28 މާޗް 2018 - 09:22
މެޑްރިޑް (މާޗް 28) – ވޯލްޑް ކަޕް ކާމިޔާބުކުރާނެ ކަމަށް އެންމެ ބޮޑަށް ބެލެވޭ އެއް ގައުމު ކަމަށްވާ އާޖެންޓީނާ ކޮޅަށް އެކުވެރިކަމުގެ މެޗެއްގައި ރޭ ސްޕެއިނުން ހަ ލަނޑު ވައްދާލައިފި އެވެ.
މެޑްރިޑުގައި ކުޅުނު މި މެޗުގައި އިސްކޯ ހެޓްރިކެއް ހެދިއިރު ސްޕެއިން މޮޅުވީ 6-1 އިންނެވެ. މި މެޗުގައި އާޖެންޓީނާގެ ކެޕްޓަން ލިއޮނަލް މެސީ ނުކުޅެ އެވެ.
އެތުލެޓިކޯ މެޑްރިޑުގެ ސްޓޭޑިއަމުގައި ކުޅުނު މި މެޗުގެ 12 ވަނަ މިނެޓުގައި ސްޕެއިނަށް ލީޑު ނަގައިދިނީ އެތުލެޓިކޯގެ ފޯވާޑް ޑިއެގޯ ކޮސްޓާ އެވެ. ދެ ވަނަ ލަނޑު 27 ވަނަ މިނެޓުގައި ޖެހީ އިސްކޯ އެވެ. ފުރަތަމަ ހާފު ނިމުމުގެ ކުރިން ނިކޮލަސް އޮޓަމެންޑީ ޖެހި ލަނޑާ އެކު އާޖެންޓީނާ އިން ތަފާތު ކުޑަކުރުމުން ދެ ވަނަ ހާފުގައި އެ ޓީމުން ވަރުގަދަ ފައިޓެއް ދޭނެ ކަމަށް ބެލެވުނެވެ.
އެކަމަކު ދެ ވަނަ ހާފުގައި ފެނުނީ ތަފާތު މަންޒަރެކެވެ. އިސްކޯ ވަނީ 52 ވަނަ މިނެޓުގައި އިތުރު ލަނޑެއް ޖަހައި ސްޕެއިނަށް ލީޑު ފުޅާކޮށްދީފަ އެވެ. އޭގެ ތިން މިނެޓު ފަހުން ސްޕެއިނުގެ ހަތަރު ވަނަ ގޯލް ޖެހީ ތިއާގޯ އަލްކަންޓްރާ އެވެ. އާޖެންޓީނާ އިން ވަރަށް ގިނަ ޒުވާން ކުޅުންތެރިންނަށް ފުރުސަތު ދީގެން އަދި ދެ ވަނަ ހާފުގައި ވެސް ބަދަލުތަކެއް ގެނެސްގެން ކުޅުނު މި މެޗުގައި އެ ޓީމު ކޮޅަށް ސްޕެއިނުގެ އަނެއް ދެ ލަނޑު ޖެހީ 73 ވަނަ މިނެޓުގައި އިއާގޯ އަސްޕަސް އަދި 74 ވަނަ މިނެޓުގައި އިސްކޯ އެވެ.
އެންމެ ފަހުގެ ޔޫރޯގެ ދެ ވަނަ ބުރުން ކެޓުމުން ހުލެން ލޮޕެޓެގުއީ ހަވާލުވެ ސްޕެއިން މިވަނީ ބަލިނުވެ 18 މެޗު ހަމަކޮށްފަ އެވެ. އަނެއްކޮޅުން މި ނަތީޖާއާ އެކު އާޖެންޓީނާ އަށް އިތުރު ޕްރެޝަރުތަކެއް ކުރިމަތިވާނެ އެވެ. ވަރަށް އުނދަގުލުން ވޯލްޑް ކަޕަށް ކޮލިފައިވިއިރު މުހިއްމު ކުޅުންތެރިންނަށް ސްކޮޑުން ފުރުސަތު ނުދޭތީ ކޯޗު ޖޯޖް ސަމްޕައޯލީ އަށް ވަނީ ފާޑުކިޔުން އަމާޒުވެފަ އެވެ.
ރޭ ފްރާންސް އިން ވަނީ މި އަހަރުގެ ވޯލްޑް ކަޕް ބާއްވާ ގައުމު ރަޝިއާ އަތުން ރަށުން ބޭރުގައި 3-1 އިން މޮޅުވެފަ އެވެ. ރަޝިއާގެ ސެއިން ޕީޓާސްބާގުގައި ކުޅުނު މެޗުގެ 40 ވަނަ މިނެޓުގައި ކީލިއަން އެމްބާޕޭ ވަނީ އެ ޓީމަށް ކުރި ހޯދައިދީފަ އެވެ. ދެ ވަނަ ހާފު ފަށައިގެން ހަތަރު ވަނަ މިނެޓުގައި ދެ ވަނަ ގޯލް ޖެހީ ޕައުލް ޕޮގްބާ އެވެ. ރަޝިއާ އިން 68 ވަނަ މިނެޓުގައި ތަފާތު ކުޑަކުރި ނަމަވެސް އެމްބާޕޭ ވަނީ 83 ވަނަ މިނެޓުގައި ގޯލް ޖަހައި ފްރާންސަށް މޮޅެއް ކަށަވަރުކޮށްދީފަ އެވެ.