26 ނޮވެމްބަރ 2017 - 11:01
މަދަނީ ދައުވާއަކަށް ޖަވާބުދާރީ ވުމަށް ދައުވާ ލިބޭ މީހާ އަށް އެކަށީގެންވާ ފުރުސަތު ދިނުމެއް ނެތި، މީހެއްގެ މައްޗަށް 1.2 މިލިއަން ރުފިޔާގެ ދަރަންޏެއް ސާބިތުވާ ކަމަށް މެޖިސްޓްރޭޓް ކޯޓަކުން ކުރި ހުކުމެއް ހައި ކޯޓުން ބާތިލްކޮށްފި އެވެ.
ކ. ހުރާގެ އެ މީހާގެ މައްޗަށް 1.2 މިލިއަންގެ ދަރަންޏެއް ސާބިތުވާ ކަމަށް މާފުށީ މެޖިސްޓްރޭޓް ކޯޓުން މިދިޔަ އަހަރުގެ އޭޕްރީލް މަހު ހުކުމްކުރީ ދޯންޏެއްގެ މައްސަލާގައި ފައިސާތަކެއް ހޯދަން އޭނާއާ ދެކޮޅަށް މީހަކު ދައުވާއެއް ކުރުމުންނެވެ.
އެ ހުކުމް އެ މީހާގެ ފަރާތުން އިސްތިއުނާފްކޮށް، ހައި ކޯޓުގައި ބުނެފައިވަނީ އެ ދައުވާ އަށް ޖަވާބުދާރީ ވުމުގެ ފުރުސަތެއް ހަމައެކަނި ލިބުނީ ފޯން ކޯލަކުން ކަމަށެވެ. އެގޮތުން ހުރާ ކޯޓަށް އޭނާ ގެންގޮސް މާފުށީ ކޯޓުގެ މެޖިސްޓްރޭޓާ ފޯނުން ވާހަކަ ދައްކައި، އެ ދައުވާ އަށް ޖަވާބުދާރީވާން ފުރުސަތު ދިން ކަމަށާއި އެކަމަކު އެ މައްސަލައިގެ ތަފްސީލެއް އޭރު ނޭނގޭ ކަމަށް އެ މީހާގެ ފަރާތުން ހައި ކޯޓުގައި ބުނެފައިވެ އެވެ.
އެ މީހާގެ ފަރާތުން ބުނެފައިވާ ގޮތުން އެ ދައުވާ އޭނާގެ މައްޗަށް ސާބިތުވާ ކަމަށް ނިންމީ އެ ފޯން ކޯލްގެ ދެ ގަޑިއެއްހާއިރު ފަހުންނެވެ. މާފުށީ ކޯޓުން އޭނާގެ މައްޗަށް އެ ހުކުމް ކުރިކަން އޭނާ އަށް އެންގީ ވެސް ހުރާ ކޯޓުން ކަމަށް އެ މީހާގެ ފަރާތުން ހައި ކޯޓުގައި ބުނެފައިވެ އެވެ.
މާފުށީ ކޯޓުގެ ހުކުމް ބާތިލްކޮށް، ބުރާސްފަތި ދުވަހު ހައި ކޯޓުން ކުރި ހުކުމުގައި ވަނީ މާފުށީ ކޯޓުން އެ މައްސަލަ ނިންމި ގޮތުގެ ލިޔުންތަކަށް ބަލާއިރު، ދައުވާ ލިބޭ މީހާ އަށް އެ ދައުވާއާ ގުޅޭ އެއްވެސް ލިޔުމެއް ދީފައިވާ ކަން އެނގެން ނެތް ކަމަށެވެ. އެކަމަކު އެ މައްސަލައަކީ އެ ދައުވާއަށް ޖަވާބުދާރީވާން އެކަށީގެންވާ ވަގުތު ބޭނުންވާ ފަދަ މައްސަލައެއް ކަމަށް ހުކުމުގައި ވެ އެވެ.
ދައުވާއާ ގުޅިގެން ދެ ފަރާތަށް ވެސް ހަމަހަމަ ފުރުސަތު ދޭންޖެހޭނެ ކަމަށާއި އަދި ދެ ފަރާތުން ހުށަހަޅާ ކަންކަން ސާބިތު ކުރުމުގެ ފުރުސަތު ދިނުމަކީ ކޯޓުތަކުން ކުރަންޖެހޭ ކަމެއް ކަމަށް ހުކުމުގައި ވެ އެވެ. އެ ފުރުސަތު ނުދީ ޝަރީއަތްތައް ހިންގުމަކީ މަދަނީ އިޖްރާއާތުތަކާ ޚިލާފް ކަމެއް ކަމަށް ހައި ކޯޓުގެ ތިން ފަނޑިޔާރުންގެ އިއްތިފާގުން ކުރި އެ ހުކުމުގައިވެ އެވެ.
ހައި ކޯޓުގެ ހުކުމުގައިވާ ގޮތުން، މާފުށީ ކޯޓަކީ އެ މައްސަލަ ބެލުމުގެ އިހްތިސާސް ވެސް ލިބިގެންވާ ކޯޓެއް ނޫނެވެ. ދައުވާ ލިބުނު މީހަކީ ހުރާ މީހެއް ކަމަށް ވެފައި އެ މައްސަލާގައި ބަޔާންކުރާ މުދާ ހުރީ ވެސް އެ މީހާގެ ބެލުމުގެ ދަށުގައި ކަމަށް ވާއިރު އެ މައްސަލަ ވަކި ކޯޓަކުން ބެލުމަށް ދެ ފަރާތް ދެމެދުގައި އެއްބަސްވުމެއް ނެތް ކަމަށް އެ ހުކުމުގައިވެ އެވެ. އެހެންވެ، ކޯޓުތަކުގެ ގާނޫނު އޮތްގޮތުުން އެ މައްސަލަ ބެލުމުގެ އިހްތިސާސް މާފުށީ ކޯޓަށް ލިބިގެންނުވާ ކަމަށް ހުކުމުގައި ވެ އެވެ.
އެ ހުކުމް ބާތިލްކޮށް، ހައި ކޯޓުން އަންގާފައިވަނީ އެ މައްސަލަ ބެލުމުގެ އިހްތިސާސް އޮތް ކޯޓަކަށް އެ މައްސަލަ އަލުން ހުށަހަޅައިފި ނަމަ އިޖްރާއާތުތަކާ އެއްގޮތަށް އެ މައްސަލަ ބަލައި ގޮތެއް ނިންމުމަށެވެ.