03 ޖެނުއަރީ 2018 - 10:32
ބާސެލޯނާ (ޖެނުއަރީ 3) – އަނިޔާގެ ސަބަބުން ހަތަރު މަހެއްހާ ދުވަހު ކުޅުމާ ދުރުގައި ހުރި ބާސެލޯނާގެ ހުނަރުވެރި ވިންގާ އޮސްމާނޭ ޑެމްބެލޭ މާދަމާރޭ ކުޅުމުގެ ތެރެއަށް އަންނާނެ ކަމަށް ބެލެވެ އެވެ.
މިދިޔަ އަހަރުގެ އޮގަސްޓް މަހު ބޮރޫޝިއާ ޑޯޓްމަންޑުން 96.8 މިލިއަން ޕައުންޑަށް ބާސެލޯނާއާ ގުޅުނު ޑެމްބެލޭގެ ފަލަމަސްގަނޑަށް އަނިޔާވީ ސެޕްޓެމްބަރު 16 ވަނަ ދުވަހު ގެޓަފޭއާ ދެކޮޅަށް ކުޅުނު މެޗުގަ އެވެ. އެއީ އޭނާ އެ ކްލަބަށް ކުޅެދިން ތިން ވަނަ މެޗެވެ.
ފިންލެންޑުގައި އޮޕަރޭޝަންކޮށް ފަރުވާ ހޯދާފައިވާ ޑެމްބެލޭ ކުޅެން ނުކުންނާނެ ކަމަށް ބެލެވެނީ ސްޕެނިޝް ކަޕުގައި މާދަމާރޭ ސެލްޓާ ވީގޯއާ ދެކޮޅަށް ކުޅޭ މެޗުގަ އެވެ. އެއަށް ފަހު ބާސެލޯނާ ދެން ކުޅޭނީ ސްޕެނިޝް ލީގުގައި އާދީއްތަ ދުވަހު ލެވަންޓޭއާ ދެކޮޅަށެވެ.
ބާސެލޯނާ ދޫކޮށް ނޭމާ ދިއުމުން އެ ޓީމަށް ގެނައި ޑެމްބެލޭ އަކީ ވަރަށް ހުނަރުވެރި ވިންގެކެވެ. ޗެމްޕިއަންސް ލީގު ވެސް ކުރިއަށް އޮއްވާ އޭނާ ފިޓްވުމަކީ ބާސެލޯނާގެ ކޯޗު އާނެސްޓޯ ވަލްވާޑޭ އަށް ލިބޭ ބޮޑު ހިތްހަމަޖެހުމެކެވެ. ޗެމްޕިއަންސް ލީގުގެ ދެ ވަނަ ބުރުގައި އަންނަ މަހު އެ ޓީމު ވާދަކުރާނީ އިނގިރޭސި ޗެމްޕިއަން ޗެލްސީއާ އެވެ.