28 ޑިސެމްބަރ 2017 - 19:38
އިސްލާމިކް ސްޓޭޓް (އައިއެސް) ޖަމާއަތުން އަފްޣާނިސްތާނުގެ ވެރިރަށް ކާބުލްގައި ޖާނުން ފިދާވެގެން މިއަދު ދިން ބޮމުގެ ހަމަލާތަކެއްގައި މަދުވެގެން 41 މީހަކު މަރާލައިފި އެވެ.
އައިއެސްގެ މި ހަމަލާ އަމާޒުކުރީ ޝީއީންގެ ސަގާފީ މަރުކަޒަކަށެވެ. އަދި މި ހަމަލާގައި އެ އިމާރާތުގައި ހުރި އަފްޣާން ނިއުސް އޭޖެންސީގެ އިދާރާ އަށް ވެސް ބޮޑެތި ގެއްލުންތަކެއް ލިބުނެވެ. ގޮވާތަކެތި ހަރުކޮށްފައި ހުރި ޖެކެޓެއް ގައިގައި ބަނދެގެން ހުރި މީހަކު އެ މަރުކަޒު ކައިރީގައި އޭނާގެ ހަށިގަނޑު ގޮއްވައިލުމާ އެކު، އެ ސަރަހައްދުގައި އިތުރު ތިން ބޮމެއް ގޮއްވައިލި އެވެ.
ބައެއް މީހުން ބުނާ ގޮތުގައި މި ހަމަލާ ދިނީ ހަށިގަނޑުގައި ގޮވާ ތަކެތި ހަރުކޮށްގެން ހުރި މީހަކު، ޝީއީންގެ ސަގާފީ މަރުކަޒު ތެރެއަށް ވަދެފަ އެވެ. މި ހަމަލާގައި މަދުވެގެން 41 މީހުން މަރުވެ އިތުރު 84 މީހަކު ޒަޚަމަވި އެވެ.
އަފްޣާންގެ ދާޚިލީ ވުޒާރާ އިން ބުނި ގޮތުގައި ސަގާފީ މަރުކަޒުގެ ތެރެއަށް މީހަކު ވަދެ ޖާނުން ފިދާވުމުގެ ކުޑަ އިރުކޮޅެއް ކުރިން، އެ ސަރަހައްދުގެ ބޭރުގައި ޖާނުން ފިދާވެގެން ބޮންތަކެއް ގޮއްވައިލި އެވެ. މި ހަމަލާ ދިނީ، އެ އިމާރާތުގެ އެންމެ ތިރީ ބަޔަށް ގިނަ އަދަދެއްގެ ބަޔަކު އެއްވެ، ކުރީގެ ސޯވިއެޓް ޔޫނިއަނުން 1979 ވަނަ އަހަރު އަފްޣާނިސްތާނަށް އަރައިގަތް ހާދިސާގެ ހަނދާން އައު ކުރަމުން ދަނިކޮށެވެ.
ނަމަވެސް މި ހަމަލާ ދިނުމުގައި ބައިވެރިވީ ކިތައް މީހުން ކަމެއް މުޅިން ސާފެއް ނުވެ އެވެ. މި ހަމަލާގެ ޒިންމާ، އައިއެސް ޖަމާއަތުން އުފުލާފައި ވިޔަސް، އެ ހަމަލާގައި ބައިވެރިވީ ކިތައް މީހުން ކަމެއް އަދި އެ ހަމަލާގެ މަގްސަދަކީ ކޮބައި ކަމެއް އެ ޖަމާއަތުން ނުބުނެ އެވެ.
ޝީއީންގެ ލީޑަރު އަބްދުލް ހުސައިން ރަމަޒާންދާދާ ބުނި ގޮތުގައި، ޖާނުން ފިދާވި އެކަކު އިނީ، އެ ތަނަށް އެއްވި މީހުންތަކުގެ ތެރޭގައި އިށީނދެގެންނެވެ. އޭނާ އެ ތަނުގައި އިނދެ އޭނާގެ ހަށިގަނޑު ގޮއްވައިލުމުން މީހުންތައް ފިލަން ދުވަމުން ދަނިކޮށް، އިތުރު ބޮންތަކެއް ގޮއްވައިލީ އެވެ.