28 ޖެނުއަރީ 2018 - 06:11
އަހަރެއްހާ ދުވަހު ގިނަ މައްސަލަތަކެއްގައި އުޅުމަށް ފަހު "ޕަދްމާވަތު" މި ވަނީ ރިލީޒްކޮށްފަ އެވެ. ސަންޖޭ ލީލާ ބާންސާލީގެ ހުނަރު އޭގެ އެންމެ ފުރިހަމައަށް ދައްކުވައިދޭ މި ފިލްމުގެ ތަރިންނަކީ ދީޕިކާ ޕަދުކޯން އާއި ޝާހިދު ކަޕޫރު އަދި ރަންވީރު ސިންގެވެ. ރަންވީރު އާއި ޝާހިދުގެ ރޯލަށް ގިނަ ބަޔަކު ތައުރީފު ކުރަމުން އަންނައިރު މި ދެ ރޯލު ވެސް ފުރަަތަމަ ކުޅެން ލިބުނީ ޝާހްރުކް ޚާނަށެވެ. ދެ ރޯލުން ކުރެ އެއްވެސް ރޯލެއް ކުޅެން ޝާހްރުކް އެއްބަސް ނުވީ އެވެ.
ޑައިރެކްޓަރު ފުރަތަމަ ބޭނުންވީ ޝާހިދު ކުޅެފައިވާ މަހާރަވަލް ރަތަން ސިންގްގެ ރޯލު ޝާހްރުކް ލައްވާ ކުޅުވާށެވެ. ނަމަވެސް އޭނާ އެ ރޯލު ދޫކޮށްލީ އެވެ. ފިލްމު ބިނާވެފައިވަނީ ރާނީ ޕަދްމާވަތީ އާއި އަލާއުއްދީން ޚިލްޖީ އަށް ކަމަށް ވާތީ އޭނާއަށް ކުޅެން ލިބުނު ކެރެކްޓާގައި ކުރާނެ މާ ބޮޑު ކަމެއް ނެތް ކަމަށް ބުނެފަ އެވެ.
އެ ފިލްމު ނުކުޅެން ޝާހްރުކް ނިންމި ސަބަބު އެނގުމުން ރަންވީރު ކުޅުނު ޚިލްޖީގެ ރޯލު ބާންސާލީ ޝާހްރުކަށް ހުށަހެޅި އެވެ. ނަމަވެސް އެ ރޯލަށް ވެސް އޭނާ އިންކާރު ކުރީ އެވެ. ސަބަބެއް ކަމަށް އޭނާ ބުނީ "ރައީސް"ގައި އޭނާ ކުޅުނު ރޯލަށް ވެސް ވަރަށް ގިނަ ބަޔަކު ހިތްހަމަނުޖެހިފައި ވާތީ ޚިލްޖީގެ ރޯލު ކުޅެގެން އިތުރު މައްސަލަތަކަކާ ކުރިމަތިލާން ބޭނުން ނުވުމެވެ.
އެންމެ ފުރަތަމަ "ޕަދްމާވަތު" އަށް ބާންސާލީ ބޭނުންވީ އައިޝްވަރިޔާ ރާއީ އާއި ސަލްމާން ޚާނެވެ. ފިލްމު ކުޅެން އައިޝްވަރިޔާ އާއި ސަލްމާން ވެސް އެއްބަސްވި އެވެ. ނަމަވެސް އައިޝްވަރިޔާގެ ޝަރުތަކީ ސަލްމާނާއި އޭނާ އެކުގައި ކުޅޭ އެއްވެސް މަންޒަރެއް ފިލްމުގައި ނެތުމެވެ. ނަމަވެސް ސަލްމާނު މިކަމަކާ އެއްބަހެއް ނުވި އެވެ. އޭނާ ބޭނުންވީ "ހަމް ދިލް ދޭ ޗުކޭ"ގެ ޖާދޫ އަނެއްކާވެސް އެ ދެ މިހުން އެކުގައި ސްކްރީނަށް ގެންނާށެވެ. މި އަރާރުމާ ހެދި މި ދެ ތަރިން ލައްވާ ފިލްމު ކުޅުވުމުގެ ޚިޔާލު ބާންސާލީ ދޫކޮށްލީ އެވެ.