27 މާޗް 2018 - 07:03
އަހަރެމެން މިތިބީ ވަރަށް އުފަލުންނެވެ. ޒަމާނީ ސްމާޓްފޯނުތައް ވަޔަލެސްކޮށް ޖާޗުކުރެވޭތީ އެވެ. ކޭބަލް ގެއްލިގެން އުޅެން ނުޖެހޭތީ އެވެ. މޭޒުމަތީގައި، ޗާޖިން ޕެޑް މަގީގައި ފޯނު ބާއްވާލައިރަށް، ބެޓެރީ ޗާޖުކުރެވޭތީ އެވެ. މިއީ އެކަމަކު ވަޔަލެސް ޗާޖިން ހެއްޔެވެ؟ އަހަރެމެން މިތިބީ ގަބޫލުކޮށްގެންނެވެ.
ޗާޖިން ޕެޑެއް މަތީގައި ފޯނު ބާއްވާލުމުން ބެޓެރީ ޗާޖުވެ އެވެ. ތެދެކެވެ. ފޯނަށް ކޭބަލެއް ގުޅާކަށް ނުޖެހެ އެވެ. ކޭބަލް ގުޅަން ޖެހެނީ ޗާޖިން ޕެޑަށެވެ. ޗާޖިން ޕެޑު މަތިން ފޯނު ނަގާއިރަށް ޗާޖުވުން ހުއްޓެ އެވެ. މިއީ ވަޔަލެސް ޗާޖިންއެއް ނޫނެވެ.
ވަޔަލެސް ޗާޖިންގައި ޗާޖިން ޕެޑަކަށް ބޭނުންވެގެން ނުވާނެ އެވެ. ސެލް އެންޓަނާތަކުން މޮބައިލް ފޯނަށް ސިގްނަލް/ ރޭންޖް ލިބޭ ގޮތަށް، ވަޔަލެސް ޗާޖިން ރޭންޖް ލިބޭ ހިސާބުގައި ބެޓެރީ ޗާޖުވާންޖެހެ އެވެ. ފޯނު ޖީބުގައި އޮތަސް، ދަބަހެއްގައި އޮތަސް އަދި އެ ނޫން އެހެން އެއްޗެއްގައި އޮތަަސް ވެސް އެވެ. ރޭޑިއޯތަކަށް ސިގްނަލް ލިބޭ ގޮތަށެވެ. މި މާނާގައި ބެޓެރީ ޗާޖުކުރެވޭ ހާޑްވެއާތައް ޓެސްޓް މަރުހަލާތަކުގައި އެބަ އުޅެ އެވެ.
ވަޔަލެސް ޗާޖިން މިހާރު މާނަކުރެވެނީ ނުބައިކޮށްކަން ޓެކްނޮލޮޖީ ކުންފުނިތަކަށް އެނގެ އެވެ. އެކަމަކު އެ މީހުންނަށް ވެސް އެހެން ގޮތެއް އަދި ނެތީ އެވެ. ވިސްނުމާއި ފިކުރު އެބަ ހުއްޓެވެ. ޓެކްނޮލޮޖީގައި އަމަލީ ސިފަޖެއްސޭވަރެއް އަދި ނުވެ އެވެ.
ޗާޖިން ޕެޑަކާ ނުލައި ބެޓެރީ ޖާޗުކުރެވޭ ނިޒާމެއް، ބުނެވޭ ގޮތުގައި، ކުރި އަށް އޮތް ދެތިން އަހަރު ތެރޭގައި އާންމުކުރެވޭނެ އެވެ. އެކަމަކު އެކަން އެންމެ ފުރަތަމަ ކާމިޔާބުކުރާނެ ބަޔަކު ނޭނގެ އެވެ. "އޯވާ ދި އެއާ" (އޯޓީއޭ) ޗާޖިން ޓެކްނޮލޮޖީ ތައާރުފުކުރުމަށްޓަކައި ސެމްސަންގުން ވަނީ ހުއްދަ ވެސް ހޯދާފަ އެވެ.