14 ޖެނުއަރީ 2018 - 06:00
ކަސްރަތުކުރާއިރު ހަށިގަނޑު ބަރުދާސްތުކުރާ އިހްސާސްތަކާއި ހަށިގަނޑަށް އަންނަ ބަދަލުތައް ބަރާބަރަށް ބަލަމުންދިޔުމަކީ މިހާރު ވަރަށް ގިނަ ބައެއްގެ އާދައެކެވެ. މިކަން ކުރެވޭނެ ކިތަންމެ ގޮތެއް އެބަހުއްޓެވެ. އެކަމަކު ފަތަމުން އެ ކަންކަން ބެލޭނެ ގޮތެއް ނެތުމަކީ ދެރަކަމެކެވެ.
މިކަން ހައްލުކޮށްދެނީ "ޒުވިމް" ގޮގްލްސް އެވެ. ފެނުގެ އަޑީގައި އޮވެގެން ވަގުތުން ވަގުތަށް ހުރިހާ މަޢުލޫމާތެއް ހިސާބުކޮށްދެއެވެ. ކޮންމެހެން ފަތާ ނިމިގެން ބަލަން މަޑުކުރާކަށްނުޖެހެއެވެ. ފަތަން ހޭދަކުރި ވަގުތާއި ބުރު ޖެހުނު އަދަދާއި ބުރު ބަދަލުކުރަން ޖެހުމުން އެކަން ވެސް މި ގޮގްލްސްގެ ލޮލުގައިވާ ބިއްލުރިކޮޅުން އަންގައިދެއެވެ. އެއީ ސްކްރީނެކެވެ. އަދި އޯޕަން ވޯޓާގައި ފަތަންޏާ މަގު ދައްކައިދޭން ވެސް މި ގޮގުލްސް އެހީތެރިވާނެ އެވެ.
ޒުވިމް ގޮގްލްސް އަޅައިގެން ހުންނައިރު ކަންހުޅި ކައިރިން އެ މީހެއްގެ ވިންދު ބަލަމުންދާނެއެވެ. ނަތީޖާއެއްގެ ގޮތުން އެއްވެސް ދަތިކަމެއް ނެތި ހިތުގެ ހިނގުމާއި ކެލަރީ އަންދާލެވުނު ވަރު ހޯދޭނެ އެވެ. މިކަންކަން އަންގައިދެނީ ގޮގްލްސް އަޅައިގެން ފަތަމުންދާއިރު ކަނާތު ލޮލާ ދިމާއަށް އަރަމުންދާ ނަމްބަރުތަކާއި އިރުޝާދުތަކުންނެވެ.
މި ގޮގްލްސްގެ ލެންސަކީ ނައްޓާ، ހަރުކުރެވޭ ގޮތަށް ހުންނަ ލެންސެކެވެ. ގިނަ ދުވަސްވެ، ބާވެއްޖެ ނަމަ 15 ޑޮލަރަށް ގަންނަން ލިބެއެވެ.