14 ޖުލައި 2016 - 11:17
ލިވަޕޫލް (ޖުލައި 14) - ލިވަޕޫލުގެ އިޓަލީ ފޯވާޑް މާރިއޯ ބަލޮޓެލީ ކުޅޭނެ އެހެން ކްލަބެއް ހޯދުމަށް އެ ޓީމުގެ ކޯޗު ޔާގެން ކްލޮޕް އަންގައިފި އެވެ.
އޭސީ މިލާނުން 2014 ވަނަ އަހަރު ލިވަޕޫލާ ގުޅުނު ފޯވާޑް ލޯނެއްގެ ދަށުން މިދިޔަ ސީޒަނުގައި ކުޅުނީ މިލާނަށެވެ. އެ ކްލަބުން އިތުރަށް އޭނާ ބަހައްޓަން ބޭނުންނުވުމުން އެނބުރި ލިވަޕޫލަށް ގޮސް މިހާރު އަންނަނީ އެ ކްލަބާ އެކު ޕްރީ ސީޒަން ތަމްރީން ހަދަމުންނެވެ.
"ބަލޮޓެލީގެ ކެރިއަރުގައި މި ވަގުތު އޭނާ އެ ހުރީ، ފުރަތަމަ އެގާރައިން ޖާގަ ހޯދަން ހަތަރު ފަސް ކުޅުންތެރިންނާ ވާދަކުރަން ޖެހޭ ފަދަ ސްޓޭޖެއްގައެއް ނޫން. އެހެންވީމާ އެކަމަށް ހައްލެއް އެބަ ބޭނުންވޭ. އާ މާރިއޯ ބަލޮޓެލީ އުފަލާ އެކު ބޭނުންވާނެ ފަދަ ކްލަބެއް އޮންނާނެ،" ކްލޮޕް ބުންޏެވެ.
މިދިޔަ ސީޒަނުގައި މިލާނަށް ކުޅެދިން 23 މެޗުން އޭނާ އަށް ޖެހުނީ އެންމެ ތިން ލަނޑެވެ. އެހެންވެ ޔޫރޯގައި ވާދަކުރި އިޓަލީގެ ސްކޮޑުން ވެސް ފުރުސަތެއް ނުލިބުނެވެ.
އިންޓަ މިލާނާއި މެންޗެސްޓާ ސިޓީ އަށް ކުޅުނު ބަލޮޓެލީ 2012 ވަނަ އަހަރުގެ ޔޫރޯގައި އިޓަލީ ގައުމީ ޓީމަށް މޮޅަށް ކުޅުމަށް ފަހު ޖެހިގެން އައި ސީޒަނުގައި މިލާނުގައި ފާހަގަކުރެވޭ ފަދަ ކުޅުމެއް ދެއްކި އެވެ. އެކަމަކު އޭގެ ފަހުން އޭނާ ވަނީ އޮއްސިފަ އެވެ. އަހުލާގީ މައްސަލަތަކާ ހެދި އޭނާގެ ކެރިއަރު ވަނީ ވަރަށް ބޮޑަށް ފަނޑުވެފަ އެވެ.