03 މާޗް 2018 - 15:41
އާދީއްތަ ދުވަހު 90 ވަނަ އޮސްކާ އެވޯޑް ހަފުލާ ބާއްވާއިރު، މި ފަހަރުގެ ހަފުލާގެ ތެރޭގައި އެންމެ ފާހަގަކޮށްލެވޭ ކަމަކީ އެމެރިކާގައި ބަޑި ކޮންޓްރޯލް ކުރުމާ އެއްކޮޅަށް ޝުއޫރު ފާޅުކުރުމުގެ ގޮތުން ހަފުލާގައި އޮރެންޖް ކުލައިގެ ޕިން ބޭނުން ކުރުމެވެ. އެމެރިކާގެ ދިދަ ރަމްޒުކޮށްދޭ ޕިން، ހަފުލާގައި އެންމެން ވެސް ބޭނުން ކުރާނެ އެވެ.
އަދި ހަމައެކު ޖިންސީ ފުރައްސާރަތަކާއި ނަސްލީ ތަފާތު ކުރުންތަކާ ދެކޮޅުކަން ވެސް ދެއްކުމުގެ ގޮތުން، ގިނަ ސެލެބްރިޓީން ބޭނުން ކުރާނީ ކަޅާއި ހުދު ހެދުމެވެ.
ބަޑި ކޮންޓްރޯލް ކުރުމަށް އޮސްކާގައި ހޭލުންތެރިކަން އުފައްދަން ނިންމީ މީގެ ދެ ހަފުތާއެއް ދުވަސް ކުރިން ފްލޮރިޑާގެ ޕާކްލަންޑް ޑިސްޓްރިކްޓްގެ ހައި ސްކޫލްގައި ދިން ބަޑިގެ ހަމަލާއެއްގައި 17 ދަރިވަރުން މަރާލުމާއި މިދިޔަ އަހަރުގެ އޮކްޓޯބަރު މަހުގެ ތެރޭގައި ލަސް ވެގަސްގައި ދިން ބަޑީގެ ނުރައްކާތެރި ހަމަލާގައި 58 މީހަކު މަރާލާފައިވާތީ އެކަމުގެ ފުން ހިތާމަ ވެސް އާކުރުމުގެ ގޮތުންނެވެ.
އޮސްކާގައި އޮރެންޖް ޕިން ބޭނުންކުރަން އިސް ނެގީ ބަޑިން ދޭ ހަމަލާތަކާ ދެކޮޅަށް ވަކާލާތު ކުރާ މައިކަލް ބްލޫމްބާގްގެ އެވްރީ ޓައުން ފޮ ގަން ސޭފްޓީންނެވެ.
ހޮލީވުޑްގެ ނުފޫޒުގަދަ ތަރިންގެ ތެރޭގައި ހިމެނޭ ޖޯޖް ކްލޫނީ އާއި އޯޕްރާ ވިންފްރީ އަދި ޑައިރެކްޓަރު ސްޓީވެން ސްޕީގްބާގް ވަނީ މި މަހުގެ 24 ގައި އެ ހަމަލާއާ ދެކޮޅަށް ވޮޝިންޓަން ޑީސީގައި "މާޗް ފޮ އަވާ ލިވްސް" ގެ ނަމުގައި ބާއްވާ ބޮޑު އެއްވުމަށް މާލީ ގޮތުން އެހީތެރިކަން ވެސް ފޯރުކޮށް ދީފަ އެވެ. އެ މީހުން ވަނީ އެ ހަރަކާތަށް 500،000 ޑޮލަރު ހަދިޔާކޮށްފަ އެވެ.
މި ފަހަރުގެ އޮސްކާއާ ދިމާކޮށް ފާހަގަކޮށްލެވުނު އަނެއް ކަމަކީ އެތައް ބަޔަކަށް ޖިންސީ ގޯނާ ކުރިކަމުގެ ތުހުމަތު އެޅިފައިވާ ޕްރޮޑިއުސަރު ހާވީ ވެއިންސްޓީންގެ "ކާސްޓިން ކައުޗް" އަށް ރައްދު ދިނުމަށްޓަކައި ހަދާފައިވާ އޭނާގެ ސްޓެޗޫއެއް ލޮސް އެންޖެލިސްގައި ބެހެއްޓުމެވެ. އޭތި ހަދާފައި ވަނީ ސޯފާއެއްގައި، އޮސްކާ ޓްރޮފީއަކާ އެކު ހާވީ އިށީނދެގެން އިންނަ ގޮތަށެވެ.
އާދީއްތަ ދުވަހު އޮސްކާ އެވޯޑް ހަފުލާ ކުރިއަށް ދާނީ ލޮސް އެންޖެލިސްގެ ޑޮލްބީ ތިއޭޓަރުގަ އެވެ. ހަފުލާ ހޯސްޓް ކުރާނީ ޖިމީ ކިމެލް އެވެ.