07 ޖުލައި 2016 - 17:22
ޕީޕީއެމްގެ ސުލޫކީ ކޮމެޓީ މިނިވަން ނޫން ކަމަށާއި އެތަނުން ނިންމާ ނިންމުންތައް ވެސް އިންސާފުވެރި ނޫން ކަމަށް އެ ޕާޓީން މިހާރު ވަކި ކޮށްފައިވާ އަދި ކުރިން ޕީޕީއެމްގެ ކައުންސިލް މެމްބަރަކަށް ވެސް ހުންނެވި އައިމިނަތު ނާދިރާ ވިދާޅުވެއްޖެ އެވެ.
އޭނާ މަގާމުން ވަކި ކުރުމުގެ ކުރިން، ކުރީގެ ރައީސް މައުމޫން އަބްދުލްގައްޔޫމަށް ފޮނުއްވި ސިޓީއެއްގައި ވިދާޅުވީ ސުލޫކީ ކޮމެޓީގައި މުޅިން ވެސް ތިއްބަވަނީ ސަރުކާރުގެ އެކި މަގާމުތަކުގައި ތިއްބެވި ވެރިން ކަމަށާއި އެހެންވެ، ޕާޓީގެ މެމްބަރުންގެ ސުލޫކީ މައްސަލަތައް މިނިވަން ކަމާ އެކު އެ ބޭފުޅުންނަށް ނުނިންމެވޭނެ ކަމަށެވެ.
"ވީމާ، މަނިކުފާނުގެ އިސްލާހީ ޕްރޮގްރާމްގެ ދަށުން، ކޮމެޓީތައް އިސްލާހު ކުރުމުގެ މަސައްކަތް މުހިއްމު ކަމުގައި ދެންނެވީމެވެ." ނާދިރާ ފޮނުއްވި ސިޓީގައި ވިދާޅުވެފައި ވެ އެވެ.
ޕީޕީއެމްގެ ސުލޫކީ ކޮމެޓީގައި ތިއްބަވަނީ އިސްލާމިކް މިނިސްޓްރީގެ ސްޓޭޓް މިނިސްޓަރު އަލީ ވަހީދާއި ހޯމް މިނިސްޓްރީގެ ސްޓޭޓް މިނިސްޓަރު ޔޫސުފް އަބްދުލްޣަފޫރާއި ހެލްތު މިނިސްޓްރީގެ ޑެޕިއުޓީ މިނިސްޓަރު މުހައްމަދު ރަފީގުގެ އިތުރުން އެމްޕީއެލްގެ ސީނިއާ މަގާމެއްގައި ހުންނަވާ އިބްރާހިމް ރަޝީދެވެ.
މައުމޫނަށް ތާއީދު ކުރައްވައި ކުރެއްވި ޓްވީޓަކާ ގުޅިގެން، ޖެންޑާ މިނިސްޓްރީގެ އެގްޒެކެޓިވް ކޯޑިިނޭޓަރުގެ މަގާމުން ވެސް ވަކި ކުރެއްވި ނާދިރާ ވިދާޅުވީ ކޮމެޓީީގެ މެމްބަރުން ތިއްބެވި މަގާމުގެ ގޮތުން، އިންސާފުވެރި ކަމާ އެކު މައްސަލަތައް ބެލުމަށް ފިއްތުންތައް ކުރިމަތިވާނެ ކަމަށެވެ.
އެ ކޮމެޓީން ވަނީ ނާދިރާގެ އިތުރުން މާލެ ސިޓީ ކައުންސިލްގެ ޕީޕީއެމް މެމްބަރު ޒައިދުލް އަމީން ވެސް ޕާޓީން ވަކިކުރައްވާފަ އެވެ.
ސުލޫކީ ކޮމެޓީން ބުނެފައިވާ ގޮތުގައި ނާދިރާ އަދި ޒައިދު ވަކި ކުރެއްވީ ޕާޓީގެ މެމްބަރަކަށް ހުންނަވައިގެން، ޕާޓީ ނިސްބަތްވާ ސަރުކާރަށް ފާޑު ކިޔާތީ އެވެ.