19 ޖެނުއަރީ 2018 - 07:06
މި ލިޔުމުގެ ތިރީގައި ޔޫޓިއުބް ވީޑިއޯ ކްލިޕެއް އޮންނާނެ އެވެ. މައުސް ތިރި އަށް ކަހާލާފައި ފުރަތަމަ ކަމަށް އެ ވީޑިއޯ ކްލިޕް ބަލާލާށެވެ. ހާސްނުވާށެވެ. ސްޕީކަރުތައް ވެސް ގުޅާފައި ތިޔަ ހުރީ ރަނގަޅަށެވެ. އަޑުބާރުކުރާ ހެންޑެލި ވެސް މުޅިން ހެޔޮވަރެވެ. ވީޑިއޯއިން އަޑުނުއިވެނީ ތިޔަ ކޮމްޕިއުޓަރުގެ މައްސަލައަކުން ނޫނެވެ. ވީޑިއޯގައި ހަމަ އެއްވެސް އަޑެއް ނެތީ އެވެ. ސަބަބު މި ކިޔައިދެނީ އެވެ.
މިއީ "ތްރައިވް" އެވެ. ސެމްސަންގް ގެލަކްސީ ނޯޓް8 ބޭނުންކުރާ މީހުންނަށް އޮތް ހަދިޔާއެކެވެ. ތްރައިވް އަކީ ސްމާޓް އެޕްލިކޭޝަނެކެވެ. ސެމްސަންގް ގެލަކްސީ އެޕް ސްޓޯރުން ހިލޭ ލިބެ އެވެ. އެކަމަކު މި ވަގުތު ހަމަ އެކަނި ނޯޓް8 ބޭނުންކުރާ މީހުންނަށެވެ. ގެލަކްސީ މަރުކާގައި ދެން ހުރި ފޯނުތަކަށް ވެސް ފަހު ތާރީޚެއްގައި ތްރައިވް ލިބޭނެ ކަމަށް ވެ އެވެ.
ތްރައިވް އެޕްލިކޭޝަނުން ކޮށްދޭ ކަމަކީ، ފޯނާ ދުރުގައި، އަރާމުކުރާނެ ވަގުތުކޮޅެއް ތަނަވަސްކޮށްދިނުމެވެ. ބޭނުން ނަމަ ހުރިހާ ނޮޓިފިކޭޝަނެއް، އެ ނޫން ގޮތެއްގައި އިޚުތިޔާރުކުރެވޭ އެޕްލިކޭޝަނަކުން ނޮޓިފިކޭޝަން ހުއްޓުވާލަ ދިނުމެވެ. ކޮންމެހެން ގުޅެންޖެހޭ ބަޔަކު ތިބި ނަމަ އެ ބަޔަކު އިސްތިސްނާ ވެސް ކުރެވެ އެވެ.
ޒަމާނީ ދިރިއުޅުމުގައި ސްމާޓްފޯނަކީ މުހިންމު އާލާތެކެވެ. އެއާ ދުރުވެވެން ނެތް އާލާތެެކެވެ. އެކަމަކު ވެސް ގުނަވަންތަކަށް ހުސް ވަގުތުކޮޅެއް ދިނުމަށްޓަކައި، ފޯނާ ދުރުވާން ވެސް ޖެހެ އެވެ. އެ ވަރުގެ ކަމެއް ކުރެވޭހާ ބާރު އަމިއްލަ އިޚުތިޔާރުގައި ނެތް މީހުންނަށް، ތްރައިވް ކޮންމެހެން ވެސް މުހިންމެވެ.
ތްރައިވް އަކީ ސެމްސަންގް އަމިއްލަ އެޕްލިކޭޝަނެއް ނޫނެވެ. މި އެޕްލިކޭޝަން އުފައްދާފައި ވަނީ "ތްރައިވް ގްލޯބަލް" އިންނެވެ. ތްރައިވް ފޯނަށް އެޅުމުގެ ކުރިން ވީޑިއޯ ކްލިޕް ބަލައިލަން އަދި ވެސް ހަނދާންކޮށްދެމެވެ. މި ލިޔުމުގައި ބުނެނުދެވި ހުރި ފީޗާތައް ވީޑިއޯ ކްލިޕުން ފެންނާނެ އެވެ. ވީޑިއޯގައި އަޑުނެތް ސަބަބަކީ، ތްރައިވް އަކީ ހިމޭންވުމަށް ބާރުއަޅާ އެޕްލިކޭޝަނަކަށް ވާތީ އެވެ.