ބަދަލު ކުޅުންތެރިއެއްގެ ގޮތުގަ އެވެ. އުމުރުން 21 އަހަރުގެ މާޝިއަލް އަށް ފްރާންސް ގައުމީ ޓީމުން މަދުން ފުރުސަތު ލިބެނީ ކްލަބް ލެވެލްގައި ގަވައިދުން ނުކުޅޭތީ ކަމަށް ފްރާންސް ޓީމުގެ ކޯޗު ޑިޑިއޭ ޑިޝޯމްޕާ ހަވާލާދީ އެ ގައުމުގެ ނޫސްތަކުން ރިޕޯޓްކުރެ އެވެ.
މި ސީޒަނުގައި މިހާތަނަށް މާޝިއަލް ހަ ލަނޑު ޖަހާފައިވާއިރު އޭގެ ތެރެއިން ހަތަރު ލަނޑަކީ ބަދަލު ކުޅުންތެރިއެއްގެ ގޮތުގައި ކުޅެން އެރުމަށް ފަހު އޭނާ ޖެހި ގޯލުތަކެވެ.
މިދިޔަ ޖެނުއަރީގައި މާޝިއަލް ހޯދަން ސްޕެއިނުގެ ސެވިއްޔާ އިން ވަރަށް މަސައްކަތް ކުރި އެވެ. އެހެން ނަަމަވެސް ފަހު ވަގުތު ޔުނައިޓެޑުން ދެކޮޅު ހެދީ އެވެ. މި ސީޒަނަށް ފަހު ބާސެލޯނާ އިން ގަންނަން ބޭނުންވާ އެޓޭކިން ކުޅުންތެރިންގެ ލިސްޓުގައި ލިވަޕޫލްގެ ފިލިއްޕޭ ކުޓީނިއޯ ނަގާފައި ދެން ހިމެނެނީ މާޝިއަލް އާއި ނަޕޯލީގެ ލޮރެންޒޯ އިންސީނިއޭ ކަމަށް ސްޕެއިނުގެ މީޑިއާ ރިޕޯޓްތައް ބުނެ އެވެ.