14 ފެބުރުއަރީ 2018 - 23:14
އަމުރުތައް ނެރެގެން ހަތަރު ފަހަރަކު ސުޕްރީމް ކޯޓުން މީހުން މަގުމައްޗަށް ނެރެން މަސައްކަތް ކުރި ކަމަށް ރައީސް އަބްދުﷲ ޔާމީން މިރޭ ވިދާޅުވެއްޖެ އެވެ.
ޕީޕީއެމްގެ ރުމާލު-2 ޖަގަހައިގައި ވާހަކަފުޅު ދައްކަވަމުން ރައީސް ވިދާޅުވީ ޖަލު ހުކުމް ތަންފީޒު ކުރަމުން ދިޔަ ސިޔާސީ ބޭފުޅުން މިނިވަން ކުރުމަށް މި މަހު އެކެއްގައި ނެރުނު އަމުރު ތަންފީޒު ކުރިނަމަ، އިދިކޮޅު މީހުން މަގުމައްޗަށް ނިކުންނައިރު، އެ އަމުރާ ދެކޮޅަށް ސަރުކާރަށް ތާއީދު ކުރާ މީހުން ވެސް މަގުމައްޗަށް ނިކުންނާނެ ކަމަށެވެ. އަދި އޭގެ ސަބަބުން ލާ އިންސާނީ ތަޅާފޮޅުމަކަށް އެކަން ބަދަލުވީސް ކަމަށާއި އަދި އެންމެ ފަހުން ގަތުލަކާ ހަމައަށް އެކަން ދިޔައީސް ކަމަށް ރައީސް ވިދާޅުވި އެވެ.
އެ މަނިކުފާނު ވިދާޅުވި ގޮތުގައި އެ އަމުރު ތަންފީޒު ނުކުރުމުން ސުޕްރީމު ކޯޓުން ދެން މަސައްކަތް ކުރީ ވެރިން މަގާމުން ދުރުކުރާށެވެ. އެގޮތުން އެންމެ ފުރަތަމަ ނިންމީ އެ މަނިކުފާނު މަގާމުން އަޒުލު ކުރުމަށް ކަމަށް ރައީސް ވިދާޅުވި އެވެ.
ވެރިކަން ވައްޓާލަން އުޅުމާއި ރިޝްވަތުގެ ތުހުމަތުގައި މިހާރު ހައްޔަރުކޮށްފައިވާ އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު، އެ މައްސަލަ ތާވަލު ކުރަން މަސައްކަތް ކުރެއްވި ނަމަވެސް އެކަން ނާކާމިޔާބު ކޮށްލެއްވީ ދެން ތިއްބެވި ތިން ފަނޑިޔާރުން ކަމަށް ރައީސް ޔާމީން ވިދާޅުވި އެވެ. އެކަމަކު އެ ފަދަ އަމުރަކުން ރައީސް މަގާމުން ދުރު ކުރެވޭނެ ކަމަކަށް ސަރުކާރަށް ތާއީދު ކުރާ މީހުން ގަބޫލު ނުކުރާނެ ކަމަށާއި އެ އަމުރު ނެރުނު ނަމަ އަނެއްކާ ވެސް މަގުމަތީގައި ލޭ އެހޮރުވާލާނެ ކަމަށް އެ މަނިކުފާނު ވިދާޅުވި އެވެ.
ސުޕްރީމް ކޯޓުން ކުރި އެ ފަދަ ތިން ވަނަ ކަމެއްގެ ގޮތުގައި ރައީސް ފާހަގަ ކުރެއްވީ ބަންޑާރަ ނައިބު މުހައްމަދު އަނިލް މަގާމުން ދުރުކުރުމެވެ. އެ މައްސަލަ ތާވަލުކޮށް، ބަހުސް ވެސް ކުރި ކަމަށާއި އެކަމަކު ބަންޑާރަނައިބާ ދޭތެރޭ އެ ލާއިންސާނީ އަމަލު ހިންގި ނަމަ، ސަރުކާރުގެ ސަޕޯޓަރުން މަގުމައްޗަށް ނުނިކުމެ ނުތިބޭނެ ކަމަށް އެ މަނިކުފާނު ވިދާޅުވި އެވެ.
ސިޔާސީ ބޭފުޅުން ދޫކޮށްލުމަށް ސުޕްރީމު ކޯޓުން ނެރުނު އަމުރާ ގުޅިގެން ރައީސް ވަނީ ޕޮލިސް ކޮމިޝަނަރު އަހުމަދު އަރީފް އެރޭ ވަކި ކުރައްވާފަ އެވެ. އެކަމަކު އޭނާ މަގާމަށް އަލުން އައްޔަން ކުރުމަށް ސުޕްރީމު ކޯޓުން ނެރެން އުޅުނު އަމުރަކީ، ހަތަރު ވަނަ ފަހަރަށް މީހުން މަގުމައްޗަށް ނިކުންނާނެ އަމުރެއް ކަމަށް އެ މަނިކުފާނު ވިދާޅުވި އެވެ.
ރައީސް ވިދާޅުވީ ޕޮލިސް ކޮމިޝަނަރު އައްޔަންކޮށް ވަކި ކުރުމަކީ ސުޕްރީމް ކޯޓަށް ލިބިފައިވާ ބާރެއް ނޫން ކަމަށާއި އެއީ އެ މަނިކުފާނު ކުރައްވަން ޖެހިވަޑައިގަންނަވާ ކަމެއް ކަމަށެވެ.
"މިއީ ހަމަ އިންތިޒާރުކޮށްގެން، އެއް ބަޔަކަށް އެނގި ތިބެ [ނެރުނު އަމުރުތަކެއް]. އަޅުގަނޑު ހުރިހާ ފަނޑިޔާރުން ކުށްވެރި ކުރަނީކީ ނޫން. އެކަމަކު މިހާވަރަށް ކަންތައްތައް ދިޔައީމަ ސުޕްރީމް ކޯޓުގެ އަމުރުތަކަށް އެބަ ފާޑު ކިޔަން ޖެހޭ،" ރައީސް ޔާމީން ވިދާޅުވި އެވެ.
އެ މަނިކުފާނު ވިދާޅުވީ މިއީ ނިޒާމުގައި އުޅޭ މައްސަލައެއް ނޫން ކަމަށާއި އެކަމަކު ކަންތައްތައް ހަވާލުކޮށްފައި ތިބޭ މީހުން، އަމާނާތްތެރިކަމާއެކު އެކަން ނުކުރީމައި ދިމާވެގެން އުޅޭ އަހުލާގީ މައްސަލައެއް ކަމަށެވެ.