19 ޑިސެމްބަރ 2017 - 10:56
ޕެރިސް (ޑިސެމްބަރު 19) – ޔޫރަޕް ފުޓްބޯޅައިގައި ރެއާލް މެޑްރިޑުން ކުރަމުން އަންނަ ރަސްކަމަށް ޕީއެސްޖީ އަށް ނިމުމެއް ގެނެވިދާނެ ކަމަށް އެ ޓީމުގެ ފޯވާޑް ކީލިއަން އެމްބާޕޭ ބުނެފި އެވެ.
މިދިޔަ ދެ ސީޒަނުގައި ވެސް ރެއާލް މެޑްރިޑުން ޗެމްޕިއަންސް ލީގު ކާމިޔާބުކޮށްފައިވާއިރު މި ފަހަރުގެ މުބާރާތުގެ ދެ ވަނަ ބުރުގައި ބައްދަލުކުރަން ޖެހެނީ ޕީއެސްޖީއާ އެވެ. އެ ޓީމުން ވަނީ ބާސެލޯނާގެ ނޭމާ އަދި މޮނާކޯ އިން އެމްބާޕޭ ގެނެސް ވަރުގަދަކޮށްދަ އެވެ.
އެމްބާޕޭ ގެންދަން މެޑްރިޑުން ވެސް މި ފަހަރު މަސައްކަތްކުރިއިރު އޭނާ ވަނީ ޕީއެސްޖީއާ ގުޅި 18 މެޗުން 11 ގޯލް ޖަހައިފަ އެވެ.
"ޔަގީން، އަހަރެމެންނަށް ރެއާލް މެޑްރިޑް ބަލިކުރެވިދާނެ. އެކަން ވެގެންދާނީ ވަރަށް ބޮޑު ޗެލެންޖަކަށް. އަދި އެކަން ފަސޭހައެއް ވެސް ނުވާނެ. އެކަމަކު އަހަރެމެން ފެބްރުއަރީއާ ހަމަޔަށް ކުރާ މަސައްކަތުން، އެ މެޗަށް ޓީމު ބިނާވެވި އަހަރެމެން ތިބޭނީ ތައްޔާރުވެފައި،" އެމްބާޕޭ ބުންޏެވެ.
އޭނާ ބުނީ ޗެމްޕިއަންސް ލީގު ކާމިޔާބުކުރަން ބޭނުން ނަމަ ވަރުގަދަ ޓީމުތައް ބަލިކުރަން ޖެހޭ ކަމަށާއި މެޑްރިޑަކީ ސުވާލެއް ނެތް ގޮތެއްގައި އެންމެ ވަރުގަދަ އެއް ޓީމު ކަމަށެވެ.