16 ޑިސެމްބަރ 2017 - 15:50
ހުޅުމާލޭގެ އިރުމަތީ ފަރާތު އަތިރިމަތީ ސަރަހައްދު (ބީޗު ފްރަންޓް) ގައި ހުންނަ ގޯތިތަކުގެ ކުރިމަތިން ގޮނޑުދޮށާ ދެމެދު އޮންނަ ހުސް ބިންތަކުން ކުލި ނަގާ ގޮތަށް ހަމަޖެއްސުމުން، ގެސްޓް ހައުސްތައް ތަމްސީލު ކުރާ ޖަމިއްޔާއިން ކަންބޮޑުވެއްޖެ އެވެ.
ބީޗް ފްރަންޓުގެ ގޯތިތަކުގައި ވިޔަފާރި ކުރުމުގެ ހުއްދަ ދީފައިވާ ފަރާތްތަކަށް އެތަން ކުއްޔަށް ދޫކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން ނިންމާފައިވަނީ މިިދިޔަ ނޮވެމްބަރު މަހުގަ އެވެ.
ހުޅުމާލޭގެ އިރުމަތީ ފަރާތު އަތިރިމަތީ ސަރަހައްދުގައި ހިންގާ ހުރިހާ ގެސްޓް ހައުސްތަކުން ވެސް، އަތިރިމައްޗަށް ވާ ގޮތަށް އޮންނަ ހުސް ބިންތައް ބޭނުން ކުރަމުން އައި ނަމަވެސް މީގެ ކުރިން އެތަނަކުން ކުއްޔެއް ނުނަގަ އެވެ. އެކަމަކު މިހާރު އެޗްޑީސީން ނިންމާފައިވަނީ އަތިރިމަތީ ސަރަހައްދުން އަކަފޫޓެއް 12 ރުފިޔާގެ މަގުން ކުއްޔަށް ދިނުމަށެވެ.
މިކަމާ ގުޅިގެން ކަންބޮޑުވުން ފާޅުކޮށް، ގެސްޓް ހައުސް އެސޯސިއޭޝަނުން އެޗްޑީސީއަށް ފޮނުވި ސިޓީއެއްގައި ބުނީ އަތިރިމަތީ ސަރަހައްދުގެ އެ ބިންތަކަކީ، ގެސްޓް ހައުސްތަކުގެ އިތުރުން ހުޅުމާލެ އާއި މާލޭގެ ގިނަ ބަޔަކު ވެސް ހިތްހަމަ ޖައްސާލުމަށް ބޭނުން ކުރަމުންދާ އާއްމު ސަރަހައްދެއް ކަމަށެވެ. އެހެންވެ، އެއްވެސް ވިޔަފާރިއެއްގެ އަމިއްލަ ފައިދާއަށްޓަކައި އެތަން "ވިއްކާލުމަކީ" އާއްމު ރައްޔިތުންގެ ހައްގުތަކަށް އަރައިގަނެ، އުފާވެރި އިޖްތިމާއީ މާހައުލުން އެކަހެރިކޮށްލުން ކަމަށް އެ ސިޓީގައި ބުނެފައި ވެ އެވެ.
ގެސްޓް ހައުސް އެސޯސިއޭޝަނުން ވަނީ ކުޑަބަނޑޮހާއި ފޭދޫފިނޮޅު ވިޔަފާރީގެ ބޭނުމަށް ސަރުކާރުން ނެގުމުން، ގިނަ ބަޔަކު ހިތްހަމަ ޖައްސާލުމަށް މިހާރު ބޭނުން ކުރަނީ ހުޅުމާލޭ އިރުމަތީ ފަރާތު އަތިރިމަތިކަން ފާހަގަކޮށްފަ އެވެ. .
އެ އެސޯސިއޭޝަނުން ބުނިގޮތުގައި، ބީޗް ފްރަންްޓްގެ ގެސްޓް ހައުސްތަކަށް ދާ ހުރިހާ ޓޫރިސްޓުން ވެސް އަތިރިމަތީ ސަރަހައްދު ބޭނުން ކުރެ އެވެ. އެކަމަކު ކޯޕަރޭޓް ކުންފުނިތަކުގެ ފައިދާއަށް އެ ސަރަަހައްދު ބަންދުކޮށްގެން ބޭނުން ކުރުމަކީ ޓޫރިސްޓުންނަށް ވެސް ލިބޭނެ ދެރައެއް ކަމަށް ގެސްޓް ހައުސް އެސޯސިއޭޝަނުން ބުންޏެވެ. އަދި ހުޅުމާލޭގެ ޓޫރިޒަމަށް ވެސް އޭގެ ސަބަބުން ހީނަރުކަން ލިބޭއިރު، ގެސްޓް ހައުސްތަކަށް ވެސް އިންތިހާއަށް ގެއްލުން ވާނެ އެ ޖަމިއްޔާއިން ބުންޏެވެ.
ހުޅުމާލޭ އިރުމަތީ ފަރާތު އަތިރިމަތިން އެޗްޑީސީން ޕްލޮޓްތައް ވިއްކާފައިވަނީ "ބީޗް ފްރަންޓް"ގެ ނަމުގައި އެހެން ސަރަހައްދުތަކަށް ވުރެ އަގުބޮޑު ކޮށެވެ. އަދި އެއީ އަތިރިމައްޗަށް ވުމުން، އެތަނުން ލިބޭނެ މަންފާއަށް ބަލާފައި ކަނޑައެޅި އަގެއް ކަމަށް ދެކޭ ކަމަށް ގެސްޓް ހައުސް އެސޯސިއޭޝަނުން ބުންޏެވެ. އެކަމަކު އެ ލިބޭ މަންފާއަށް ބަލައި، ދެ ވަނަ ފަހަރަށް އެތަނުން އިތުރު ފައިދާތަކެއް ހޯދަން އެޗްޑީސީން މަސައްކަތް ކުރުމަކީ ގާނޫނީ ގޮތުން ކުރެވިދާނެކަމެއްތޯ ވެސް އެ ޖަމިއްޔާއިން ވަނީ ސުވާލު އުފައްދައިފަ އެވެ.
އެތަނުން ބުނިގޮތުގައި އަތިރިމަތީ ސަރަހައްދު ހުސް ބިން ގަތުމަށް އެޗްޑީސީން ގެސްޓް ހައުސްތަކަށް އަންގާފައިވަނީ ތަނާ ނުބައްދަލު ބޮޑު އަގެއްގަ އެވެ. އަދި އެގޮތަށް އަމަލުނުކޮށްފިނަމަ، އެތަނުގައި ހުރި ތަކެތި ނަގައި އިންޒާރުު ދިނުމަކީ ހައްގަށް ނުފޫޒު ފޯރުވުން ކަމުގައި ވެސް ބުންޏެވެ. ހަމައެއާއެކު އެތަނުން ކުއްލި އަކަށް ބޮޑު އަގެއް ނަގަން ނިންމުމަކީ ހުޅުމާލޭގައި ހިންގާ ގެސްޓް ހައުސްތަކުގެ ކޮންމެވެސް މިންވަރެއް އެޗްޑީސީގެ ކޮންޓްރޯލްގެ ދަށަށް ގޮސްދާނެ ކަމެއް ކަމަށާއި މި ފަދަ ހާލަތެއްގައި ޓޫރިސްޓުންނަށް ދޭ ހިދުމަތުގެ ފެންވަރާއި އަގަށް ނޭދެވޭ އަސަރެއް ކޮށްފާނެ ކަމަށް ވެސް ގެސްޓް ހައުސް އެސޯސިއޭޝަނުން ބުންޏެވެ.
"މިކަމަކީ ހުޅުމާލޭގައި ކުދި އަދި މެދު ފަންތީގެ ގެސްޓްހައުސްތަކުގެ އާއްމު ވިޔަފާރިތަކާއި އަދި އެ ވިޔަފާރިތަކުން މަންފާ ލިބިގަންނަމުން އަންނަ ކުދި ފިހާރަތަކުގެ ކުރިއެރުމާ މެދު އެޗްޑީސީން ގެންގުޅޭ ސިޔާސަތު ހާމަވެގެންދާ ކަމެއްކަމުގައި ހިތާމައާ އެކު ދަންނަވަމެވެ." ގެސްޓް ހައުސް އެސޯސިއޭޝަނުން ބުންޏެވެ.
ހުޅުމާލޭ ގެސްޓް ހައުސްތަކަކީ ތެރެއިން ޓެކްސްގެ ގޮތުގައި ސަރުކާރަށް އެންމެ ގިނަ ފައިސާ ފޯރުކޮށްދޭ ތަންތަނަށް ވެފައި، އަތިރިމަތި ކުއްޔަށް ދީފިނަމަ އާއްމު ވިޔަފާރިތަކާއި އާއްމުންނަށް ގެއްލުން ލިބިދާނެތީ އެކަން ނުކުރުމަށް އެ އެސޯސިއޭޝަނުން ވަނީ އިލްތިމާސްކޮށްފަ އެވެ.