16 ޖޫން 2018 - 11:39
ސޯޗީ، ރަޝިއާ (ޖޫން 16) - ވޯލްޑް ކަޕް ފުޓްބޯޅަ މުބާރާތުގައި ރޭ ސްޕެއިނާ 3-3 އިން އެއްވަރުވި މެޗުގައި ހެދި ހެޓްރިކަކީ އޭނާގެ އެންމެ ފުރިހަމަ ހެޓްރިކް ކަމަށް ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ބުނެފި އެވެ.
ރޮނާލްޑޯ ރޭ ފުރަތަމަ ލަނޑު ޖެހީ ޕެނަލްޓީ އަކުންނެވެ. ދެ ވަނަ ގޯލު އޭރިއާ ބޭރުން ފޮނުވާލި ޝޮޓަކުން ކާމިޔާބުކުރިއިރު މިއީ ސްޕެއިންގެ ކީޕަރު ޑޭވިޑް ޑެހެއާ އަށް ހެދުނު ގޯހަކުން ވަން ލަނޑެކެވެ. ރޮނާލްޑޯ ތިން ވަނަ ލަނޑު ޖެހީ ލިބުނު ހިލޭ ޖެހުމަކުންނެވެ.
"މިއީ އަހަރެންގެ ކެރިއަރުގައި ހެދުނު އެންމެ ފުރިހަމަ ހެޓްރިކް. މީގެ މުޅި ޓީމުގެ ހިއްސާ ވެސް ވަރަށް ބޮޑު،" ރޮނާލްޑޯ ބުންޏެވެ.
ރޮނާލްޑޯ ބުނީ ސްޕެއިނާ ދެކޮޅަށް ދެއްކި ކުޅުމުން ޕޯޗުގަލަށް ވަރަށް ބޮޑު ހިތްވަރެއް ލިބިގެންދާނެ ކަމަށެވެ.
"މި މެޗުގައި އަހަރެެމެން ދެ ފަހަރެއްގެ މަތިން ލީޑުނެގިން. އެކަމު ސްޕެއިނުން ދުލެއް ނުދިން. މެޗުގެ ނަތީޖާ ނުކުތް ގޮތުން ނެތް އިތުރު ވާހަކައެއް ދެއްކެން. އެންމެ ބޮޑު ކަމަކީ މުބާރާތުގެ ފޭވަރިޓެއްގެ ގޮތުގައި ބެލެވޭ ސްޕެއިނާ ދެކޮޅަށް އަހަރެމެން މި ދެއްކި ތަފާތު މޮޅު ކުޅުން،" ރޮނާލްޑޯ ބުންޏެވެ.
މިއީ ރޮނާލްޑޯގެ ކެރިއަރުގައި އޭނާ ހެދި 51 ވަނަ ހެޓްރިކް އެވެ. އަދި ވޯލްޑް ކަޕް ތާރީހުގައި ފެނިގެންދިޔަ 51 ވަނަ ހެޓްރިކް ވެސް މެ އެވެ. އަދި މި ހެޓްރިކާ އެކު ރޮނާލްޑޯ ވެފައިވަނީ ވޯލްޑް ކަޕް ތާރީހުގައި ހެޓްރިކެއް ހެދި އެންމެ ދުވަސްވީ ކުޅުންތެރިއާ އަށެވެ. ރޮނާލްޑޯގެ އުމުރަކީ 33 އަހަރާއި 130 ދުވަހެވެ.
އަދި ރޮނާލްޑޯ ވެފައިވަނީ ސްޕެއިން ކޮޅަށް ބޮޑު މުބާރާތެއްގައި ހެޓްރިކެއް ހެދި ފުރަތަމަ ކުޅުންތެރިޔާ އަށެވެ. އަދި އޭނާ އަކީ ހަތަރު ވޯލްޑް ކަޕެއްގައި ލަނޑު ޖެހި ހަތަރު ވަނަ ކުޅުންތެރިޔާ އެވެ. އަދި ޖެހިޖެހިގެން ބޮޑު އަށް މުބާރާތުގައި ލަނޑު ޖެހި ފުރަތަމަ ކުޅުންތެރިޔަކީ ވެސް ރޮނާލްޑޯ އެވެ.
ޕޯޗުގަލްގެ ކޯޗު ފެނާންޑޯ ސަންޓޯސް ބުނީ ރޮނާލްޑޯ އަކީ އަބަދުވެސް އޭނާ އެންމެ އިތުބާރުކުރާ އެއް ކުޅުންތެރިއެއް ކަަމަށާއި އޭނާ ފިޓްނަސް ހިފަހައްޓައިފިނަމަ އަދި އިތުރު ވޯލްޑް ކަޕެއްގައި ކުޅެ، ގިނަ ރެކޯޑްތަކެއް ހަދާނެ ކަމަށެވެ.
"ކިހިނެއް އެނގެނީ ހަތަރު އަހަރު ފަހުން ރޮނާލްޑޯ ދެން އޮތް ވޯލްޑް ކަޕުން ވެސް ފެނިދާނެ. މީގެ އޮތީ ފިޒިކަލް ފިޓްނަސް ހިފަހެއްޓުން. އެ ވޯލްޑް ކަޕްގައި ރޮނާލްޑޯ ކުޅެފިނަމަ ޔަގީން އޭނާ ލަނޑު ޖަހާނެ. އިތުރު ރެކޯޑްތަކެއް ހަދާނެ،" ސަންޓޯސް ބުންޏެވެ.