18 ޖެނުއަރީ 2018 - 06:03
ފިލްމު ކުޅޭ ބަތަލާއިން ކައިވެނި ކުރުމުން އެ މީހުންނާ މެދު ފިލްމު އިންޑަސްޓްރީން ދެކޭ ގޮތް ބަދަލުކުރަން ޖެހޭ ކަމަށް ބަތަލާ ސޯނަމް ކަޕޫރު ބުނެފި އެވެ. ސޯނަމް މިހެން ބުނެފައި މިވަނީ އަންނަ އޭޕްރީލް މަހު ސޯނަމް އޭނާގެ ލޯބިވެރިޔާ އާނަންދު އަހޫޖާއާ ކައިވެނިކުރަން އުޅޭ ކަމުގެ ޚަބަރުތައް ގަދަވެފައި ވަނިކޮށެވެ.
ސޯނަމް ބުނި ގޮތުގައި ކައިވެންޏާ ބެހޭ ގޮތުން މީޑިއާ އިން އޭނާއާ ކުރާ ސުވާލުތަކަށް ޖަވާބު ދޭން ފަށާނީ ފިލްމު އިންޑަސްޓްރީގައި މަސައްކަތްކުރާ ހުރިހާ ފިރިހެން އެކްޓަރުންނާ ވެސް ހަމަ އެ ސުވާލުތައް ކުރަން ފެށީމަ އެވެ.
"އަހަރެންގެ ކައިވެންޏާ ގުޅޭ ގޮތުން މީޑިއާ އިން ކުރާ ސުވާލުތަކަށް ޖަވާބު ލިބޭނީ ފިރިހެން އެކްޓަރުންނާ ވެސް ހަމަ ތި ސުވާލުތައް ކޮށް ކައިވެންޏަށްފަހު ކެރިއަރުގައި ކުރިޔަށް ދާން ގަސްތުކުރަނީ ކިހިނެއްތޯ އާއި ދަރިއަކު ލިބުމަށް ފަހު އަލުން ފިލްމީ ދުނިޔެއަށް އެނބުރި އަންނާނަންތޯ އެމީހުންނާ ވެސް ސުވާލު ކުރުމުން. ބަތަލާއިންނާ މެދު ދެކޭ ގޮތް ހަގީގަތުގައި ވެސް ބަދަލުކުރަން ޖެހޭ،" ސޯނަމް ބުންޏެވެ.
މާޒީގައި ކަންތައްތައް ވެފައިވާ ގޮތަށް އިޝާރާތްކުރަމުން ސޯނަމް ބުނީ ކުރީ ޒަމާނުގައި ފިލްމު ކުޅުނު ބަތަލާއިންގެ ތެރޭގައި ހިމެނޭ ނޫތަން، ވަހީދާ ރަހްމާން، ނަރްގިސް އަދި ޝަރުމީލާ ޓޭގޯ އަކީ ވެސް ކައިވެންޏަށް ފަހު ގިނަ ފިލްމުތަކެއް ލީޑް ރޯލު ކުޅެފައިވާ ތަރިންނެވެ.
އޭގެ ފަހުން ޑިމްޕަލް ކަޕާޑިއާ، މާދުރީ ޑިކްޝިޓް އަދި ކާޖޮލް ފަދަ ބަތަލާއިން ވެސް ކައިވެނިކޮށް ދަރިން ލިބުނު ފަހުން ވެސް ފިލްމީ މަސައްކަތުގައި އެބައުޅެ އެވެ. އަދި އަނުޝްކާ ޝަރުމާ ވެސް ދާދިފަހުން ވަނީ ކައިވެނިކޮށްފަ އެވެ. އަދި މިހާރުވެސް އޭނާ އަންނަނީ ޝާހްރުކް ޚާންގެ "ޒީރޯ"ގައި މަސައްކަތް ކުރަމުންނެވެ. އެހެންވެ ފިލްމު ޑައިރެކްޓަރުންގެ ވިސްނުން ކޮންމެވެސް ވަރަކަށް ބަދަލުވަމުންދާ ކަމަށް ސޯނަމް ވެސް އެއްބަސް ވި އެވެ.
ނަމަވެސް އޭނާ ގަބޫލުކުރާ ގޮތުގައި ކައިވެނިކުރުމަށްފަހު ފިލްމުތަކުގެ ލީޑް ރޯލު ދޭން ޖެހިލުންވާ ޑައިރެކްޓަރުންނާއި ޕްރޮޑިއުސަރުން ފިލްމު އިންޑަސްޓްރީގައި އެބަތިއްބެވެ. ކުޅޭނެ ރަނގަޅު ފިލްމުތައް ނުލިބޭނެތީ ބައެއް ބަތަލާއިން މިހާރު ވެސް ކައިވެނިކޮށްގެން ސިއްރު ކޮށްގެން އުޅެ އެވެ. ބަތަލާ ސުރްވީން ޗައުލާ ވެސް ކައިވެނިކޮށްގެން އުޅޭކަން އެނގުނީ ކައިވެނިކުރިތާ ދެ އަހަރަށް ވުރެ ގިނަ ދުވަސް ވެއްޖެ އެވެ. އަދި ޖޫހީ ޗައުލާ ވެސް ކައިވެނިކޮށްގެން އެކަން ސިއްރުކޮށްގެން ގިނަ އަހަރު ތަކެއް ވަންދެން އުޅުނެވެ.
ސޯނަމް އެންމެ ފަހުން ކުޅުނު "ޕެޑްމޭން" މި މަހު 25 ގައި ރިލީޒްކުރާނެ އެވެ. މިއީ މައްސަރުކަންތައް ޖެހުމުން އަންހެނުންނާ ދޭތެރޭ މީހުން ކަންތައް ކުރާ ގޮތަށް ބިނާކޮށް އެކަމާ ގުޅޭ ހޭލުންތެރިކަން އުފައްދަން ތައްޔާރުކޮށްފައިވާ ފިލްމެކެވެ.