15 ޖެނުއަރީ 2018 - 13:20
އެންމެ ހާހެއްހާ ވޯޓުގެ ތަފާތުން ހީނާ ޚާން ބަލިކޮށް "ބިގް ބޮސް" ސީޒަން 11ގެ ޓްރޮފީ ޝިލްޕާ ޝިންޑޭ ހޯދައިފި އެވެ. ރަނަރަޕްގެ މަގާމު ލިބުނު ހީނާ ބުނީ އޭނާ އާއި ޝިލްޕާއާ މެދުގައި ހުރީ ހާހެއްހާ ވޯޓުގެ ތަފާތު ކަމަށް ޝޯގެ ހޯސްޓް ސަލްމާން ޚާން ބުނި ކަމަށެވެ.
ކޮންމެ ސީޒަނެއްގައި ވެސް ބެލުންތެރިންނަށް މަގުބޫލު އެކަކު ނުވަތަ ބަޔަކު ތިބެ އެވެ. އެގޮތުން މިފަހަރުގެ ސީޒަންގައި އެންމެ ގިނަ ބަޔެއްގެ މަގުބޫލުކަން ހޯދީ ހީނާ އާއި ޝިލްޕާ އެވެ.
"ސަލްމާން ބުނި އަހަރެމެން ދެ މީހުންގެ މެދުގައި ވޯޓުގެ ތަފާތު ވަރަށް ކުޑައޭ. އެހެންވީމަ ޝިލްޕާއަށް ޓްރޮފީ ލިބުނަސް އެއީ މާބޮޑު މައްސަލައެއް ނޫނޭ. ފައިނަލަށް ދިޔަ ހަތަރު މީހުންނަކީ ވެސް ކާމިޔާބީ ހާސިލު ކުރެވުނު މީހުންގެ ގޮތުގައޭ ބެލޭނީ،" ހީނާ ބުންޏެވެ.
ހީނާ އަކީ ބިގް ބޮސްގެ ގޭގައި ހޭދަކުރި ދުވަސްތަކުގައި ވަރަށް ބޯހަރު އަދި މީހުންނާ ދިމާލަށް ހިތަށް އެރި އެއްޗެއް ކިޔަމުންދިޔަ މީހަކަށް ވާތީ ޝޯ ކާމިޔާބު ނުކުރެވުމުން އޭނާ ވަރަށް ރުޅިގަދަކޮށްލާނެ ކަމަށް ގިނަ ބަަޔަކު ހީކުރި އެވެ. ނަމަވެސް ރޭ އޮތް ގްރޭންޑް ފިނާލޭގައި ހީނާ ފެނުނީ ވަރަށް މަޑުމައިތިރިކޮށެވެ. އެއްވަނަ އަށް ދިޔައީ ޝިލްޕާކަން އިއުލާން ކުރުމުން އޭނާ ޝިލްޕާގެ ގައިގައި ބައްދާލައި މަރުހަބާ ކިޔާފައިވެ އެވެ.
ސަތޭކައަށް ވުރެ ގިނަ ދުވަސް ވަންދެން ގިނަ ގޮންޖެހުންތަކާ ކުރިމަތިލައި، ޝޯ ކާމިޔާބުކުރި ޝިލްޕާ ބުނި ގޮތުގައި އޭނާގެ ކާމިޔާބީގެ އަސްލަކީ ފޭނުން އޭނާއަށް ކުރި ތާއީދެވެ. މި ޓްރޮފީގެ ހައްގުވެރިންނަކީ އޭނާއަށް ތާއީދުކުރުމުގައި ރެއާ ދުވާލު ކެނޑިނޭޅި މަސައްކަތްކުރި ފޭނުން ކަމަށް ޝިލްޕާ ބުންޏެވެ.
ބިގް ބޮސް ކާމިޔާބު ކުރި ޝިލްޕާއަށް ޓްރޮފީއާއެކު 44 ލައްކަ ރުޕީސް ލިބުނެވެ.
ޝިލްޕާ ބުނީ އޭނާގެ "ބިގް ބޮސް"ގެ ދަތުރަކީ ގަބޫލުކުރަން ވެސް ދަތި ދަތުރެއް ކަމަށެވެ. ޝޯގައި ބައިވެރިވި ވުމުގެ ކުރިން އޭނާއަކީ ޝޯގެ ފޭނެއް ނޫން ކަމަށް ވެސް ބުންޏެވެ. އޭނާ ބުނީ ބިގް ބޮސްގެ ތަޖުރިބާއަކީ އޭނާގެ މުޅި ދިރިއުޅުން ބަދަލުކޮށްލި ތަޖުރިބާއެއް ކަމަށެވެ.
"ބިގް ބޮސް" ގައި ހޭދަ ކުރި ދުވަސްތަކުގައި ޝިލްޕާ ވަނީ އެ ގޭގައި ތިބި ގިނަ ބައިވެރިންގެ މަންމައެއް ފަދައިން އެމީހުންނަށް ކާންދީ ބަލަހައްޓާފަ އެވެ. ކުރީކޮޅު އޭނާ ބައެއް މީހުންނާ ޒުވާބުކޮށް ހެދި ނަމަވެސް މަޑުމަޑުން އޭނާ ވަނީ ޝޯގެ ކޮންޓްރޯލް ނަގައި ބެލުންތެރިންގެ ހިތްތައް އަތުލާފަ އެވެ. އެހެންވެ ޝިލްޕާ ޝޯ ކާމިޔާބުކުރާނެ ކަމަށް ކުރިން ވެސް އޮތީ ބެލެވިފަ އެވެ.
އެހެން ސީޒަންތަކުގައި ގްރޭންޑް ފިނާލޭ ދެއްކުމުގެ ކުރިން އެއްވަނައަށް ދިޔަ މީހާގެ ނަން ލީކުވެފައިވާތީ، "ބިގް ބޮސް" އުފައްދާ ފަރާތުން މިފަހަރު ވަނީ އެހެން ސީޒަންތަކުގައި ނުގެންނަ ކަހަލަ ބަދަލެއް އެންމެ ފަހު ވަގުތު ޝޯ އަށް ގެނެސްފަ އެވެ. އެއީ ފައިނަލަށް ދިޔަ ހަތަރު މީހުންގެ ތެރެއިން އެންމެ މަދުން ވޯޓު ލިބުނު ދެ މީހުން ކަޓުވާލުމަށްފަހު އެންމެ ފަހުން ތިބޭ ދެ ބައިވެރިންނަށް ވޯޓު ލުމަށް އަލުން ހުޅުވާލުމެވެ.
ފައިނަލް ދެ ޖާގައިގައި ތިބީ ހީނާ އާއި ޝިލްޕާ ކަމަށް ވާތީ މި ދެ ބައިވެރިންނަށް އަލުން ވޯޓުލާން ހުޅުވާލީ ޝޯގެ ވަކި ހިސާބަކުންނެވެ. އެއްވަނަ އަށް ދިޔަ ފަރާތް އިއުލާން ކުރީ ލިބުނު ވޯޓުު ވަގުތުން ގުނުމަށް ފަހުގަ އެވެ.