14 ފެބުރުއަރީ 2018 - 13:06
ކޮލަމްބޯ (ފެބްރުއަރީ 14) - ދެ ޕާޓީގެ މެދުގައި ޚިޔާލު ތަފާތުވެފައިވީ ނަމަވެސް ސްރީ ލަންކާގައި މިހާރު ގާއިމްކޮށްފައިވާ ކޯލިޝަން ސަރުކާރުގެ ދައުރު ހަމަވަންދެން ކުރިއަށް ގެންދަން ޔުނައިޓެޑް ނޭޝަނަލް ޕާޓީ (ޔޫއެންޕީ) އިން ނިންމައިފި އެވެ.
ހޮނިހިރު ދުވަހު ބޭއްވި ލޯކަލް ކައުންސިލް އިންތިޚާބުގައި ސަރުކާރު ކޯލިޝަނަށް ލިބުނު ބޮޑު ނާކާމިޔާބީ އަށް ފަހު ބޮޑު ވަޒީރު ރަނިލް ވިކްރަމަސިންހަގެ ޔޫއެންޕީ އާއި ރައީސް މައިތުރިޕާލާ ސިރިސޭނާގެ ސްރީ ލަންކާ ފްރީޑަމް ޕާޓީ (އެސްއެލްޕީ) ގެ ސީނިއާ ލީޑަރުން އިއްޔެ ވަނީ ބައްދަލުކޮށްފަ އެވެ. ރައީސްގެ ރަސްމީ ގެކޮޅުގައި ބޭއްވި ބައްދަލުވުމުގައި ރަނިލް ވަނީ ޔޫއެންޕީގެ ނިންމުން ރައީސް ސިރިސޭނާ އަށް ހުށަހަޅުއްވައިފަ އެވެ.
ކޯލިޝަން ސަރުކާރުގެ ކުރިމަގު ކަނޑައެޅުމާ ބެހޭ ގޮތުން ތިން ދުވަސް ތެރޭ ޕްރޮޕޯޒަލެއް ތައްޔާރު ކުރުމަށް ކޮމިޓީއެއް ވެސް އިއްޔެގެ ބައްދަލުވުމުގައި ވަނީ އުފައްދައިފަ އެވެ. މި ކޮމިޓީގައި ވަނީ ދެ ޕާޓީގެ މެންބަރުން ވެސް ހިމަނައިފަ އެވެ.
ކޯލިޝަން ސަރުކާރު ކުރިއަށް ގެންދަން ޔޫއެންޕީން ބޭނުންވި ނަމަވެސް ސިރިސޭނާގެ ޕާޓީން ބޭނުންވެއްޖެ ނަމަ ކޯލިޝަނުން ވަކިވެވިދާނެ ކަމަށް ވެސް ޔޫއެންޕީގެ ހުށަހެޅުމުގައިވެ އެވެ.
އިންތިޚާބުގެ ނާކާމިޔާބީއާ ގުޅިގެން ސަރުކާރު އުވާލުމަށް ކުރީގެ ރައީސް މަހިންދާ ރާޖަޕަކްސާ ގޮވާލެއްވި ގޮވާލުމަށް ޔޫއެންޕީން ވަނީ ދެކޮޅު ހަދައިފަ އެވެ. ސަރުކާރުގެ ތަރުޖަމާން ރަޖީތާ ސެނަރަތުނަ ވެސް ވިދާޅުވީ ލޯކަލް ކައުންސިލް އިންތިޚާބުގެ ނަތީޖާއާ ގުޅިގެން ސަރުކާރު އިސްތިއުފާ ދޭން ނުޖެހޭ ކަމަށެވެ.