01 ޖޫން 2018 - 00:00
ދެކުނު ކޮރެއާ އަކީ އޭޝިއާގެ ގައުމުތަކުގެ ތެރެއިން ފީފާ ވޯލްޑް ކަޕުގައި އެންމެ ގިނައިން ވާދަކޮށްފައިވާ އަދި އެންމެ ކާމިޔާބު ޓީމެވެ. ޖުމްލަ 10 ވޯލްޑް ކަޕުގައި ކުޅެފައިވާއިރު އޭގެ ތެރެއިން ނުވަ ފަހަރު ވާދަކުރީ ޖައްސަޖައްސައިގެންނެވެ. އެ ގައުމުން ޖަޕާނާ ހިއްސާވެގެން 2002 ވަނަ އަހަރު ބޭއްވި ވޯލްޑް ކަޕުގެ ސެމީ ފައިނަލުގައި ކުޅުން ވެގެންދިޔައީ އޭޝިއާގެ ގައުމަކަށް މިހާތަނަށް ވޯލްޑް ކަޕުގައި ލިބުނު އެންމެ ބޮޑު ކާމިޔާބަށެވެ. އެ ފަހަރު އެ ޓީމުން އެހިސާބަށް ދަތުރުކުރީ ސްޕެއިނާއި އިޓަލީ ފަދަ ދުނިޔޭގެ ގަދަ ބާރުތައް ކަޓުވާލުމަށް ފަހު އެވެ. ދެކުނު ކޮރެއާގެ ބައެއް ކުޅުންތެރިންނަކީ ވެސް ދުނިޔޭގެ ފުޓްބޯޅައިގައި ފާހަގަކުރެވޭ ކުޅުންތެރިންނެވެ. އެގޮތުން އިންގްލެންޑުގެ މެންޗެސްޓާ ޔުނައިޓެޑަށް ކުޅެފައިވާ ދެކުނު ކޮރެއާގެ ކުރީގެ ކުޅުންތެރިޔާ ޕާކް ޖީ-ސުން އަކީ ޔުއެފާ ޗެމްޕިއަންސް ލީގާއި ފީފާ ކްލަބް ވޯލްޑް ކަޕް ކާމިޔާބުކުރި އޭޝިއާގެ ފުރަތަމަ ކުޅުންތެރިޔާ އެވެ.
ދެކުނު ކޮރެއާ އިން މި ފަހަރުގެ ވޯލްޑް ކަޕަށް ކޮލިފައިވީ އޭއެފްސީ ކޮލިފިކޭޝަންގެ ތިން ވަނަ ބުރުގައި ވާދަކޮށް ގްރޫޕް އޭ އިން ދެ ވަނަ ހޯދައިގެންނެވެ. ގްރޫޕުން އެއް ވަނަ އަށް ދިޔައީ 22 ޕޮއިންޓާ އެކު އީރާނެވެ. ދެކުނު ކޮރެއާ ދެ ވަނަ ހޯދީ 15 ޕޮއިންޓާ އެކު އެވެ. ގްރޫޕުގައި ދެން ހިމެނުނީ އުޒްބެކިސްތާނާއި ޗައިނާ އާއި ގަތަރެވެ.
ކޯޗު: ދެކުނު ކޮރެއާގެ ކޯޗަކީ އެ ގައުމަށް އުފަން ޝިން ޓައޭ-ޔޮން އެވެ. އުމުރުން 49 އަހަރުގެ ޝިން ވަނީ ދެކުނު ކޮރެއާ ގައުމީ ޓީމަށް 1992 އިން 1997 އަށް 23 މެޗު ކުޅެދީފަ އެވެ. ކޯޗިން ކެރިއަރުގައި އޭނާ ވަނީ ކޮރެއާގެ ވަގުތީ ކޯޗުކަން ދެ ފަހަރުކޮށް، 23 އަހަރުން ދަށުގެ ޓީމާއި 20 އަހަރުން ދަށުގެ ޓީމަށް ވެސް ކޯޗުކޮށްދީފަ އެވެ. ރަސްމީކޮށް ސީނިއާ ޓީމާ ހަވާލުވީ މިދިޔަ އަހަރެވެ. އޭނާ ވަނީ އެ ޓީމަށް މިދިޔަ އަހަރުގެ އީއޭއެފްއެފް އީސްޓް އޭޝިއަން ކަޕް ކާމިޔާބުކޮށްދީފަ އެވެ. އަދި ކްލަބް ކޯޗިން ކެރިއަރުގައި ދެކުނު ކޮރެއާގެ ސެއޮންގްނަމް އެފްސީ އަށް 2010 ވަނަ އަހަރުގެ އޭއެފްސީ ޗެމްޕިއަންސް ލީގު ހޯދައިދިނެވެ. އޭޝިއާގެ ފުޓްބޯޅައިގެ ތަޖުރިބާ އޭނާގެ ކިބައިގައި ބޮޑެވެ.
ފޯވާޑް ހިއަން މިން ސަން އަކީ ދެކުނު ކޮރެއާ ޓީމުގައި މިވަގުތު ހުރި އެންމެ މަޝްހޫރު އެއް ކުޅުންތެރިޔާ އެވެ. ޕްރިމިއާ ލީގުގެ ޓޮޓެންހަމް ހޮޓްސްޕާސް އަށް 2015 އިން ފެށިގެން މިހާތަނަށް 139 މެޗު ކުޅެދީ 47 ގޯލް ޖަހައިދީފައިވެ އެވެ. ސަން އަކީ ޕްރިމިއާ ލީގުގެ ތާރީހުގައި އެންމެ ގިނަ ލަނޑު ޖެހި އޭޝިއާ ކުޅުންތެރިޔާ އެވެ. ޓޮޓެންހަމް އަށް ބަދަލުވުމުގެ ކުރިން ޖަރުމަނުގެ ހެމްބާގާއި ބެޔާ ލެވާކޫސަން އަށް ވެސް ވަނީ އޭނާ ކުޅެފަ އެވެ. އޭނާގެ ޔޫރަޕުގެ ތަޖުރިބާގެ ބޭނުން ވޯލްޑް ކަޕުގައި ދެކުނު ކޮރެއާ އަށް ހިފޭނެ އެވެ. ސަން ވަނީ ދެކުނު ކޮރެއާ ގައުމީ ޓީމަށް 65 މެޗުން 21 ގޯލް ޖަހައިދީފަ އެވެ.
ކީ ސުން-ޔުއެން: އުމުރުން 29 އަހަރުގެ ކީ ސުން-ޔުއެން އަކީ ދެކުނު ކޮރެއާގެ ކެޕްޓަންގެ އިތުރުން އެންމެ މުހިއްމު އެއް ކުޅުންތެރިޔާ ވެސް މެ އެވެ. ހުނަރުވެރި މި މިޑްފީލްޑަރަކީ ޓެކްނިކަލީ ވަރަށް ތަފާތު ކުޅުންތެރިއެކެވެ. އޭނާގެ ދުރު ރާސްތާ ޕާސްތަކާއި ޝޫޓިން އަދި ހިލޭ ޖެހުންތައް ފާހަގަކޮށްލެވެ އެވެ. ޕްރިމިއާ ލީގުގެ ސްވަންސީ ސިޓީ އަށް ކުޅޭ މި ކުޅުންތެރިޔާ އަށް ޔޫރަޕުގެ ބައެއް ބޮޑެތި ކްލަބްތަކުން ވެސް ފާރަލަ އެވެ. ޕްރިމިއާ ލީގުގެ ސަންޑަލެންޑާއި ސްކޮޓްލެންޑުގެ ސެލްޓިކަށް ވެސް ކުޅެފައިވާ ސުން ވަނީ ދެކުނު ކޮރެއާ ގައުމީ ޓީމަށް މިހާތަނަށް 100 މެޗު ކުޅެދީފަ އެވެ.
ދެކުނު ކޮރެއާ ހިމެނެނީ އެންމެ ފަހުގެ ޗެމްޕިއަން ޖަރުމަނާއި މެކްސިކޯ އާއި ސްވިޑަންއާ އެއް ގްރޫޕެއްގަ އެވެ. މި ގްރޫޕުން ފަސޭހަކަމާ އެކު ޖަރުމަން އެއް ވަނަ ހޯދާނެ ކަމަށް ބެލެވެ އެވެ. ދެ ވަނަ މަގާމަށް ވާދަކުރަން އޮތީ ދާދި އެއް ފެންވަރެއްގެ ތިން ޓީމެވެ. އެހެންވެ މިއީ ދެ ވަނަ މަގާމަށް އެންމެ ވާދަވެރި ގްރޫޕް ކަމަށް ބެލެވިދާނެ އެވެ. ތަޖުރިބާކާރުން ދެކޭ ގޮތުގައި މި ގްރޫޕުން ދެ ވަނަ ހޯދާނީ މެކްސިކޯ އެވެ. އެކަމަކު ދެކުނު ކޮރެއާ ވެސް ދުލެއް ދޭނެ ކަމަށް ނުބެލެވެ އެވެ. ސަބަބަކީ ވޯލްޑް ކަޕުގައި އެ ޓީމުތައް ނަތީޖާތައް ޖުމްލަގޮތެއްގައި ރަނގަޅުވުމެވެ.