19 ޖެނުއަރީ 2018 - 12:59
މެޑްރިޑް (ޖެނުއަރީ 19) - ސްޕެނިޝް ކަޕުގެ ކުއާޓާ ފައިނަލުގެ ފުރަތަމަ ލެގުގައި ރޭ ރަށުން ބޭރުގައި ލެގަނޭސް އަތުން 1-0 އިން ރެއާލް މެޑްރިޑް މޮޅުވުމުން އެ ޓީމުގެ ކޯޗު ޒިނެދިން ޒިދާނަށް ހަމަޖެހުމެއް ލިބިއްޖެ އެވެ.
މިއީ ފާއިތުވި ހަތަރު މެޗުގެ ތެރެއިން ރެއާލަށް ހޯދުނު ފުރަތަމަ މޮޅެވެ. މި މެޗުގެ ކުރިން ރެއާލް ކުޅުނު ތިން މެޗުގެ ތެރެއިން ދެ މެޗުން ވަނީ އެއްވަރުވެފަ އެވެ. އަނެއް މެޗުންވީ ބައްޔެވެ.
ރޭގެ މެޗަށް ރެއާލުން ނުކުތީ ކްރިސްޓިއާނޯ ރޮނާލްޑޯ އާއި ގަރެތު ބޭލް ނުލަ އެވެ. އަދި އަނިޔާގެ ސަބަބުން މި މެޗުގައި ފްރާންސްގެ ފޯވާޑް ކަރިމް ބެންޒެމާ ވެސް ނުކުޅެ އެވެ. މި މެޗުގައި ރެއާލް މޮޅުވި ލަނޑު މެޗުގެ ފަހު ވަގުތު ކާމިޔާބުކުރީ އުއްމީދީ މިޑްފީލްޑަރު މާކޯ އަސެންސިއޯ އެވެ. މީގެ އިތުރުން ވެސް ލަނޑު ޖަހާނެ ރަނގަޅު ފުރުސަތުތައް ރެއާލް އަތުން ވަނީ ބޭކާރުވެފަ އެވެ.
"އުއްމީދަކީ މިއީ ރެއާލުގެ ދަށް ނަތީޖާތައް އަނބުރާލުމުގެ ފެށުމެއް ކަމަށް. އަހަރެމެންގެ އެންމެ ރަނގަޅު ކުޅުން މި މެޗުގައި ނުދެއްކުނު ނަމަވެސް މި ނަތީޖާ އަކީ ރަށުން ބޭރުގައި ވަރަށް މަސައްކަތުން ހާސިލްވި ކަމެއް،" ޒިދާން ބުންޏެވެ.
މިދިޔަ ސީޒަނުގައި ރެއާލުން ވަނީ ޗެމްޕިއަންސް ލީގާއި ސްޕެނިޝް ލީގު ޗެމްޕިއަންކަން ހޯދައިފަ އެވެ. އެހެން ނަމަވެސް ފަހަކަށް އައިސް އެ ޓީމުގެ ކުޅުން ވަނީ ވަރަށް ބޮޑަށް ދަށްވެފަ އެވެ. ޒިދާން ބުނީ ރެއާލް ކުރިން އޮތް ލެވެލަށް ގެންދިއުމަށް ބޭނުންވަނީ ސިލްސިލާ ގޮތެއްގައި ރަނގަޅު ނަތީޖާތަކެއް ނެރުން ކަމަށެވެ.
"އަހަރެމެން އެބަޖެހޭ މެޗުތަކުން މޮޅުވަން. ކްލީންޝީޓް ތަކެއް ވެސް ހޯދަން. ލެގަނޭސް މެޗަކީ އެ ގޮތުގެ މަތިން ކުރިއަށް އެޅުނު ފިޔަވަޅެއް. ކުރިން މެޗުތަކުގައިވީ ގޮތް ބެލުމަކުން ވާނެ ކަމެއް ނެތް. އެއީ ފިލާވަޅެއްގެ ގޮތުގައި ނެގުން މުހިއްމީ،" ޒިދާން ބުންޏެވެ.
އޭނާ ބުނީ ރެއާލުގެ ކުޅުންތެރިން ކަަމަށްވާ ބޭލް އާއި ރޮނާލްޑޯގެ މުސްތަގުބަލާ ގުޅުވައިގެން ދައްކަނީ އެއްވެސް ހަގީގަތެއް ނެތް ވާހަކަތަކެއް ކަމަށެވެ.
ރެއާލުގެ ދަނޑުގައި ލެގަނޭސްއާ ދެކޮޅަށް ކުޅޭ ދެ ވަނަ ލެގުގެ މެޗު އޮންނާނީ އަންނަ ބުދަ ދުވަހުގެރޭ އެވެ.