05 ޑިސެމްބަރ 2017 - 13:47
ކުރީގެ މަޝްހޫރު އެކްޓަރު ޝަޝީ ކަޕޫރު، އުމުރުން 79 އަހަރުގައި އިއްޔެ ވަނީ މަރުވެފަ އެވެ. މިއީ ބޮލީވުޑަށް ލިބުނު ބޮޑު ހިތާމައެކެވެ.
ޝަޝީ މަރުވުމުގެ ހިތާމައިގައި ޕްރޮޑިއުސަރު ޑައިރެކްޓަރު ކަރަން ޖޯހަރް ކުރި ޓުވީޓެއްގައި ބުނީ ސަޝީ އަކީ ބޮލީވުޑްގައި ހުރި އެންމެ ރީތި އަދި އެންމެ ހިތްގައިމު ފިލްމީ ތަރި ކަމަށެވެ. ޝަޝީ ބޮޑަށް މަޝްހޫރު ވެފައި ވަނީ ވެސް އޭނާގެ ރީތި ސިފައިގެ ސަބަބުންނެވެ. ކަރަން ބުނި ގޮތުގައި ފިލްމާއި ތިއޭޓަރަށް އޭނާ ޝަޝީ ދޫކޮށްފައި ވަނީ ޒަމާންތަކަށް ދެމި ހުންނާނެ ހަނދާން ތަކެކެވެ.
ޝްރީދޭވީ ކުރި ޓުވީޓެއްގައި ބުނީ ޝަޝީ އަކީ ވަރަށް ސާދާ މިޒާޖެއްގެ ރަނގަޅު މީހެއް ކަމަށެވެ. އަދި އޭނާއަކީ އިންސާނިއްޔަތުކަމުގެ ގޮތުން ބެލިޔަސް އެހެން މީހުންނަށް މިސާލެއްކަމަށް ބުނެފައިވެ އެވެ.
އަކްޝޭ ކުމާރު ބުނި ގޮތުގައި އޭނާގެ ބޮލީވުޑް ހުވަފެންތައް ހަގީގަތަކަށްވީ ޝަޝީގެ ފިލްމުތަކުގެ ޑައިލޯގްތައް އަޑުއަހައިގެން ކަމަށެވެ. އަދި ސަޝީ ހިންދީ ސިނަމާއަށް ކޮށްދީފައިވާ އަގު ނުކުރެވޭ ވަރުގެ ޚިދުމަތްތައް ގިނަ ބަޔަކު ހަނދާން ކުރާނެ ކަމަށް ބުނެފައިވެ އެވެ.
ބޮލީވުޑްގެ އެތައް ބައިވަރު ފިލްމެއް ކުޅެފައިވާ ސަޝީގެ އެންމެ މަޝްހޫރު ފިލްމުތަކުގެ ތެރޭގައި ދީވާރް (1975)، ކަބީ ކަބީ (1976) އަދި ޝާން (1980) ހިމެނެ އެވެ. މިއިން ކޮންމެ ފިލްމެއްގައި ވެސް ޝަޝީ ކުޅެފައި ވަނީ އަމީތާބާ އެކު ސަޕޯޓިން ރޯލެކެވެ.