20 މާޗް 2018 - 09:34
ނިއު ޔޯކް، ޔުނައިޓެޑް ސްޓޭޓްސް (މާޗް 20) - ޓެނިސް ލެޖެންޑް ރޮޖާ ފެޑެރާ ރަނގަޅު ފޯމެއްގައި ހުއްޓާ އޭނާ ހުއްޓުވާލެވުމަކީ އާދައިގެ ކަމެއް ނޫން ކަމަށް ދާދި ފަހުން އިންޑިއަން ވެލްސް ފައިނަލުގައި ފެޑެރާގެ މައްޗަށް ކުރި ހޯދި އާޖެންޓީނާގެ ހުއާން މާޓިން ޑެލް ޕޮޓްރޯ ބުނެފި އެވެ.
ދުނިޔޭގެ އެއް ވަނައިގައި އޮތް ފެޑެރާ އަންނަނީ މި އަހަރު ފެށުނު ފަހުން މޮޅުވުމުގެ ސިލްސިލާއެއް ދަމަހައްޓަމުންނެވެ. އިންޑިއަން ވެލްސް ފައިނަލުގައި ޑެލް ޕޮޓްރޯ އަތުން ބަލިވުމުން 17 މެޗަށް ފަހު ފެޑެރާ އަށް ވަނީ ނާކާމިޔާބީއާ ކުރިމަތިލާން ޖެހިފަ އެވެ.
ފެޑެެރާގެ މައްޗަށް ޑެލް ޕޮޓްރޯ ކުރި ހޯދިއިރު ސެޓުތައް ދިޔައީ 6-4 6-7 (8-10) 7-6 (7-2) އިންނެވެ. މިއީ 2009 ވަނަ އަހަރުގެ ޔޫއެސް އޯޕަން ފައިނަލަށް ފަހު ފެޑެރާ އަތުން ޑެލް ޕޮޓްރޯ އަށް ހޯދުނު ފުރަތަމަ މޮޅެވެ.
"މިއީ އާދައިގެ ކާމިޔާބެއް ނޫން. ޓެނިސް ކޯޓެއްގައި ފެޑެރާ ބަލިކުރުމަކީ ވަރަށް ބޮޑު ކަމެއް. ހަމައެކަނި ބުނެލާ ބަސްތަކަކުން މި ކުރެވޭ އިހުސާސްތަކެއް ކިޔައެއް ނުދެވޭނެ،" ޑެލް ޕޮޓްރޯ ބުންޏެވެ.
ފާއިތުވި ހަ އަހަރުތެރޭގައި އުމުރުން 29 އަހަރުގެ ޑެލް ޕޮޓްރޯ ވަނީ އޭނާގެ އަތުގެ ކުޑަ ހުޅަށް ލިބުނު އަނިޔާތަކެއްގެ ސަބަބުން ތިން ސާޖަރީއެއް ހަދައިފަ އެވެ. ކޮންމެ ފަހަރަކު ވެސް އެނބުރި ކޯޓަށް އަންނަނީ ކާމިޔާބެއް ހޯދުމުގެ އަޒުމު ކުރިއަށް ވުރެން ވަރުގަދަ ކޮށްގެން ކަމަށް ޑެލް ޕޮޓްރޯ ބުންޏެވެ.
"އެ ހުރިހާ މައްސަލަތަކާއި އެ ހުރިހާ ސާޖަރީތަކަށް ފަހު އަހަންނަށް މި ހިސާބަށް އާދެވޭނެ ކަމަށް އުއްމީދެއް ނުކުރަން. އަދި ޓެނިސް މާސްޓާސް 1000 (މުބާރާތެއް) ފެޑެރާ ބަލިކޮށްފައި ހޯދޭނެ ކަމަށް ވެސް ގަބޫލެއް ނުކުރަން. އެކަމަކު މިއީ ހަގީގަތް މިހާރު،" ޑެލް ޕޮޓްރޯ ބުންޏެވެ.
ޑެލް ޕޮޓްރޯ މި ސީޒަން ފެށީ ރަނގަޅު ފޯމެއްގަ އެވެ. އޭނާ ވަނީ ޖެނުއަރީ މަހު ނިއު ޒީލެންޑުގައި އޮތް މުބާރާތުގައި ދެއްކި މޮޅު ކުޅުމާ އެކު 2014 ވަނަ އަހަރުގެ މާޗް މަހަށް ފަހު ފުރަތަމަ ފަހަރަށް ދުނިޔޭގެ ގަދަ 10 އަކަށް އަރައިފަ އެވެ.