25 ފެބުރުއަރީ 2018 - 09:06
ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) މުބާރާތެއްގެ ސިންގަލްސް ބައިން ރާއްޖޭގެ ކުޅުންތެރިޔަކު ފުރަތަމަ ފަހަރަށް ސެމީ ފައިނަލުން ޖާގަ ހޯދައިފި އެވެ.
އެ ޝަރަފް ހޯދީ ޔޫގެންޑާގައި މިހާރު ކުރިއަށްދާ ޔޫގެންޑާ އިންޓަނޭޝަނަލް ސީރީސް ބެޑްމިންޓަން މުބާރާތުގެ ސެމީން ފުރުސަތު ހޯދައިގެން ޒުވާން ކުޅުންތެރިޔާ ފާތިމަތު ނަބާހާ ފުރުސަތު އެވެ.
އޭނާ އަކީ މިދިޔަ އަހަރު އިންޑިއާގެ ގުވަހާޓީގައި އޮތް ދެކުނު އޭޝިއާގެ 21 އަހަރުން ދަށުގެ ބެޑްމިންޓަން މުބާރާތުގެ ވިމެން ޑަބަލްސް އިވެންޓުން ރާއްޖެ އަށް ރިހި މެޑަލް ގެނެސްދިން ޕެއާގައި ހިމެނޭ ކުޅުންތެރިޔެކެވެ. އެ ފަަހަރު ރިހި މެޑަލް ގެނައީ ނަބާހާގެ އިތުރުން އޭނާގެ އެއް މާބަނޑު އައިމިނަތު ނަބީހާ އެވެ.
ޔޫގެންޑާ މުބާރާތުގެ ސެމީ ފައިނަލުން ނަބާހާ ފުރުސަތު ހޯދީ އިއްޔެ ކުޅުނު ކުއާޓާ ފައިނަލް މެޗުން މޮރިޝަސްގެ ކޮބިޓާ ދޯކީ ބަލިކުރުމަށް ފަހު އެވެ. ނަބާހާ ސެޓުތައް ގެންދިޔައީ 21/18، 21/16 އިންނެވެ. ސެމީ ފައިނަލް އޮންނާނީ މިއަދު އެވެ. މިއަދުގެ ސެމީ ފައިނަލުގައި ނަބާހާ ކުޅޭނީ ދުނިޔޭގެ 131 ވަނައިގައި އޮތް މިސްރުގެ ހަދިއާއާ ދެކޮޅަށެވެ.
މި މުބާރާތުގައި ރާއްޖޭގެ އެހެން ކުޅުންތެރިން ކުޅުނު މެޗުތަކުން ވަނީ ބަލިވެފަ އެވެ. ފިރިހެން ސިންގަލްސް ބައިން ޒަޔާން ޒަކީ ބަލިވީ ދުނިޔޭގެ 120 ވަނައިގައި ތުރުކީގެ އެމްރޭއާ ވާދަކޮށެވެ. އެ މެޗުގެ ސެޓުތައް ދިޔައީ 21/4، 21/9 އިންނެވެ. އަންހެން ސިންގަލްސް ބައިން ނަބީހާ ކެޓީ ދުނިޔޭގެ 67 ވަނައިގައި އޮތް މޮރިޝަސްގެ ކޭޓް ފޫ އަތުން ބަލިވެގެންނެވެ. އަދި އައިމިނަތު ޝަހުރުނާޒް ބަލިވީ އަލްޖީރިއާގެ ލިންޑާ މަޒްރީ އަތުންނެވެ.
މިކްސް ޑަބަލްސް ބައިން ޒަޔާން އާއި ނަބާހާގެ ޕެއާ ބަލިވީ މިސްރުގެ ޕެއާ އެއް ކަމަށްވާ ހަތެމް އެލްޖަމާލް އާއި ދޯހާ ހަނީއާ އަތުންނެވެ. އަންހެން ޑަބަލްސް ބައިން ނަބީހާ އާއި ނަބާހާގެ ޕެއާ ވަނީ ޔޫގެންޑާގެ ހަމޫޒާ އާއި ނަކަލެމާގެ ޕެއާ އަތުން ބަލިވެފަ އެވެ. އަދި ނަފްހާ އާއި ޝަހުރުނާޒްގެ ޕެއާ ބަލިވީ އެ ގައުމުގެ ޕެއާއެއް ކަމަށްވާ ބްރިޖެޓް ޝަމީމް އާއި އައިޝާ ނަކިޔެމްބާއާ ވާދަކޮށެވެ.