16 ނޮވެމްބަރ 2017 - 06:45
ވިއްސާރަ މޫސުމުގައި މާހައުލަށް ފިނިކަން އައުމުން އަރިދަފުސް ރޯގާ ޖެހޭ ކަމަށް ބައެއް މީހުންނަށް ގަބޫލު ކުރެވެ އެވެ. ނުވަތަ ގޭތެރެ މާ ބޮޑަށް ފިނިވުމަކީ ވެސް ރޯގާ ޖެހެން މެދުވެރިވާ ކަމެއް ކަމަށް ގަބޫލުކުރާ މީހުން ވެސް މަދެއް ނޫނެވެ.
ނަމަވެސް ސިއްހީ ތަޖުރިބާކާރުން ބުނަނީ ފިނި މާހައުލެއްގައި ނުވަތަ ފިނި ތަނެއްގައި އުޅުމަކުން ރޯގާ ނުޖެހޭނެ ކަމަށެވެ. ސަަބަބަކީ ރޯގާ އަކީ ތަފާތު އެތައް ވައްތަރެއްގެ ވައިރަހުން ޖެހޭ އެއްޗަކަށް ވާތީ އެވެ.
މިސާލަކަށް، އެންމެ އާންމުކޮށް ރޯގާ ޖެހެނީ ރިނޯވައިރަހުންނެވެ. މި ވައިރަހުގެ އެކަނި ވެސް 100 އަށް ވުރެ ގިނަ ސްޓްރެއިން ހުރެ އެވެ. މިއިން ބައެއް ވައިރަސްތައް، ފިނިވީމާ މާ ގަދަޔަށް ރޯގާ ޖައްސަ އެވެ.
ބޮޑު މީހަކަށް އާންމު ގޮތެއްގައި، އަހަރަކު ރޯގާ ޖެހޭނީ ދެތިން ފަހަރު އެވެ.
ރޯގާ ޖެހޭ އާންމު ސަބަބަކީ ރޯގާ ޖެހިފައިވާ މީހަކު ކެއްސައި ކިނބިހިއަޅާއިރު ނުކުންނަ ކުޅުތިކިތައް ވައިގެ ތެރޭގައި ދަތުރުކޮށް އެހެން މީހުންގެ ހަށިގަނޑަށް ވާސިލު ވުމެވެ. ރޯގާ ޖެހިފައި ހުންނަ މީހެއްގެ އަތުގައި ރޯގާގެ ވައިރަސް ހުއްޓާ އެހެން މީހަކާ ސަލާން ކުރެވި ނުވަތަ އެހެން މީހުން އަތްލާ ތަނެއްގައި އަތް ލެވިގެން އެ ވައިރަސް އަނެއް މީހާގެ ހަށިގަނޑަށް ވާސިލު ވެގެން ވެސް ބަލި ޖެހިދާނެ އެވެ.
ރޯގާ ޖެހިފައިވާ މީހެއްގެ އަތުގައި ވައިރަސް ހުއްޓާ އާންމުގޮތް އަތްލެވޭ އެއް ތަނަކީ ދޮރުގެ އަތްގަނޑެވެ. ފޯނު ނުވަތަ ރިމޯޓްގެ ޒަރިއްޔާ އިން ވެސް ވައިރަސް އަރާގޮތް ދިމާވެ އެވެ. މިގޮތަށް، ވައިރަސް އަތުގައި ހުރި މީހަކު އަތްލައިގެން އެއްޗެހީގައި ނުވަތަ ތަންތަނުގައި އުނގުޅިފައި ހުންނަ ވައިރަސް މަރުނުވެ އެތައް އިރެއް ވަންދެން ހުރެ އެވެ.
އަރިދަފުސްރޯގާ އާންމު ގޮތެއްގައި އެއް ހަފުތާ އާއި ދެ ހަފުތާ އާ ދެމެދުގެ މުއްދަތެއްގެ ތެރޭގައި ފަސޭހަ ވެއެވެ.
ރޯގާ ޖެހުުން އެންމެ ރަނގަޅީ ވީހާ ވެސް ގިނައިން ފެން ބުއިމެވެ. ޗިކަން ސޫޕް ބުއިމުން ވެސް ރޯގާ އަށް ވަރަށް އަވަހަށް ލުއިވެ އެވެ. ދެން އޮތީ އަރާމު ކުރުމާއި ހޫނު ފެނަށް ލޮނު ކޮޅެއް އަޅައި ގިރާލައިގެން އެ ފެނުން ކަރުތެރެ ދޮވުމެވެ.
ރޯގާ ޖެހޭއިރަށް އެކި ފާޑުގެ ބޭސް ހޯދައިގެން ކެއުން ރަނގަޅެއް ނޫނެވެ. ކެއްސުމާއި ރޯގާއަށް ތައްޔާރުކޮށްފައި ހުންނަ ގިނަ ބޭހުން ނިދިއައިސް ބޮލަށް ބަރުވާ ގޮތް ވެއެވެ. އެކަމަށް ވެސް ސަމާލުވާން ޖެހޭނެ އެވެ.