07 މާޗް 2018 - 06:34
އެއްގަމު މަހުގެ ބާވަތްތައް ކެއުން މަދުކޮށްލައި، ބަރުދަން ލުއި ކުރަން އެމެރިކާގެ ރައީސް ޑޮނަލްޑް ޓްރަމްޕަށް ވައިޓްހައުސްގެ ޑޮކްޓަރު ލަފާ ދީފި އެވެ.
މިދިޔަ ޖެނުއަރީ މަހު ވައިޓްހައުސްގެ ފިޒިޝަން ޑރ. ރޮނީ ޖެކްސޮނަޑް ޓްރަމްޕްގެ ޗެކަޕެއް ހެދުމަށް ފަހު، ވަނީ ބަރުދަން ލުއިކުރަން ދުޅަހެޔޮ ޑައެޓާ އެކު، ކަސްރަތުކުރަން އިރުޝާދު ދީފަ އެވެ. ޑޮކްޓަރު ފާހަގަކުރި ގޮތުގައި ޓްރަމްޕްގެ އިސްކޮޅާއި ބަރުދަނާއި އުމުރަށް މިހާރު ބަލާއިރު، އޭނާ ހުރީ ފަލަމީހެކޭ ބުނާ ފައްތަރަށް ދާ ހިސާބުގަ އެވެ.
އެގޮތުން ބަރުދަން ހުންނަން ޖެހޭ ވަރަށް ވުރެ އެއް ޕައުންޑް ބަރު ކަމަށް ޑޮކްޓަރު ބުނެފައިވެ އެވެ. އިސްކޮޅުގައި ހަ ފޫޓް ތިން އިންޗި ހުންނަ ޓްރަމްޕް، 71، ބަރުދަނުގައި މިހާރު ހުރީ 239 ޕައުންޑް ނުވަތަ 108.409 ކިލޯ އެވެ.
ޑރ. ރޮނީގެ ލަފާގެ މަތިން މިހާރު ޓްރަމްޕުގެ ކެއުމަށް ގެނައި ބަދަލާ އެކު، މިހާރު މައިގަނޑު ގޮތެއްގައި ބޭނުން ކުރަނީ ކަނޑުމާހުގެ ބާވަތްތަކާއި ސެލަޑާއި ސޫޕް ފަދަ ތަކެއްޗެވެ.
އަދި އޭނާއަކީ ޖަންކް ފުޑާއި މިލްކްޝޭކް ފަދަ ބުއިންތަކުގެ ވަރަށް ބޮޑު ފޭނަކަށް ވިޔަސް އެ ތަކެތި އެއްގޮތަކަށް ވެސް ނުކާން ޑޮކްޓަރު އިރުޝާދު ދީފައިވެ އެވެ.
ނަމަވެސް ވައިޓްހައުސްގެ ބައެއް އޮފިޝަލުންނާ ހަވާލާދީ ބައެއް މީޑިއާތަކުން ރިޕޯޓްކޮށްފައިވާ ގޮތުގައި ޑައެޓެއްގައި ހުރި ނަމަވެސް ޓްރަމްޕް "ކެއުމުގައި މަކަރު ވެސް ހަދަ" އެވެ. އަދި ޑޮކްޓަރު ދީފައިވާ އިރުޝާދުތަކާ އެއްގޮތަށް އޭނާ ގަވައިދުން ކަސްރަތެއް ވެސް ނުކުރާ ކަމަށްވެ އެވެ.