26 މާޗް 2018 - 15:39
ގާހިރާ (މާޗް 26) - މިސްރުގެ ރިޔާސީ އިންތިޚާބުގައި ވޯޓުލާން މިއަދު ފަށައިފި އެވެ. ވޯޓުލުން ތިން ދުވަހަށް ކުރިއަށް ދާނެ އެވެ.
އިންތިޚާބުގައި ރައީސް އަބްދުއްފައްތާހު ސީސީ ދެވަނަ ދައުރެއް ކާމިޔާބު ކުރައްވާނެކަން ވަނީ ޔަގީންވެފަ އެވެ. ރިޔާސީ އިންތިޚާބުގައި ވާދަކުރަން ނިންމި އެތައް ބަޔަކަށް ބިރުދައްކައިގެން އެ މީހުންގެ ނަން ވަނީ އަނބުރާ ނަގުވައިފަ އެވެ. އަދި އަނެއް ބައި މީހުން ވަނީ ބަންދުކޮށްފަ އެވެ. އިންތިޚާބުގައި ވާދަކުރަން ހަތް ކެންޑިޑޭޓަކު ހުށަހެޅި އެވެ.
އިންތިޚާބުގައި ވާދަކުރަން އެންމެ ފަހު ވަގުތު ނަން ހުށަހަޅާފައި ވަނީ ސީސީ އަށް ތާއީދުކުރާ ފަރާތެއް ކަމަށްވާ މޫސާ މުސްތަފާ މޫސާ އެވެ. އޭނާ ވެސް ވިދާޅުވެފައި ވަނީ އިންތިޚާބުގައި ތާއީދުކުރާނީ ސީސީ އަށް ކަމަށެވެ.
މިސްރުގެ ފުރަތަމަ ޑިމޮކްރެޓިކް ރައީސް މުހައްމަދު މުރްސީގެ ސަރުކާރު 2013 ވަނަ އަހަރު އަސްކަރީ ބަޣާވާތަކުން ވައްޓާލުމުގައި އިސްކޮށް ހުންނެވި ސީސީ ވެރިކަމަށް ވަޑައިގެންނެވީ 2014 ވަނަ އަހަރު އެވެ.
އަރަބި ދުނިޔޭގައި އެންމެ ބޮޑު ގައުމަކީ މިސްރެވެ. އާބާދީގައި 95 މިލިއަން މީހުން ހިމެނޭ މިސްރުން ވަނީ މެދުއިރުމަތީގެ ސިޔާސީ ކަންކަމުގައި މުހިންމު ރޯލެއް އަދާކޮށްފަ އެވެ.