06 ޖެނުއަރީ 2018 - 18:38
ދޯހާ (ޖެނުއަރީ 6) - ގަތަރުގެ ބަޔަކަށް އުމްރާ ކުރުމުގެ ފުރުސަތު ސައުދީ އަރަބިއާ އިން ނުދިން ކަމަށް ތުހުމަތުކޮށްފި އެވެ.
ގަތަރުގެ އަލް ރާޔާ ނޫހުން ބުނި ގޮތުގައި އުމްރާގެ އަޅުކަމަށް މައްކާ އަށް ދާ ގަތަރު މީހުންނަށް ސައުދީން ދަނީ އެތައް ގޮތަކުން ދަތި ކުރަމުންނެވެ. އެ ނޫހުން ބުނި ގޮތުގައި މިދިޔަ ހަފުތާގައި އުމްރާ އަށް ދިޔަ ގަތަރުގެ 20 މީހަކު ވަނީ ޖިއްދާ އެއާޕޯޓުން ހުއްޓުވުމަށް ފަހު ކުވޭތަށް ޑިޕޯޓްކޮށްލައިފަ އެވެ. އެ މީހުން ޑިޕޯޓްކޮށްލީ ދެ ދުވަސް ވަންދެން "ބަންދުގައި" ބޭތިއްބުމަށް ފަހު ކަމަށް ވެސް ނޫހުން ބުނެފައިވެ އެވެ.
ގަތަރުގެ ނޫހުން ކުރި ތުހުމަތު ރިޔާޒުން ދޮގު ކުރެ އެވެ. މައްކާގެ ހަރަމްގެ ކަންކަން ބަލަހައްޓާ އޮފީހުން ބުނީ ގަތަރުގެ ބަޔަކަށް އުމްރާ ކުރުމުގެ ފުރުސަތު ނުދީ ފޮނުވާލި ކަމަށް ބުނެ ފަތުރާފައިވާ ޚަބަރަކީ ދޮގެއް ކަމަށެވެ. ސައުދީ އަރަބިއާ އިން ބުނީ ގަތަރާ ސިޔާސީ ގުޅުން ކަނޑާލި ފަހުން ވެސް އެ ގައުމުގެ އެތައް ބަޔަކު ހައްޖާއި އުމްރާގެ އަޅުކަން އަދާކޮށްފައިވާ ކަމަށެވެ.
ގަތަރުން ޓެރަރިޒަމަށް ވާގިވެރިވާ ކަމަށް ބުނެ މިދިޔަ އަހަރުގެ ޖޫން މަހު ސައުދީން ވަނީ ގަތަރާ ސިޔާސީ ގުޅުން ކަނޑާލައިފަ އެވެ. އޭގެ ފަހުން ހައްޖާއި އުމްރާ އަށް ދާ ގަތަރު މީހުންނަށް ތަފާތު އުނދަގޫތަކާ ދިމާވާ ކަމަށް ވަނީ ބުނެފަ އެވެ. ސައުދީއާ އެކު ޔޫއޭއީ، ބަހުރޭން އަދި މިސްރުން ވެސް ވަނީ ގަތަރާ ގުޅުން ކަނޑާލައިފަ އެވެ.