26 ޑިސެމްބަރ 2017 - 21:49
ގދ. ގައްދު އަށް މިއަދު ހަވީރު ވިއްސާރަވެ ރަށުގެ ބައެއް ގެތަކަށް ގެއްލުން ލިބިއްޖެ އެވެ.
އެ ރަށު ކައުންސިލްގެ މެމްބަރު އާމިރު އަބްދުﷲ ވިދާޅުވީ ގާތްގަނޑަކަށް ދޮޅު ގަޑިއިރުވަންދެން މެދުނުކެނޑި ވާރޭވެހުމުން ރަށުގެ ޗަކަ ބިން ސަރަހައްދުގައި ފެންބޮޑުވެފައިވާ ކަމަށެވެ. އެހެންވެ އެ ސަރަހައްދާ ކައިރީގައި ހުރި ބައެއް ގެތަކަށް ފެން ވަދެފައިވާ ކަމަށް އޭނާ ވިދާޅުވި އެވެ.
އާމިރު ވިދާޅުވި ގޮތުގައި އެ ސަރަހައްދުގައި ފޫޓަކަށް ވުރެ ބޮޑަށް ވަނީ ފެންބޮޑުވެފަ އެވެ. އެއް ގެއެއްގައި މީހުންނަށް ނިދާ ނޫޅެވޭ ވަރަށް ފެން ބޮޑުވެފައިވާތީ، އެ ގޭ މީހުން އެހެން ތަނަކަށް ބަދަލުކުރުމުގެ މަސައްކަތް ވެސް އަންނަނީ ކުރަމުންނެވެ.
"ފެން ވަދެފައި ހުރި ބައެއް ގެތަކުން ފެން ހިންދުމުގެ މަސައްކަތް މިދަނީ ކުރަމުން. މިކަމުގައި އާއްމުންނާއި ފުލުހުންގެ އެހީތެރިކަން ލިބޭ،" އާމިރު ވިދާޅުވި އެވެ.
ވިއްސާރަވެ، ގައްދޫ މެޖިސްޓްރޭޓް ކޯޓަށާއި ކައުންސިލް އިދާރާ އަށް ވެސް މިދިޔަ ހަފުތާގެ ތެރޭގައި ވަނީ ގެއްލުން ލިބިފަ އެވެ.