01 މާޗް 2018 - 11:49
އުރީދޫ އިން ތައާރަފްކޮށް، ގިނަ ބައެއްގެ މަގުބޫލުކަން ހޯދާފައިވާ "އުރީދޫ ނެކްސްޓް" އާއި "މަގޭ ޕްލޭން" މެދުވެރިކޮށް އިތުރު ޚިދުމަތްތައް ދޭން ތައްޔާރުވެއްޖެ އެވެ.
އާޓިފިޝަލް އިންޓެލިޖެންސް އަދި މެޝިން ލާނިންގެ އެހީގައި މަސައްކަތްކުރާ އުރީދޫ ނެކްސްޓް އާއި އެމީހަކު ބޭނުން ގޮތަކަށް ޕެކޭޖް ޑިޒައިންކުރެވޭ މަގޭ ޕްލޭން މެދުވެރިކޮށް އިތުރު ޚިދުމަތްތައް ދޭން ފަށާާނެކަން އިއުލާނުކުރީ ސްޕޭންގެ ބާސެލޯނާގައި ކުރިއަށް ދިޔަ މޯބައިލް ވޯލްޑް ކޮންގްރެސްގައި އިއްޔެ އެވެ.
ދުނިޔޭގެ ޓެކްނޮލޮޖީގެ ދާއިރާގެ އެންމެ މަގުބޫލު އަދި ކުޅަދާނަ ކުންފުނިތައް ބައިވެރިވާ މޮބައިލް ވޯލްޑް ކޮންގްރެސް ފަދަ ބޮޑު ރަސްމިއްޔާތެއްގައި އުރީދޫ މޯލްޑިވްސްގެ ކުރިއެރުންތަކާއި ހިދުމަތްތަކާ ގުޅޭ ގޮތުން މައުލޫމާތު ދެވުމަކީ އެ ކުންފުންޏަށް ލިބުނު ބޮޑު ޝަރަފެއް ކަަމަށް، އުރީދޫގެ ސީއީއޯ ނަޖީބް ޚާން ވިދާޅުވި އެވެ.
"އުރީދޫގެ ކަސްޓަމަރުންނާ ކުރަންޖެހޭ ކޮންމެ މުއާމަލާތެއް ވެސް ޑިޖިޓަލް ޓެކްނޮލޮޖީ މެދުވެރިކޮށް، އޮންލައިންކޮށް ކުރުމުގެ ފުރުސަތު ފުޅާކުރުމަށް އުރީދޫ އިން ގިނަ މަސައްކަތްތަކެއް ކުރަމުންދޭ. ރާއްޖޭގެ ރައްޔިތުންނަކީ ތަފާތު އެކި ރަށްރަށުގައި ދިރިއުޅޭ ބަޔަކަށް ވީ ހިނދު، ޑިޖިޓަލް ޕްލެޓްފޯމްތައް މެދުވެރިކޮށް ކޮންމެ ހިސާބެއްގައި ހުރެގެންވެސް އެންމެ އަވަސް ޚިދުމަތް ލިބުމަކީ ވަރަށް މުހިއްމު ކަމެއް،" ނަޖީބް ވިދާޅުވި އެވެ.
މޯބައިލް ކޮންގްރެސްގައި އުރީދޫ އިން ދައްކާލި، އުރީދޫ ނެކްސްޓްގެ އާ ވާޝަންއާ އެކު އެ ޕްލެޓްފޯމް ވައިބާ މެދުވެރިކޮށް ވެސް ބޭނުން ކުރެވޭނެ އެވެ. މިހާރު އެ ޕްލެޓްފޯމް ބޭނުން ކުރެވެނީ ފޭސްބުކް މެސެންޖާގައި އެކަންޏެވެ.
މަގޭ ޕްލޭނުގެ އާ އަޕްޑޭޓާ އެކު، "އާޓިފިޝަލް އިންޓެލިޖެންސް ބޭސްޑް ޕްރިޑިކްޓިވް ޓެކްނޮލޮޖީގެ" އެހީގައި ހިމަނާފައިވާ އާ ޚިދުމަތްތައް ލިބޭނެ އެވެ. އެގޮތުން، މަގޭ ޕްލޭންގައި އަލަށް ތައާރަފްކޮށްފައިވާ ޚިދުމަތްތަކަކީ؛
- އުރީދޫގެ ޑޭޓާ، އެސްއެމްއެސް، ކޯލް، އަދި އައިޑީޑީ އެޑްއޯންތައް، އެހެން މީހުންނަށް ހަދިޔާކުރެވުން.
- ބަޖެޓެއް ކަނޑައެޅުމުން އެވަރަށް ލިބޭނެ އެންމެ އެކަށީގެންވާ ޕްލޭންތައް ބަލައިލެވުން.
- އާޓިފިޝަލް އިންޓެލިޖްންސް ޓެކްނޮލޮޖީގެ އެހީގައި، މަގޭ ޕްލޭން މެދުވެރިކޮށް އެންމެ ގިނައިން މީހުން ނަގާ ޕްލޭންތައް ބަލާލެވުން.
އުރީދޫ އިން ބުނީ، އުރީދޫ ނެކްސްޓް އަދި މަގޭ ޕްލޭން އަށް ގެނެވުނު ބަދަލުތައް މި މަހުގެ ތެރޭގައި ތައާރަފް ކުރާނެ ކަމަށެވެ.