31 މެއި 2018 - 10:56
މެންޗެސްޓާ (މެއި 31) - ފަސް އަހަރު ތެރޭ ހަތަރު ފަހަރަށް ޗެމްޕިއަންސް ލީގު ކާމިޔާބުކުރުމަކީ ފަސޭހަކަމެއް ނޫން ކަމަށާއި ރެއާލް މެޑްރިޑްގައި މިހާރު އޮތީ އާދަޔާހިލާފު ޓީމެއް ކަަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ރެއާލުން މި ފަހަރުގެ ޗެމްޕިއަންސް ލީގު ކާމިޔާބުކުރީ ފައިނަލުގައި 3-1 އިން ލިވަޕޫލް ބަލިކުރުމަށް ފަހު އެވެ. ގާޑިއޯލާގެ ސިޓީ އަކީ މުބާރާތުގެ ފޭވަރިޓެއްގެ ގޮތުގައި ބެލެވުނު ނަމަވެސް އެ ޓީމު ވަނީ ކުއާޓާ ފައިނަލުން ލިވަޕޫލުން އަތުން ކަޓައިފަ އެވެ.
ގާޑިއޯލާ ބުނީ ރެއާލުން ހޯދި ކާމިޔާބީ ފާހަގަކޮށް އެ ޓީމަށް މަރުހަބާކިޔާ ކަމަށެވެ.
"އަހަރެން ރެއާލަށް މަރުހަބާ ކިޔަން. ޓީމަކުން ޗެމްޕިއަންސް ލީގު ޖެހިޖެހިގެން ތިން ފަހަރު ހޯދައި ފަަސް އަހަރު ތެރޭގައި ހަތަރު ވަނަ ތަށި ހޯދުމުން. އެއީ އާދަޔާހިލާފު ޓީމެއް،" ޔޯހަން ކްރައިފް ފައުންޑޭޝަންގެ އިވެންޓެއްގައި ވާހަކަ ދައްކަމުން ގާޑިއޯލާ ބުންޏެވެ.
"ޗެމްޕިއަންސް ލީގަކީ ވަރަށް އުނދަގޫ މުބާރާތެއް. މުބާރާތުގައި ކުރިއަށް ދިއުން ބަރޯސާވޭ ވަރަށް ގިނަ ކަންކަމަށް. އެ ކަންތައްތަކުގެ ތެރޭގައި ގިނަ މަސައްކަތްތަކެއް ކުރަން ޖެހޭ،" ކުރިން ބާސެލޯނާ އާއި ބަޔާން މިއުނިކަށް ކޯޗުކޮށްދިން ގާޑިއޯލާ ބުންޏެވެ.
މި ސީޒަނުގައި ގިނަ ރެެކޯޑްތަކަކާ އެކު ސިޓީން އިނގިރޭސި ޕްރިމިއާ ލީގުގެ ޗެމްޕިއަންކަން ހޯދި ގާޑިއޯލާ ބުނީ އޭނާ ސިޓީގައި ހުރެ ޗެމްޕިއަންސް ލީގު ހޯދުން ލާޒިމެއް ނޫން ކަމަށެވެ.
"މި ދައްކަނީ ވަރަށް އާ ޓީމެއްގެ ވާހަކަ މި ލެވެލަށް. މިސާލަކަށް ބަލާ ޗެލްސީ ވަރަށް ގިނަ ދުވަހު މަސައްކަތް ކޮށްގެން ޗެމްޕިއަންސް ލީގު ލިބުނީ. އަހަރެމެން އެހާ ދުވަސް ނަގާނެއޭ އެއް ނޫން މި ބުނަނީ. ކުރަން ޖެހޭ މަސައްކަތުގެ ބޮޑު ވާހަކަ މި ބުނީ،" ގާޑިއޯލާ ބުންޏެވެ.
އަންނަ ސީޒަނަަށް ޓީމު ވަރުގަދަ ކުރުމުގެ ގޮތުން ސިޓީން ވިސްނަނީ ފެންވަރު ރަނގަޅު މަދު ކުޅުންތެރިންތަކެއް ގެންނަން ކަމަށް ގާޑިއޯލާ ވަނީ ބުނެފަ އެވެ.
ސިޓީން ރެއާލުގެ މިޑްފީލްޑަރު އިސްކޯ އަށް ބިޑްނުކުރަން ނިންމާފައިވާއިރު، އެ ޓީމުން އަންނަނީ ނަޕޯލީގެ މިޑްފީލްޑަރު ޖޯޖީނިއޯ އާއި ލެސްޓާ ސިޓީގެ ރިޔާދު މާރޭޒް ގެންނަން މަސައްކަތް ކުރަމުންނެވެ. ރިޕޯޓްތައް ބުނާގޮތުން ކުރިއަށް އޮތް ދުވަސްތަކުގެ ތެރޭގައި މި ދެ ކުޅުންތެރިން ސިޓީއާ ގުޅޭނެ އެވެ.