31 މާޗް 2018 - 22:28
ހޮލީވުޑްގެ މަޝްހޫރު ބަތަލާ ކެމެރަން ޑަޔަޒް މިހާރު ސްކްރީނުން ނުފެނުމަކުން ވާނެ ވަކި ތަފާތެއް ނެތެވެ. އޭނާ މިހާރު އެއްގޮތަކަށް ވެސް އެއްވެސް ފިލްމަކުން ނުފެންނަތާ ހަތަރު އަހެއްރާ ދުވަސްވެއްޖެ އެވެ. އުމުރުން މިހާރު 45 އަހަރުގެ ބަތަލާ އެންމެ ފަހުން ކުޅުނު ފިލްމަކީ 2014 ގެ "އެނީ" އެވެ.
އެންޓަޓައިންމަންޓް ވީކްލީ އަށް ކެމެރެން ދިން އިންޓަވިއުއެއްގައި ބުނީ އޭނާ ހުރީ "ރިޓަޔާވެފައި" ކަމަށެވެ.
"މަސައްކަތެއް ނުކުރާ ކަމަށް ވަންޏާ އެވާނެ ދޯ ރިޓަޔަ ކުރީ ކަމަށް. ދެން އަހަންނަކަށް ނޭނގޭ. އަހަންނަށް ގަބޫލު ކުރެވެނީ އަހަރެން މި ހުރީ ރިޓަޔާވެފައި ކަމަށް." މިހާރު ކުޅޭނެ އެއްވެސް ފިލްމެއް ވެސް އަތުގައި ނެތް ބަތަލާ ބުންޏެވެ.
ކެމެރެންއަކީ 1990 އާއި 2000 ގެ އަހަރުތަކުގެ ކުރީކޮޅާ ހަމައަށް ހޮލީވުޑްގައި އެންމެ ކާމިޔާބު އެއް ބަތަލާއިންގެ ތެރެއިން އެކެކެވެ. އޭނާގެ އެންމެ ބޮޑަށް ވިދާލީ 1994 ގައި ނެރުނު ފިލްމް "ދަ މާސްކް" އިންނެވެ.
އޭގެ ފަހުން ކެމެރެން ކުޅެފައިވާ ބައެއް ފިލްމްތަކުގެ ތެރޭގައި މައި ބެސްޓް ފްރެންޑްސް ވެޑިން (1997)، ދެއާ އިޒް ސަމްތިން އެބައުޓް މޭރީ (1998) އަދި "ޗާލީޒް އެންޖެލްސް" ގެ ފިލްމްތައް ހިމެނެ އެވެ.
ކެމެރެން ރިޓަޔާ ކުރި ކަމަށް ބުނެފައި މި ވަނީ އޭނާގެ ވަރަށް ކާމިޔާބު ފިލްމެއްގެ ސީކްއެލްއެއް ވެސް ހަދަން ވާހަކަތަކެއް ދެކެވިފައި ވަނިކޮށެވެ. އެއީ 2002 ގައި ނެރުނު "ދަ ސްވީޓެސްޓް ތިންގް" އެވެ.
އެކްޓިންއާ ދުރުގައި ހުއްޓަސް ކެމެރެން އަންނަނީ ލިޔުންތެރިއެއްގެ ގޮތުގައި ތަޖުރިބާތަކެއް ކުރަމުންނެވެ. އެގޮތުން މިހާތަނަށް ދެ ފޮތެއް އޭނާ ވަނީ ނެރެފަ އެވެ. އެއީ ދަ ބޮޑީ ބުކް (2013) އާއި 2016 ގައި ނެރުނު ދަ ލޯންޖެވިޓީ ބުކް އެވެ.
އެމެރިކާގެ ގިޓަރިސްޓް އަދި ޕްރޮޑިއުސަރު ބެންޖީ މެޑެންއާ 2015 ގައި ކައިވެނި ކުރި ބަތަލާގެ ދަރިއަކު ނެތެވެ.