10 ޖުލައި 2016 - 20:37
ބައެއް ރަށްރަށުގައި އަނެއްކާ ވެސް ޑެންގީ ހުން ވަރަށް ބާރަށް ފެތުރި، މިދިޔަ ދެ ހަފުތާގައި އެ ހުން ޖެހުނު މީހުންގެ އަދަދު 100 އަށް ވުރެ މައްޗަށް އަރައިފި އެވެ.
ހެލްތު ޕްރޮޓެކްޝަން އެޖެންސީން ބުނި ގޮތުގައި މިދިޔަ ދެ ހަފުތާ ތެރޭގައި 100 އަށް ވުރެ ގިނަ މީހުންނަށް ޑެންގީ ޖެހިގެން ރިޕޯޓުކޮށްފައި ވެ އެވެ. އެންމެ ގިނަ ރިޕޯޓު ލިބިފައި ވަނީ، އެ އެޖެންސީން ބުނި ގޮތުގައި، ހއ. އިހަވަންދޫންނެވެ.
ހއ. އިހަވަންދޫ ސިއްހީ މަރުކަޒު ހިންގުމާ ހަވާލުވެ ހުންނެވި ޝަހުމާ މޫސާ ވިދާޅުވި ގޮތުގައި މިދިޔަ އޭޕްރީލް މަހުން ފެށިގެން އިއްޔެގެ ނިޔަލަށް ޑެންގީ ޖެހިގެން 56 މީހަކު ޑޮކްޓަރަށް ދައްކާފައި ވާއިރު، މި ހުން ޖެހިފައިވާ ތިން މީހަކު މިހާރު ވެސް އެ ތަނުގައި އެޑްމިޓްކޮށްފައި އެބައޮތެވެ. އަދި 3،000 އަށް ވުރެ ބޮޑު އާބާދީއެއް އޮންނަ އިހަވަންދޫގައި މި ހުން ޖެހިގެން ރިޕޯޓު ކުރާ މިންވަރު ދުވަހުން ދުވަހަށް އިތުރުވަމުން އަންނަ ކަމަށް ވެސް އޭނާ ވިދާޅުވި އެވެ.
ޝަހުމާ ވިދާޅުވި ގޮތުގައި ރަށުގެ ހާލަތު އޮތް ގޮތުން ރައްޔިތުން ތިބީ ވަރަށް ކަންބޮޑު ވެފަ އެވެ.
"ކޮންމެ ދުވަހަކު ވެސް އެބަ ޑެންގީގެ ކޭސްއެއް ފެނޭ. ހުން އެއްގޮތަކަށް ވެސް ކޮންޓްރޯލެއް ނުވޭ. އެހެންވެ، ހުރިހާ އެންމެން ވެސް ތިބީ ވަރަށް ބޮޑަށް ކަންބޮޑުވެފައި،" އޭނާ ވިދާޅުވި އެވެ.
ޝަހުމާ ވިދާޅުވި ގޮތުގައި އެއް ދުވަހުގެ ތެރޭގައި ހަތަރު މީހަކު ޑެންގީ އަށް ޕޮޒިޓިވް ވެފައި ވާއިރު، ހުން ޖެހެނީ ގިނައިން ކުޑަކުދިންނަށެވެ.
އިހަވަންދު އަށް މި ދުވަސްވަރު ވިއްސާރަ ކުރާއިރު، ޑެންގީ ކޮންޓްރޯލް ކުރުމަށް ސިއްހީ މަރުކަޒުން އަންނަނީ ގިނަ މަސައްކަތްތަކެއް ކުރަމުންނެވެ. އެ ގޮތުން، ގޭގެ އަށް ގޮސް އެ ހުމާ ގުޅޭ ގޮތުން މީހުން ހޭލުންތެރި ކުރުމުގެ މަސައްކަތް ކުރަމުން އަންނައިރު، ރަށު ތެރެ ސާފު ކުރަމުން އަންނަ ކަމަށް ވެސް ސިއްހީ މަރުކަޒުން ބުންޏެވެ.
ޑެންގީ ޖެހިގެން މިދިޔަ ބުރާސްފަތި ދުވަހު ލ. އިސްދޫގައި ކުޑަކުއްޖަކު މަރުވެފައި ވާއިރު، އެ އަތޮޅުގެ އެހެން ރަށްރަށުގައި ވެސް މި ހުން ދަނީ ހަލުއިކަމާ އެކު ފެތުރެމުންނެވެ.
އިސްދޫ ކައުންސިލްގެ މެމްބަރަކު ވިދާޅުވި ގޮތުގައި އެ ރަށުގައި ޑެންގީގެ ނުރައްކާ އަދިވެސް ވަރަށް ބޮޑެވެ. އެ ގޮތުން، ހަތަރު ކުޑަކުއްޖަކު ސިއްހީ މަރުކަޒުގައި އެޑްމިޓް ކޮށްފައި ވާއިރު، އަށް ކުއްޖަކަށް ގަމު ރީޖަނަލް ހޮސްޕިޓަލުގައި ވެސް މިހާރު ފަރުވާ ދެމުން އަންނަ ކަމަށް އޭނާ ވިދާޅުވި އެވެ.
"ޑެންގީ މިހާ ބާރަށް ފެތުރެމުން ދާތީ އަޅުގަނޑުމެން ވެސް މި ތިބީ ވަރަށް ކަންބޮޑުވެފައި،" ކައުންސިލްގެ މެމްބަރު ވިދާޅުވި އެވެ.
ޑެންގީ ކޮންޓްރޯލް ކުރަން ކުރަމުން އަންނަ މަސައްކަތްތަކަށް މޫސުން ގޯސްވުމުގެ ސަބަބުން ހުރަސް އެޅިފައިވާ ކަމަށް ބައެއް ރަށްރަށުން ބުނެ އެވެ. އެ ގޮތުން، ރަށު ތެރެ ފޮގު ނުކުރެވުމުގެ އިތުރަށް، ވިއްސާރައިގެ ސަބަބުން މަދިރި އާލާވުން އިތުރުވެފައިވާ ކަމަށް އެ ރަށްރަށުން ބުނެ އެވެ.
މިދިޔަ އަހަރު ޑެންގީ ހުން ޖެހިގެން ހާހަކަށް ވުރެ ގިނަ މީހުން ރިޕޯޓްކޮށްފައި ވާއިރު، އޭގެ ތެރެއިން ހަ މީހަކު މަރުވި އެވެ. މި އަހަރުގެ މިހާތަނަށް ވެސް ވަނީ ޑެންގީ ޖެހިގެން ގާތްގަނޑަކަށް 500 މީހުން ރިޕޯޓްކޮށްފަ އެވެ.
ޑެންގީ ޖެހިގެން މަރުވި ކަމަށް ބެލެވޭ ހަތަރު ކޭސް އެއް މި އަހަރުގެ މިހާތަނަށް ވަނީ ފާހަގަކުރެވިފަ އެވެ.